Koutou Haga Felagalagaʼaki
1 Ko te ʼapositolo ko Paulo neʼe ina fai ia meʼa fuli ʼaē neʼe ina fealagia, moʼo fakaloto mālohiʼi tona ʼu tēhina mo tuagaʼane. (Gaue 14:19-22) ʼO feiā mo tatou, ʼe tou fia tokagaʼi totatou ʼu tēhina ʼaē ʼe nātou felāveʼi mo ni ʼu faigataʼaʼia, pea mo tokoni kiā nātou. ʼE ʼui ʼi te Tohi-Tapu, ʼe mole ko he gāue pe ʼa te kau tagata ʼāfea, kae ʼe ko tatou fuli ʼaē ʼe tonu ke tou fetokoniʼaki. (Loma 15:1, 2) Tou vakaʼi te ʼu ʼaluʼaga e lua ʼe feala ai ke tou mulimuli ki te tokoni ʼofa ʼaenī: “Koutou haga fefakaloto fīmālieʼaki pea mo koutou felagalagaʼaki.”—1 Tes. 5:11, MN.
2 Tou Tokagaʼi Te ʼu Meʼa ʼAē ʼe ʼAoga Ki Niʼihi: ʼE ʼui ʼi te Folafola ʼa te ʼAtua, ko Tolokasi “neʼe lahi te ʼu gāue lelei pea mo te ʼu meʼa ʼofa neʼe ina fai ʼaki he lotolelei.” (Gaue 9:36, 39, MN ) Neʼe ina tokagaʼi ia nātou ʼaē neʼe faigataʼaʼia, pea neʼe ina fai he ʼu puleʼaki moʼo tokoni kiā nātou. Neʼe ina tuku mai he faʼifaʼitaki lelei kiā tatou! ʼE lagi koutou ʼiloʼi he tahi kua matuʼa ʼe ʼaoga ke ʼaumai ki te fono. Peʼe lagi ko he pionie ʼe mole hona kaugā fagona ke nā gāue ʼi he hili hoʼatā ʼo te vahaʼa. Kapau ʼe koutou sio ki he tahi ʼe nofo ʼi te faigataʼaʼia ʼaia pea mo koutou tokoni ki ai, ʼe mahino ia ʼe ko he fakaloto mālohi lahi anai kiā ia!
3 He ʼu Fai Palalau Ki He ʼu Meʼa Fakalaumālie: ʼE toe feala foki ke tou felagalagaʼaki ʼi tatatou ʼu fai palalau. (Ef. 4:29) Neʼe ʼui fēnei e te tagata ʼāfea kua fotufotuʼa ʼi te faʼahi fakalaumālie: “Kapau ʼe koutou fia fakaloto mālohiʼi he tahi, koutou palalau ki te ʼu meʼa fakalaumālie. Moʼo kamata he fai palalau ʼe fakaloto mālohi, ʼe feala hakotou fai ia te fehuʼi ʼaenī: ‘Neʼe ke ʼiloʼi feafeaʼi ia te moʼoni?’ ” Koutou ʼoʼofa ki te kau tūpulaga ʼaē ʼi te kokelekasio. Koutou ʼolo ʼo fai palalau mo nātou ʼaē ʼe lotovaivai pea mo nātou ʼaē ʼe lagi ʼumiuminoa. (Taag. 12:25) Koutou tōkakaga naʼa lahi fau takotou fai palalau mo tokotou ʼu tēhina mo tuagaʼane ki te ʼu meʼa fakamālama, kae siʼisiʼi takotou fai palalau ki te ʼu meʼa fakalaumālie.—Loma 1:11, 12.
4 Koteā te ʼu palalau ʼaē ʼe feala ke koutou fai moʼo lagalaga ʼo he tahi? ʼI takotou lau ia te Tohi-Tapu pea mo takotou ako takitokotahi, neʼe koutou maʼu ai koa he pelesepeto neʼe ina toe fakatuputupu ai tokotou loto fakafetaʼi kiā Sehova? Neʼe koutou maʼu koa he lotomālohi ʼi takotou logo ki he puani ʼi he akonaki ki te kaugamālie peʼe ʼi te Ako ʼo Te Tule Leʼo? Pe neʼe malave koa ki tokotou loto he fakamatala ʼe fakaloto mālohi ki takotou tui? Kapau ʼe maʼuhiga kiā koutou ia te ʼu koloā fakalaumālie ʼaia, pea ʼe ʼi ai tuʼumaʼu pe anai he ʼu manatu fakaloto mālohi ke koutou vaevae mo niʼihi.—Taag. 2:1; Luka 6:45.
5 ʼOfa pe ke tou felagalagaʼaki, ʼo tou foaki he tokoni ʼaoga pea mo fai he ʼu palalau ʼe fakapotopoto.—Taag. 12:18.