Tou Faka Mafola Ki Te Tokolahi
1. Koteā ʼaē neʼe fai e te ʼu ʼuluaki Kilisitiano ke feala hanatou faka mafola ki te tokolahi ia te logo lelei?
1 Neʼe faiga mālohi ia te ʼu ʼuluaki tisipulo ʼa Sesu ke nātou faka mafola ia te logo lelei ʼo te Puleʼaga. Neʼe nātou fakaʼaogaʼi te ʼu meʼa gāue lelei ke feala hanatou fai faka mafola ki te tokolahi. Ko te ʼu tagata Kilisitiano ʼaē neʼe nātou tohi ia te Tohi-Tapu, neʼe nātou tohi ʼi te lea Faka Keleka māhani, ʼaē ʼi te temi ʼaia neʼe ko te lea tāfito ʼa te hahaʼi ʼo te Puleʼaga Loma. Tahi ʼaē, ʼi te lua pea mo te tolu sēkulō ʼo totatou temi neʼe lagi ko te kau fai faka mafola faʼafai ʼaē neʼe nātou kamata fakaʼaogaʼi ia te faʼahiga tohi ʼaē ko te codex, he neʼe faigafua age tona fakaʼaogaʼi ʼi te ʼu takaiga tohi, mokā nātou fia kumi he ʼu vaega.
2, 3. (a) ʼE hoko feafeaʼi ʼi totatou temi ia te ʼu palalau ʼaē ʼe tuʼu iā Isaia 60:16? (b) ʼE fakaʼaogaʼi feafeaʼi te ʼu meʼa gāue ʼo totatou temi moʼo fakatuputupu ia te tauhi maʼa?
2 Te Fakaʼaogaʼi ʼo Te ʼu Meʼa Gāue ʼo Te Temi: ʼAki te polofeta ko Isaia, neʼe fakakikite fēnei e Sehova: “ ʼE ke ʼinu anai te huʼa pipi ʼo te ʼu puleʼaga.” (Isa. 60:16) ʼI te hoko ʼo te lea faka polofeta ʼaia ʼi totatou temi, ko te ʼu kaugana ʼa Sehova ʼe nātou fakaʼaogaʼi ia te ʼu koloā ʼo te ʼu puleʼaga moʼo fakatuputupu ia te gāue fai faka mafola. Ohage la ʼi te taʼu 1914, neʼe mole heʼeki ʼiloʼi lelei e te hahaʼi ia te ʼu ʼata ʼaē ʼe fakaʼasi ai he ʼu hahaʼi pea mo logo tanatou ʼu palalau, kae ko te kau Ako ʼo te Tohi-Tapu, neʼe kua nātou fakahā ia te ʼata ʼaē ko te “Photo-Drame de la Création.” Ko te ʼata ʼaia neʼe hola valu tona loaloaga, pea neʼe fakahāhā ai te ʼu pāki pea mo fakaʼasi ai te ʼu hahaʼi ʼe nātou gaūgaūe, neʼe lanu te ʼata ʼaia pea neʼe ʼi ai mo te musika pea mo te ʼu fakamatala: neʼe ko he faka mafola mālohi ʼaia ki te ʼu toko lauʼi miliona hahaʼi.
3 Ia ʼaho nei, ko te hahaʼi ʼa te ʼAtua ʼe nātou fakaʼaogaʼi te ʼu masini ʼe nātou tā vave te ʼu tohi pea mo te ʼu olotinatea moʼo fakaliliu ʼaki te ʼu Tohi-Tapu pea mo te ʼu tohi faka Tohi-Tapu kiā lea e teau tupu. ʼAki te ʼu vakalele pea mo te ʼu vaka, kua feala ke tufa te ʼu tohi faka Tohi-Tapu ki te ʼu potu taupotu ʼo te kele, ʼo aʼu ki te ʼu fenua e 235. ʼAki tona laumālie, ʼe uga e Sehova tana ʼu kaugana ke nātou fakaʼaogaʼi te ʼu meʼa gāue ʼo totatou temi moʼo faka fealagia ki te hahaʼi fuli ke nātou ʼiloʼi te moʼoni ʼaē ʼe tuʼu ʼi te Tohi-Tapu.
4. Koteā te ʼu fetogi neʼe fai e ʼihi ʼi tonatou maʼuli ke feala hanatou faka mafola ia te logo lelei ki te hahaʼi fuli?
4 Te ʼu Fetogi ʼi Tonatou Maʼuli Takitokotahi: Ke feala hanatou faka mafola ia te logo lelei ki te tokolahi, neʼe fai e te kau atolasio moʼoni ia te ʼu fetogi ʼi tonatou maʼuli takitokotahi. Tokolahi neʼe nātou faka faigafua ia tonatou maʼuli ke lahi age hanatou kau ki te fai faka mafola. Ko ʼihi neʼe nātou ʼolo ki te ʼu koga meʼa ʼaē ʼe ʼaoga lahi ai he kau fai faka mafola ʼo te Puleʼaga. Ko ʼihi neʼe nātou ako te tahi lea, ke feala hanatou toe fakalahi ake tanatou minisitelio.
5, 6. Koteā ʼaē ʼe feala ke tou fai moʼo fai faka mafola ki te tokolahi ʼo totatou telituale?
5 Tahi ʼaē, kapau ʼe tou fai faka mafola ki te hahaʼi ʼi te ʼu temi ʼaē ʼe nātou nonofo ai ʼi ʼonatou ʼapi pea mo te ʼu potu ʼaē ʼe tou maʼu ai nātou, pea ʼe tou fai faka mafola anai ki te tokolahi. Kapau ʼe tahitahiga takotou maʼu te hahaʼi ʼi te temi ʼaē ʼe koutou fai faka mafola ai ʼi te uhu, he koʼe koa ʼe mole koutou fetogi muʼa takotou ʼu fakatuʼutuʼu ke koutou fai fagonogono ʼi te ʼu afiafi? ʼE feala koa hakotou fai fagonogono ʼi te ʼu koga meʼa ʼaē ʼe kaugamālie ai? Kua koutou ʼahiʼahiʼi koa te fai fagonogono ʼi te telefoni pea mo te ʼu telituale ʼaē ʼe gāue ai te hahaʼi? ʼE koutou fai fagonogono koa mokā koutou maʼu he ʼu temi faigamālie?
6 ʼE ko he toe pilivilesio hatatou kau ki te fai faka mafola lahi ʼo ʼuhiga mo te huafa ʼo Sehova pea mo tona Puleʼaga! ʼOfa pe ke tou hoko atu ʼo faka mafola ki te tokolahi ia te moʼoni maʼuhiga ʼo te Folafola ʼa te ʼAtua, ke feala hanatou maʼu ia te maʼuli.—Mat. 28:19, 20.