‘Koutou Agaʼofa Pea Mo Mauli Vaevae’
1 ʼI he ʼu sēkulō ki muʼa atu, neʼe fakatotonu e Paulo kia Timoteo ke ina fakaloto mālohiʼi tona ʼu tēhina mo tuagaʼane ke “natou gaue ki te lelei, mo fakakoloa natou i te u gaue lelei mo taulekaleka, ke lahi tanatou [agaʼofa] pea mo mauli vaevae.” (1 Tim. 6:18) Neʼe toe fakamanatuʼi e Paulo ki te kau Kilisitiano Hepeleo ke ʼaua naʼa nātou “galoi te fai o te mea e lelei pea mo te mauli vaevae.” (Hep. 13:16) He koʼe neʼe ina tohi te ʼu fakatotonu ʼaia? He neʼe ina ʼiloʼi ʼe maʼu anai “te kololia, te fakaapaapaʼia, mo te tokalelei: maʼa ia e ina fakahoko te lelei.”—Loma 2:10.
2 Ko meʼa fuli ʼe ʼa Sehova ʼAtua, he ko ia te Tupuʼaga. (Apk. 4:11) ʼE mahino ia ʼe tou fakafetaʼi ki te ʼu meʼa ʼaē ʼe ina fai maʼa tatou ʼaki te ʼu meʼa ʼaʼana. Logola te maʼuli galo ʼa te tokolahi ʼa te hahaʼi, kae ko te Māʼoluga ʼe ina haga tuku aipe te hahaʼi fuli ke nātou maʼu te ʼu meʼa lelei ʼaē ʼe ina foaki lahi mai moʼo taupau totatou maʼuli. (Mat. 5:45) Neʼe ina momoli mai mo tona ʼAlo ʼaē ʼe ʼofa mamahi ki ai, ke haʼu ʼo mate faka sakilifisio, ke feala hatatou maʼu te maʼuli heʼegata. Ko te taʼi ʼofa ʼaia, ʼe mole tonu koa la ke ina uga tatou ke tou loto fakafetaʼi, ʼo tou agaʼofa ki te hahaʼi?—2 Ko. 5:14, 15.
3 Koteā ʼAē ʼe Tou Lava Vaevae? ʼE tonu ke tou fakaʼaogaʼi te ʼu fealagia fuli ʼaē ʼe tou maʼu moʼo fai te ʼu meʼa ʼaē ʼe leleiʼia e te ʼAtua. ʼE tou fia lagolago anai ʼi te faʼahi fakasino pea mo te faʼahi fakalaumālie, ki te gāue faka malamanei ʼaē ʼe fai ʼo ʼuhiga mo te Puleʼaga. Ei, ko te logo lelei ʼe ko te koloā maʼuhiga tokotahi ʼaē ʼe tou lava foaki ki he tahi, heʼe “ko te Mafimafi o te Atua ki te fakamauli.” (Loma 1:16) Kapau ʼe tou fakaʼaogaʼi fakaʼofa ʼi te māhina fuli totatou temi pea mo tatatou ʼu fealagia moʼo fai faka mafola pea mo faiako, ʼe feala anai hatatou vaevae ki te hahaʼi te koloā fakalaumālie ʼaia, ke feala hanatou maʼu te maʼuli heʼegata.
4 ʼE fiafia ʼaupito ia Sehova mokā tou tokoni kia nātou ʼaē ʼe māsisiva. ʼE ina fakapapauʼi mai te ʼu tapuakina, pea ina toe fakamanatuʼi mai kia tatou: “Ko te ʼu koloā ʼe mole nātou ʼaoga anai ʼi te ʼaho ʼo te hāūhāū, kae ko te faitotonu ʼe ina hāofaki anai mai te mate.” (Taag. 11:4; 19:17) Ko te lagolago ki te gāue ʼo te Puleʼaga ʼaki takita ʼu koloā, pea mo takita kau katoa ki te faka mafola ʼo te logo lelei, ʼe ko te ʼu ʼaluʼaga taulekaleka ʼaia ʼaē ʼe feala moʼoni ai ke tou fakahā ʼe tou agaʼofa, pea ʼe tou fia vaevae mo te hahaʼi.