ʼE Tou Faʼa Kātaki ʼUhi Ko Tatatou Fai Faka Mafola
1 ʼE fakaloto mālohiʼi tatou ʼi te Folafola ʼa te ʼAtua ke tou “faʼa kātaki ʼo fēleleʼi ʼi te lele ʼaē kua tuku mai kiā tatou.” (Hep. 12:1, MN ) Ohage ko te faʼa kātaki ʼa te tagata lele moʼo fakaʼosi ia tana lele, ʼe tonu foki mo tatou ke tou faʼa kātaki mo kapau ʼe tou fia maʼu ia te maʼuli heʼegata. (Hep. 10:36) ʼE ʼaoga feafeaʼi kiā tatou ia te minisitelio faka Kilisitiano ke feala hatatou faʼa kātaki ʼo nonofo agatonu ʼo aʼu ki te fakaʼosi?—Mat. 24:13.
2 ʼE Tou Mālolohi Ai ʼi Te Faʼahi Fakalaumālie: ʼE tou taupau tuʼumaʼu anai ia tatatou ʼamanaki mo kapau ʼe tou tala ia te fakapapau taulekaleka ʼa te Tohi-Tapu ʼo ʼuhiga mo te mālama foʼou pea mo faitotonu. (1 Tes. 5:8) Ka tou kau tuʼumaʼu ki te fai faka mafola, pea ʼe ko he faigamālie ʼaia ke tou fakahā ai ia te ʼu moʼoni ʼaē neʼe tou ako ʼi te Tohi-Tapu. ʼE ko he faigamālie ʼaia ke tou fakahā ai tatatou tui, pea ʼaki te faʼahi ʼaia ʼe tou mālolohi anai ʼi te faʼahi fakalaumālie.
3 Ke feala hatatou akoʼi fakalelei ia te hahaʼi, ʼe tonu muʼa kiā tatou totonu ke tou mahino lelei ki te ʼu moʼoni faka Tohi-Tapu. ʼE tonu ke tou fai he ʼu kumi pea mo tou metitāsioʼi te ʼu meʼa ʼaē ʼe tou ako. Ko tatatou ʼu faiga fakamalotoloto, ʼe nātou fakatuputupu ia totatou ʼatamai mālama, mo fakamālohiʼi tatatou tui pea mo totatou maʼuli fakalaumālie. (Taag. 2:3-5) Koia, ʼe tou lotomālohi mokā tou tokoni ki niʼihi.—1 Tim. 4:15, 16.
4 ʼI “te teu tau kātoa ʼo te ʼAtua,” ʼe ko he koga maʼuhiga tatatou kau mālohi ki te minisitelio, pea ʼe ʼaoga te potu ʼaia moʼo fakafeagai ki te Tevolo pea mo te kau temonio. (Ef. 6:10-13, 15, MN ) Kapau ʼe tou maʼumaʼua ʼi te tauhi taputapu, pea ʼe tou manatuʼi tuʼumaʼu anai te ʼu meʼa ʼaē ʼe fakatupu lotomālohi pea mo tou fakafeagai ki te ʼu fakahala ʼo te mālama ʼa Satana. (Kol. 3:2) Ka tou ako te ʼu moʼoni ʼa Sehova ki te hahaʼi, ʼe tou manatuʼi tuʼumaʼu te maʼuhiga ʼaē ke tou nonofo maʼa.—1 Pet. 2:12.
5 ʼE Foaki Mai Te Mālohi e Te ʼAtua: Ka tou kau ki te gāue fai faka mafola, ʼe tou gāueʼi ai tatatou falala ʼaē kiā Sehova. (2 Ko. 4:1, 7) ʼE ko he meʼa lelei, heʼe ko te gāueʼi ʼaē ʼo tatatou falala, ʼe tokoni mai ki te fakahoko ʼo tatatou minisitelio, pea mo maʼu puleʼaki ki te ʼu fihifihia ʼo te maʼuli. (Filp. 4:11-13) Koia, ke feala hatatou faʼa kātaki, ʼe tonu ke tou ako ke tou falala kiā Sehova. (Pes. 55:22) ʼE lahi te ʼu ʼaluʼaga ʼe tou faʼa kātaki ʼuhi ko tatatou fai faka mafola.