ʼE Tou Mālolohi Tuʼumaʼu Pē ʼi Te Faʼahi Fakalaumālie Mokā Tou Fai Fakamafola
1. Koteā te ʼu lelei ʼe tou maʼu mai te gāue fai fakamafola?
1 ʼE feala ke tou mālolohi ʼi te faʼahi fakalaumālie mokā tou lagolago mālohi ki te gāue fai fakamafola pea ʼe toe lahi ai mo tatatou fiafia. ʼE mahino ia, ʼe tou kau tāfito ki te minisitelio heʼe tou fia fakafiafia ia Sehova. Kae ʼi tatatou fakalogo ki te fakatotonu ʼaē ke tou “fakamafola te folafola,” ʼe tapuakinaʼi anai tātou e Sehova pea ʼe toe fua lelei pē kiā tātou ʼi te tahi age ʼu faʼahi. (2 Tim. 4:2; Isa. 48:17, 18) ʼE feafeaʼi hatatou mālolohi ʼi te faʼahi fakalaumālie mokā tou fai fakamafola pea mo tou fiafia ai?
2. ʼE feafeaʼi he fakamālohiʼi ʼo tātou e tatatou minisitelio?
2 ʼE Tou Mālolohi Ai Pea Mo Tapuakinaʼi Tātou: Ko tatatou fai fakamafola ʼe ina fakalotomālohiʼi tātou ke tou tōkakaga ʼāteaina pē ki te ʼu tapuakina ʼo te Puleʼaga kae mole ki totatou ʼu fihifihia. (2 Ko. 4:18) Ko tatatou fakamahino ia te ʼu akonaki ʼo te Tohi-Tapu ʼe ina fakamālohiʼi tatatou tui ʼaē ki te ʼu fakapapau ʼa Sehova pea mo fakatuputupu tatatou loto fakafetaʼi ʼaē ki te moʼoni. (Isa. 65:13, 14) ʼI tatatou tokoni ki te hahaʼi ke natou tuputupu ʼi te faʼahi fakalaumālie, ke mole natou “kau ʼi te mālamanei,” ʼe toe fakamālohiʼi ai tatatou fakatotonu ʼaē ke mole tou kau ki te mālamanei.—Soa. 17:14, 16; Loma 12:2.
3. ʼE tokoni feafeaʼi mai tatatou minisitelio ke tou maʼu ia te ʼu kalitātē Fakakilisitiano?
3 Ko tatatou kau ki te minisitelio ʼe tokoni mai ke tou maʼu ia te ʼu kalitātē Fakakilisitiano. Ohagē lā, ko tatatou faiga ʼaē ke tou “liliu ko meʼa fuli maʼa te hahaʼi kehekehe,” ʼe tokoni mai ke lahi age tatatou agavaivai. (1 Ko. 9:19-23) Kā tou palalau kiā nātou ʼaē ʼe “ ʼāhua pea mo mavetevete, ohagē ko he faga ovi ʼe mole honatou tagata tauhi,” ʼe tou ako ai ia te lotomahino. (Mat. 9:36) ʼE tou ako ia te faʼa kātaki mokā tou hoko atu tatatou minisitelio logolā te mole fia logo ʼa te hahaʼi peʼe ko te fakafeagai. ʼE lahi age tatatou fiafia ʼi tatatou foaki ia tātou totonu moʼo tokoni ki te hahaʼi.—Gāue 20:35.
4. Koteā takotou manatu ʼo ʼuhiga mo takotou minisitelio?
4 ʼE ko he tapuakina ia he minisitelio ʼe ina fakavikiviki ia Ia tokotahi pē ʼaē ʼe tuha ke tou ʼatolasio ki ai! ʼE foaki mai e te minisitelio ia te mālohi. Ko nātou ʼaē ʼe natou tōkakaga ʼāteaina pē ʼo “fai [ia] he fagonogono ʼe kātoa ʼo ʼuhiga mo te logo lelei,” ʼe natou toe maʼu lahi ai he ʼu tapuakina.—Gāue 20:24.