ʼE ʼAoga Ia Te Faʼa Kātaki Ki Te Gāue Fai Fakamafola
1 Iā taʼu e 30 tupu, neʼe fiafia ia te ʼapositolo ko Paulo ʼi tana fakahoko tāfito ia te gāue ʼaē ko te fakamafola ʼo te evaselio. Ohagē pē ko te gāue fuli ʼaē ʼe ʼi ai tona ʼaoga, neʼe tau mo ni ʼu fihifihia ʼi tana gāue fai fakamafola. (2 Ko. 11:23-29) Kae neʼe mole tuku e Paulo ia tana fai fakamafola. (2 Ko. 4:1) Neʼe mahino kiā ia, ʼe haʼu anai mai iā Sehova ia te mālohi ʼaē ʼe ʼaoga kiā ia moʼo faʼa kātaki, ʼo fakahoko ia tana minisitelio. (Filp. 4:13) ʼUhi ko tana faʼifaʼitaki ʼi tana faʼa kātaki agatonu, neʼe feala ai ke ʼui fēnei e Paulo: “Ke kotou faʼifaʼitaki kiā te au, ohagē pē ko taku faʼifaʼitakiʼi ʼaē ia Kilisito.”—1 Ko. 11:1.
2 Tou Faʼa Kātakiʼi Te ʼu Fihifihia Iā ʼAho Nei: ʼI te ʼaho fuli, tokolahi ʼi ʼotatou tehina ʼe natou tau mo te manukinuki, te fakafeagai, peʼe ko te fakaʼauʼauganoa ki te moʼoni ʼo tonatou fāmili, tonatou ʼu kaugā gāue, peʼe ko tonatou ʼu kaugā ako. (Mat. 10:35; Soa. 15:20) ʼE lagi ko he ʼu ʼaluʼaga kua hoko kiā koutou. Tahi ʼaē, ʼe lagi kotou tau mo he mahaki kovi, peʼe kotou faiga ʼi te ʼaho fuli ke kotou tekeʼi ia he ʼu fakafiafia pea mo he ʼu fakahala ʼe tupu ʼaki ai he ʼahiʼahiʼi ʼo takotou tui pea mo takotou faʼa kātaki. ʼE feala ke tou maʼu ia te mālohi ʼi tatatou vakaʼi ia te ʼu faʼifaʼitaki ʼo te ʼu kaugana agatonu ʼo te temi muʼa, mo totatou ʼu tehina Kilisitiano iā ʼaho nei ʼaē neʼe tau mo te ʼu fihifihia pea neʼe natou lava tekeʼi.—1 Pet. 5:9.
3 ʼE feala ke tou maʼu ia te mālohi moʼo hoko atu ia tatatou gāue fai fakamafola ʼi te minisitelio, ʼaki hatatou “kofuʼi te teu tau kātoa ʼo te ʼAtua.” (Efe. 6:10-13, 15) ʼE toe maʼuhiga mo te faikole ke tou maʼu ai ia te faʼa kātaki. Ko te ʼAtua ʼe ina foaki mai ia tona laumālie māʼoniʼoni ke feala ai hatatou kātakiʼi ia totatou ʼu fihifihia. (2 Ko. 6:4-7) Ke tou mālo ʼi tatatou tau fakalaumālie, ʼe tonu ke tou tokagaʼi ia te ʼu fakamanatu ʼa te ʼAtua ke uga ai totatou ʼatamai. (Pes. 119:24, 85-88) Ohagē ko he tamasiʼi ʼe feala pē ke ina lau liuliuga ia he tohi mai hana tamai ʼofa, ko tatatou lau ia te Tohi-Tapu ʼi te ʼaho fuli ʼe ina fakamālohiʼi tatatou ʼu felōgoi ʼaē mo Sehova. ʼE tou maʼu ia te poto moʼo tauʼi ia totatou ʼu fihifihia, ʼaki tatatou ako takitokotahi, ʼo tou tuku ai ia te ʼu manatu ʼa te ʼAtua ke ina takitaki ia te ʼu tonu ʼaē ʼe tou fai pea mo fakamālohiʼi ia tatatou agatonu.—Taag. 2:10, 11.
4 ʼE Tou Maʼu Ia Te ʼu Tapuakina ʼAki Tatatou Faʼa Kātaki: Ohagē pē ko Paulo, ko tatatou faʼa kātaki agatonu ʼi tatatou fakahoko ia tatatou minisitelio, ʼe fakatupu ʼaki ai hatatou fakafiafiaʼi te loto ʼo Sehova pea mo tou maʼu ai ia te ʼu tapuakina kiā tātou totonu pea mo ʼihi. (Taag. 27:11) ʼOfa pē ke tou fakatotonu ke tou faʼa kātaki aipē ʼi tatatou minisitelio, ʼo tou fakahā ko tatatou tui ʼe mālohi pea “ ʼe maʼuhiga age ʼi te ʼaulo ʼaē ʼe feala ke ʼauha logopē tona kua fakamaʼa ʼaē ʼi te afi.”—1 Pet. 1:6, 7.