Tou Fai Te Meʼa ʼAē ʼe Lelei Pea Mo Tou Maʼuli Vaevae Mo Te Hahaʼi
1 Ko Talika ko te fafine “nee lahi ana gaue lelei mo tana faiofa.” (Gaue 9:36, 39) Neʼe ʼofainaʼi ia ia e Sehova ʼAtua ʼo feiā mo te hahaʼi ʼaē neʼe feʼiloʼiʼaki mo ia, he neʼe ko te fafine loto fia foaki. ʼE ʼui fēnei ia Hepeleo 13:16 (MN ): “ ʼAua naʼa galo iā koutou te fai ʼo te meʼa ʼaē ʼe lelei pea mo vaevae mo niʼihi, koteʼuhi ko te taʼi ʼu sākilifisio ʼaia ʼaē ʼe leleiʼia e te ʼAtua.” Ia ʼaho nei, koteā te ʼu meʼa lelei ʼaē ʼe tou lava fai ki te hahaʼi pea e feafeaʼi hatatou maʼuli vaevae mo nātou?
2 Moʼo fai te meʼa ʼaē ʼe lelei ki te hahaʼi, ʼe feala ke tou vaevae mo nātou totatou “ ʼu koloā.” (Taag. 3:9) ʼAki te ʼu meʼa ʼofa ʼaē ʼe tou foaki ki te gāue faka malamanei, ʼe feala ai ke laga ʼi te malamanei kātoa, he ʼu Fale ʼo Te Puleʼaga, mo he ʼu Fale ki te ʼu Fakatahi, pea mo he ʼu filiale. ʼAki tatatou loto fia foaki, kua feala ki te lauʼi miliona hahaʼi ke nātou logo ki te ʼu fakatotonu faka teokalatike pea mo nātou fakatahi ai mo tonatou ʼu tēhina mo tuagaʼane, ke feala ai hanatou lotomālohi.
3 Tou Fakaloto Fīmālie: Ka hoko he tuʼutāmaki, ko te hahaʼi ʼa Sehova ʼe nātou “fai ia te lelei” ki tonatou ʼu tēhina pea mo te hahaʼi ʼo te mālama. (Kal. 6:10) Hili te paʼulu ʼo te fale gāue ʼi Falani, neʼe ʼui fēnei e te taumātuʼa neʼe tuʼu ōvi tonā ʼapi ki te fale gāue: “ ʼI te temi pe ʼaia, neʼe ʼōmai tomā ʼu tēhina ʼo tokoni mai ki te fakamaʼa ʼo tomā kogafale pea mo te ʼu koga fale ʼo ʼihi hahaʼi ʼo te fale fata. Neʼe punamaʼuli ʼaupito tomā ʼu vahaʼa fale ʼi tanatou sisio ki te ʼōmai ʼa te hahaʼi tokolahi ʼo tokoni mai.” Neʼe toe ʼui fēnei e te tahi tuagaʼane: “Neʼe tokoni mai te kau tagata ʼāfea, pea neʼe nātou ʼōmai ʼo fakaloto mālohiʼi mātou. Neʼe maʼuhiga age kiā mātou tanatou ʼu tokoni ʼaia ʼi te ʼu tokoni faka koloā.”
4 Logola ʼe lahi te ʼu gāue lelei ʼe feala ke tou fai maʼa totatou ʼu vahaʼa fale, kae ko te tokoni ʼaē ʼe lelei ʼaupito ʼe ko te vaevae mo nātou ia te ʼatamai mālama maʼuhiga ʼo te moʼoni, ʼaē ʼe kau kiai “te falala ki te mauli heegata” ʼaē neʼe fakapapau mai e Sehova totonu. (Tito 1:1, 2) Ko te logo ʼaē ʼe tuʼu ʼi te Tohi-Tapu, ʼe ina foaki he fakaloto fīmālie moʼoni kiā nātou ʼaē ʼe mamahi ʼuhi ko te ʼu ʼaluʼaga ʼo te malamanei pea mo tonatou ʼuhiga agahala. (Mat. 5:4) ʼOfa pe ke tou fai te meʼa ʼaē ʼe lelei pea mo maʼuli vaevae mo te hahaʼi mo kapau ʼe tou lava fai ia te faʼahi ʼaia.—Taag. 3:27.