Te Tohi Mai Te Filiale

Naʼi Tēhina Mo Tuagaʼane,

ʼE matou fia fakahā atu tomatou loto fakafetaʼi ʼo ʼuhiga mo te gāue ʼa te kau fai faka mafola fuli ʼaē ʼi Niu-Kaletonia nei, mo Vanuatu pea mo Te ʼu Motu ʼo ʼUvea mo Futuna, ʼi te taʼu gāue 2006 ʼaenī kua hili. Logolā ʼe mole heʼeki kātoa ia te ʼu tānaki gāue fuli ʼo te taʼu gāue ʼaia, kae ʼe lahi te ʼu ʼaluʼaga ʼe feala ke tou fiafia ai.

ʼI te ʼaho 12 ʼo ʼApelili 2006, ʼi te pō ʼo te ʼAho Fakamanatu, neʼe maʼu te tuputupu foʼou ʼo ʼuhiga mo te kaugamālie ʼaē neʼe kau ki te ʼaho ʼaia ʼi Niu-Kaletonia pea mo Vanuatu. ʼI Niu-Kaletonia, neʼe ko te toko 5 506 hahaʼi pea ʼi Vanuatu, neʼe ko te toko 2 534, ʼo hilifaki ki ai mo te toko 339 ʼaē ʼi ʼUvea pea mo Futuna. Ko te toko 8 379 hahaʼi ʼaia ʼe ko he tuputupu ʼi te 10 ki te teau mokā fakatatau ki te taʼu ʼaenī kua hili. Tokolahi neʼe natou tali ki te fakaloto mālohi ʼaē ke natou “fakatokatoka mo te Atua.” (2 Ko. 5:20) ʼI ʼApelili neʼe ko ako Tohi-Tapu e 3 130 ʼaē neʼe fai ʼi te ʼu fenua ʼaia e 3. ʼE feala ke fai he fakavikiviki kiā koutou ʼo ʼuhiga mo ko takotou haga tōkakaga aipe ki te hahaʼi maʼuhiga ʼaia.

Neʼe lahi te ʼu potu ʼi te mālamanei neʼe hoko ai te tahi ʼu tuʼutāmaki, pea neʼe ko he ʼu faigamālie ʼaia moʼo fakahā ia te ʼofa faka Kilisitiano moʼoni. ʼI Amelika, ko te tēhina neʼe tonu ke mavae ʼi tona ʼapi ʼuhi ko te Afā ʼaē ko Katrina, neʼe ina ʼui fēnei: “Neʼe mole matou toʼo he tahi age meʼa, gata pe ki tamatou ʼu mutuʼi meʼa ʼaē neʼe matou kofuʼi. Neʼe tokoni mai tomatou ʼu kaumeʼa, ʼo natou tali leleiʼi mātou pea mo natou loto ke matou nonofo mo nātou.”

Ko te toko 8 000 tupu ʼu tēhina mo tuagaʼane ʼaē ʼe natou gāue mo te ʼu Komite Laga Fale Fakakolo kehekehe e 60, neʼe natou foaki tonatou temi, mo tonatou poto, pea mo tonatou ʼu koloā moʼo tokoni ki te tuʼutāmaki ʼaia. Neʼe natou kau ki te toe gaohi ke lelei peʼe ko te toe laga ʼo te ʼu Fale ʼo te Puleʼaga e 86 pea mo te ʼu ʼapi e 4 178. ʼE tou loto fakafetaʼi ʼaupito ki tanatou gāue kinakina ʼaki te ʼofa!—1 Tes. 5:18.

ʼE matou ʼiloʼi ʼe kotou haga hūfakiʼi anai tatatou fale tautēhina ʼi te mālamanei kātoa, pea ʼe tapuakina anai e Sehova tatatou gāue ʼaē ko te fai ʼo ni ʼu tisipulo. ʼE fakamālo atu.

Tokotou ʼu tēhina,

Te Filiale ʼo Niu-Kaletonia