ʼE Feala Koa Hakotou Fetogi Takotou Polokalama?
1. Koteā te ʼu fetogi ʼaē ʼe tou lava fai ki tatatou polokalama fai faka mafola?
1 ʼI totatou ʼuhiga kau Kilisitiano moʼoni, kua tou tali te fakaafe ʼaē ke tou liliu ko “he u tautai tagata.” (Mat. 4:19) Ohage ko he ʼu tagata tautai, ʼe fua lelei anai tatatou tautai tagata mo kapau ʼe tou fakatuʼutuʼu ke tou fai faka mafola ʼi te ʼu temi ʼaē ʼe tou maʼu ai te hahaʼi. ʼE lahi te ʼu fenua, ko te ʼu māhina ʼaē ka tuʼu mai ʼe loaloaga te ʼu ʼaho. ʼI te fakaʼosi hili hoʼatā pea mo te vaʼevaʼe afiafi, tokolahi te hahaʼi kua nonofo ʼi ʼonatou ʼapi. ʼI te agamāhani, ʼe mole kei nātou hoha ki he meʼa, pea ʼe nātou tali leleiʼi te ʼu hahaʼi ʼaē ʼe ʼolo age ʼo ʼaʼahi nātou. ʼE feala koa hakotou fetogi takotou polokalama ke koutou fai faka mafola ʼi te ʼu taʼi lakaga ʼaia?—1 Ko. 9:23.
2. Koteā te ʼu fakatuʼutuʼu ʼaē ʼe feala ke tou fakaʼaogaʼi moʼo faka aʼu te logo lelei ki he kaugamālie?
2 Te Fai Fagonogono ʼi Te Afiafi: ʼE lagi tou faka aʼu anai te logo lelei ki he kaugamālie mo kapau ʼe tou fakatuʼutuʼu ke tou fai faka mafola ʼi te ʼu afiafi. (Taag. 21:5) ʼE feala anai ki te kau tūpulaga ke nātou fai faka mafola ʼi te ʼosi ako. Ko ʼihi ʼe lagi nātou fai anai ia te faʼahi ʼaia ʼi tanatou ʼosi gāue. Ko ʼihi ako tohi ʼo te kokelekasio, ʼi muʼa ʼo te fai ʼo tanatou ako tohi ʼo te vāhaʼa, ʼe nātou ʼolo ʼo fai faka mafola lolotoga he hola kātoa.
3. Koteā te ʼu faigamālie ʼe koutou maʼu mokā koutou fai faka mafola ʼi te ʼu hili hoʼatā pea mo te ʼu afiafi?
3 Kapau ʼe tou fai faka mafola ʼi te ʼu hili hoʼatā pea mo te ʼu afiafi, ʼe lagi tou maʼu atu anai ia te ʼu hahaʼi ʼaē neʼe pupuli tuʼumaʼu ʼi te agamāhani ʼiō nātou. ʼE lahi te ʼu telituale, ko te ʼu ala pea mo ʼihi koga meʼa ʼe kaugamālie ai te hahaʼi, ʼe feala tatatou fai fagonogono ai ʼi te afiafi. Pea tokolahi ʼe nātou leleiʼia te ʼu afiafi moʼo ʼaʼahi te hahaʼi pea mo kamata ni ʼu ako Tohi-Tapu.
4. He koʼe ʼe maʼuhiga ke tou fakasiosio tonu pea mo aga fakaʼapaʼapa mokā tou fai fagonogono ʼi te afiafi?
4 Tou Fakasiosio Tonu: Ka tou fai faka mafola ʼi te afiafi, ʼe tonu ke tou maʼu ia te fakasiosio tonu, heʼe ʼi te agamāhani ʼe lelei age hatatou fai fagonogono ʼi te vaʼevaʼe afiafi, ʼi hatatou fai fagonogono ʼi te temi ʼaē ka momoe ai te hahaʼi. (Filp. 4:5) Ka koutou fisifisi ʼi te matapā, koutou tutuʼu fakalelei ʼi te muʼa matapā ke feala hanatou sisio lelei kiā koutou. Koutou foimo fakahā ki te loto fale ia te tupuʼaga ʼo takotou ʼōmai kiō nātou. Kapau ʼe koutou ʼolo ki he ʼapi kae lolotoga kakai, koutou fakahā age ʼe koutou toe ʼolo age anai ʼi he tahi temi. Koutou aga fakaʼapaʼapa tuʼumaʼu.—Mat. 7:12.
5. E feafeaʼi hatatou gāue tokaga mokā tou fai faka mafola?
5 ʼE tonu ke tou ʼiloʼi ʼe feala ke hoko he ʼu tuʼutāmaki ʼi te ʼu fai gāue fakaafiafi. Kapau ʼe koutou fai faka mafola kae kua fakapōʼuli, koutou kaugā gāue mo he tahi peʼe ʼaki he tahi ʼu tēhina mo tuagaʼane. Koutou haʼele ʼi te ʼu ala ʼaē ʼe mālamagia pea mo ʼaē ʼe kaugamālie ai te hahaʼi. Koutou fai faka mafola ʼi te ʼu kolo ʼaē ʼe mole feala ke hoko ai he tuʼutāmaki. ʼAua naʼa koutou fai fagonogono ʼi te ʼu kolo ʼaē ʼe fakamatakutaku mokā pōʼuli.—Taag. 22:3.
6. Koteā te tahi ʼu lelei ʼo te fai fagonogono ʼi te fakaʼosi hili hoʼatā pea mo te ʼu vaʼevaʼe afiafi?
6 Ko te fai fagonogono ʼi te fakaʼosi hili hoʼatā peʼe ʼi te vaʼevaʼe afiafi, ʼe ko he faigamālie ʼaia ke tou pionie vaeluaʼi temi pea mo pionie kātoa. (Loma 1:12) ʼE feala koa hakotou fetogi takotou polokalama ke koutou kau ki te faʼahiga fai ʼaia ʼo te gāue?