Tou “Fai Ia Meʼa Fuli ʼUhi Ko Te Logo Lelei”
1. Koteā ʼaē ʼe lotolelei ke fai e he kaugā fai fakamafola ʼo te Puleʼaga maʼa te hahaʼi, pea koteā tona tupuʼaga?
1 Neʼe logoʼi e te ʼapositolo ko Paulo neʼe ko tona maʼua ke ina tala ia te logo lelei ki te hahaʼi. (1 Ko. 9:16, 19, 23) ʼO toe fēia pē mo tātou, ko totatou loto ʼaē ke maʼu e te hahaʼi he maʼuli ʼe lelei ʼo talu ai, ʼaē ʼe ina uga tātou ke tou faiga lahi ke tou fakahā kiā nātou ia te logo lelei.
2. Kā tou fai fakamafola, ko te ʼu fetogi fea ʼe tou lotolelei ʼo fai, pea koteā tona tupuʼaga?
2 Tou Fai Fakamafola ʼi Te ʼu Potu Pea ʼi Te ʼu Hola ʼAē ʼe Tou Maʼu Ai Te Hahaʼi: Ko he tagata gelu ʼe mole ina lī tana mātaʼu peʼe ko tona kupega ʼi he koga meʼa pea ʼi he temi pē ʼe tō lelei kiai, kae ʼe ina lī ʼi he koga meʼa pea ʼi te temi ʼaē ʼe feala ai ke ina maʼu he ʼu ika. ʼO toe fēia mo tātou, ʼuhi ko tātou ko he “ ʼu tautai tagata,” ʼe lagi ʼaoga ke tou fai he ʼu fetogi ke feala hatatou maʼu ia te hahaʼi ʼi totatou telituale pea mo tou fiafia lahi age ʼi te pilivilēsio ʼaē ke tou tānaki ia “te ʼu faʼahiga ika kehekehe.” (Mat. 4:19; 13:47) ʼE feala koa hatatou maʼu ia te hahaʼi ʼi ʼonatou ʼapi ʼi tanatou ʼosi gāue, peʼe tou fai he fagonogono faigamālie ʼi te ala ʼi muʼa ʼo tanatou ʼolo ʼo gāue? Ko te fakatuʼutuʼu ʼa Paulo neʼe ko “te fai ʼo he fagonogono ʼe kātoa ʼo ʼuhiga mo te logo lelei,” pea neʼe ina fakaʼaogaʼi ia te ʼu faigamālie ʼe tō lelei ai moʼo fai ia te gāue ʼaia.—Gāue 17:17; 20:20, 24.
3, 4. ʼI tatatou fai fakamafola, ʼe lava feafeaʼi hatatou fakaʼalutahi tatatou ʼu palalau mo te ʼu meʼa ʼaē ʼe ʼaoga ki te hahaʼi, pea koteā tona ʼu fua?
3 Ke ʼAlutahi Takotou ʼu Palalau Mo Te ʼu Meʼa ʼAē ʼe ʼAoga Ki Te Hahaʼi: ʼE faʼa fetogi e te ʼu tagata gelu tanatou ʼu faʼahiga fai mokā natou fia maʼu ia he faʼahiga ika. ʼE lava feafeaʼi hatatou palalau ʼo ʼuhiga mo te logo lelei ʼo te Puleʼaga ke tupu ai he fia logo kiai ia te hahaʼi ʼo totatou telituale? ʼE tonu ke tou tokagaʼi ia te loto ʼo te hahaʼi mokā tou kamata talanoa ki he manatu ʼe tuʼania kiai te hahaʼi fuli, pea mo tou fakalogo lelei leva ki te ʼu tali ʼe natou fai ʼo ʼuhiga mo te manatu ʼaia. (Sake 1:19) ʼE feala ke tou fehuʼi age pe koteā tanatou manatu, ke tupu ai he faifai palalau. (Taag. 20:5) ʼAki te faʼahiga fai ʼaia, ʼe tou fakaʼalutahi anai tatatou ʼu palalau ki te logo lelei ke feala ai ke malave ki tonatou maʼuli. Neʼe liliu ia Paulo “ko meʼa fuli maʼa te hahaʼi kehekehe.” (1 Ko. 9:22) Ko hatatou lava fakaʼalutahi tatatou ʼu palalau mo te ʼu meʼa ʼaē ʼe ʼaoga ki te hahaʼi ʼe ko te puleʼaki ʼaia ke malave ai ki te loto ʼo te hahaʼi.
4 ʼE ko he toe fiafia lahi hatatou palalau ki te hahaʼi ʼo ʼuhiga mo te “ ʼu logo lelei ʼo he meʼa ʼe lelei age”! (Isa. 52:7) ʼOfa pē ke tou “fai ia meʼa fuli ʼuhi ko te logo lelei” ke tou maʼu ai he ʼu hahaʼi ʼe tokolahi.—1 Ko. 9:23.