Te Tohi Mai Te Filiale
Naʼi Tēhina Mo Tuagaʼane:
ʼI te kamata ʼo te taʼu gāue foʼou ʼaenī, ko ʼihi kau fai faka mafola kua nātou Pionie Kātoa. ʼI te māhina ʼo Maio, neʼe maʼu te tuputupu foʼou ʼa te kau pionie kātoa: ko te toko 66 ʼi Niu Kaletonia pea ko te toko 27 ʼi Vanuatu. Koia neʼe fakatuʼutuʼu ai te ʼu kalasi e lua ʼo te Ako ʼo Te Kau Pionie ʼi te ʼu motu ʼaia, ʼaki te tohi foʼou ʼa te kau pionie.
ʼE lahi te ʼu gāue ʼe fai moʼo faka mafola ia te logo lelei ʼi te ʼu telituale ʼo totatou filiale. Koia ko hahaʼi e toko 5 271 neʼe nātou kau ki te Fakamanatu ʼaē neʼe fai ʼi Niu Kaletonia, ko te toko 1 943 ʼi Vanuatu pea ko te toko 366 ʼi Uvea mo Futuna. Ko te kaugamālie ʼo te Fakamanatu neʼe laka tuʼa tolu age ʼi te kaugamālie ʼo te kau fai faka mafola. ʼI Niu Kaletonia, neʼe fai e te kau fai faka mafola ia te ʼu ako Tohi-Tapu e 2 000 ʼi te māhina fuli, mo ako Tohi-Tapu e 110 tupu ʼi Uvea mo Futuna pea ko ako Tohi-Tapu e 700 ʼi Vanuatu. ʼI tatatou filiale, ʼe momoli tuʼumaʼu pe kiai ia te ʼu tohi e te ʼu hahaʼi ʼe nātou kole ke fai hanatou ako Tohi-Tapu.
ʼE lahi te ʼu gāue ʼe lolotoga fai nei ʼi te Fale Fakatahi ʼaē ʼe tuʼu ʼi Normandie. Neʼe toe faʼu te ʼato pea ʼe lolotoga fetogi te ʼu pou ʼo te ʼu fakaheketālaʼā. Kae ʼe kei lahi te ʼu gāue ʼe tonu ke fai. ʼE lahi foki mo te ʼu kokelekasio ʼe nātou faiga mālohi moʼo taupau ke lelei tanatou ʼu fale tauhi. ʼI te taʼu ʼaenī, ʼe lahi te ʼu gāue ʼe fakatuʼutuʼu ʼo ʼuhiga mo te toe gaohi ʼo te ʼu fale fono ʼo Niu Kaletonia (ʼi Koumac, Voh, Pouembout, Montravel) pea mo Uvea. Koia ʼe ʼaoga ai ke tokolahi te kau gāue. Ko nātou fuli ʼaē ʼe feala ke nātou lagolago ki te ʼu Komite Laga Fale Fakakolo, ʼe fakaloto mālohiʼi nātou ke nātou tohi te pepa Construction des Salles du Royaume-Questionnaire pour les volontaires (S-82) pea ke nātou fakatoʼo age ki te sikalaipe ʼo te kokelekasio. ʼE fakamālo ʼaupito atu ki takotou lagolago ki te ʼu gāue ʼaia. ʼE mātou fia fakafetaʼi kiā nātou fuli ʼaē neʼe nātou fakaʼaogaʼi tonatou temi pea mo tonatou ʼu fealagia ʼi te ʼu taʼu kua ʼosi, ʼi te ʼu gāue ʼaē neʼe fai ʼi tatatou fale fakatahi pea mo te ʼu fale fono kehekehe ʼo totatou filiale.
ʼI Walkill, New York, ʼi Amelika, neʼe kaugamālie ʼaupito ia nātou ʼaē neʼe ʼolo ʼo mamata ki te tahi fale tā tohi kua laga. ʼI tana ʼuluaki ʼaʼahi, neʼe ʼui fēnei e te tuagaʼane kua finematuʼa: “Neʼe au fiafia ʼaupito ʼi taku mamata ki te fale ʼaia. ʼE lahi te ʼu meʼa ʼe au fakamatala anai ki te ʼu tēhina ʼo toku kokelekasio. Kapau ʼe tali lelei e Sehova, pea ʼe au toe fia liliu mai ʼi te taʼu fuli.”
ʼE fai he fakafetaʼi lahi ki te faʼafai ʼa te ʼu tēhina mo tuagaʼane moʼo fai ʼo te ʼu gāue fuli ʼaia. ʼE toe fakamālo ʼaupito atu ki te ʼu meʼa ʼofa ʼaē ʼe koutou foaki moʼo lagolago ki te gāue. (Taag. 3:9, 10) ʼOfa pe ke haga tapuakina e Sehova tatatou gāue ʼi te logo tahi, moʼo “tauhi ki te fakavikiviki ʼo tona kolōlia.”—Ef. 1:12, MN.
Tokotou ʼu tēhina,
Te Filiale ʼo Niu Kaletonia