ʼE Kotou Lava Fai Koa He ʼu Fetogi?
1. Kotea te ʼu fetogi ʼe feala ke tou fai ʼuhi ko te fetogi ʼo te ʼu aluʼaga ʼo te malamanei?
1 ʼE fakatatau ʼi te Tohi-Tapu ia te malamanei ki he teate ʼe fetogi tuʼumaʼu ai ia te ʼu aluʼaga ʼo te kiʼi gaoʼi pea mo natou ʼae ʼe gaoʼi ʼi ai. (1 Ko. 7:31, MN) Koia, ʼaki te ʼu fetogi ʼo te ʼu aluʼaga ʼo te malamanei, ʼe tonu ke tou fai ai he ʼu fetogi ʼo ʼuhiga mo tatatou faʼahiga faifakamafola, mo tatatou polokalama pea mo ʼatatou faʼahiga felogoʼi mo te hahaʼi. ʼE kotou lava fai koa he ʼu fetogi?
2. He ko ʼe ʼe tonu ke tou fai he ʼu fetogi moʼo mulimuli ki te kautahi ʼa Sehova?
2 Te ʼu Faʼahiga Faifakamafola: Neʼe fai tuʼumaʼu pe e te kokelekasio Fakakilisitiano ia te ʼu fetogi. ʼI te temi ʼae neʼe ʼuluaki fekauʼi ai e Sesu ʼana tisipulo ki te gaue faifakamafola, neʼe ina ui age ke ʼaua naʼa natou toʼo hanatou kato fafaʼo meʼa kai peʼe ko he foʼi fala. (Mat. 10:9, 10) Pea ki muli age leva, ʼi tana iloʼi ʼae ʼe tau anai ʼana tisipulo mo he ʼu fihifihia pea ʼe natou fakahoko anai te gaue faifakamafola ʼi he tahi age ʼu telituale, neʼe fetogi ai leva e Sesu ʼana fakatotonu ʼae neʼe ina fai age kia natou. (Luka 22:36) ʼI te ʼu taʼu 1900, neʼe fakahoko e te kautahi ʼa Sehova ia te ʼu faʼahiga faifakamafola kehekehe, ʼo mulimuli ki te ʼu meʼa ʼae neʼe ʼaoga ʼi te ʼu temi ʼaia: te ʼu kate neʼe tohi ai te logo ʼo te Puleʼaga, mo te ʼu latio pea mo te ʼu motoka neʼe fakapipiki ki ai te ʼu fakatagi. Ia ʼaho nei, mai tona aluʼaga ʼae ʼe faigataʼa te maʼu ʼo te hahaʼi ʼi tonatou ʼapi, ʼe mole tou olo pe anai ʼi te ʼu ʼapi kaʼe ʼe maʼuhiga ke tou toe fai te gaue ʼi muʼa ʼo te kauga malie pea mo te fagonogono faigamalie. Neʼe toe fakalotomalohiʼi tatou ke tou olo ʼo faifakamafola ʼi te ʼu afiafi mo kapau ʼe gaue te hahaʼi ʼi te ʼaho katoa. ʼE kotou mulimuli koa ki te faʼahiga feʼaluʼaki ʼo te saliote ʼa Sehova ʼae ʼi selo?—Esk. 1:20, 21.
3. He ko ʼe ʼe fua lelei age mo kapau ʼe tou palalau mo te hahaʼi ʼo mulimuli ki te ʼu meʼa ʼae ʼe natou hoha ki ai?
3 Te ʼu ʼUluaki Palalau: Kotea ʼae ʼe hoha ki ai te hahaʼi ʼo tokotou telituale? Te ʼu fihifihia fakaekonomika? Te maʼuli fakafamili? Te tau? ʼE lelei ke tou mahino ki te ʼu fihifihia pea mo te ʼu aluʼaga faigataʼa ʼae ʼe tau mo te hahaʼi ʼo totatou telituale, ke feala hatatou teuteuʼi he ʼu ʼuluaki palalau ʼe alu tahi mo te ʼu aluʼaga ʼaia. (1 Ko. 9:20-23) Ka palalau mai he tahi, ʼe mole tonu pe anai ke tou fai he tali ki ai pea mo hoko atu ia te faipalalau ʼaki te ʼu manatu ʼae neʼe tou teuteuʼi. Kaʼe ʼe lelei ke tou fetogi ʼatatou palalau ʼo mulimuli ki ʼonatou fihifihia.
4. He ko ʼe ʼe tonu ke tou foimo fai he ʼu fetogi?
4 Kua vave ʼosi pe ia te aluʼaga fakaʼosi ʼo te malamanei, pea ʼe kamata anai ia te mamahi lahi. “Kua nounou te temi.” (1 Ko. 7:29) Koia ʼe maʼuhiga ke tou foimo fai ia te ʼu fetogi ʼae ʼe ʼaoga, ke feala ke lahi age ia te gaue ʼae ʼe tou fakahoko ʼi te temi ʼae ʼe kei toe.