“Koutou Mahu ʼi Te ʼu Gāue Lelei”

¹ Lolotoga te ʼu taʼu fakaʼosi ʼaē neʼe gāue mālohi ai te ʼapositolo ko Paulo ʼi tana minisitelio, neʼe lahi te ʼu temi ʼaē neʼe gāue ai mo Timoteo pea mo Tito. Neʼe tatau te ʼu palalau fakaloto mālohi ʼaē neʼe ina tohi age kia nāua. Neʼe ina ʼui age kia Tito “ko nātou ʼaē kua tui ki te ʼAtua” ʼe tonu ke nātou “manatuʼi ʼo fai te ʼu gāue lelei.” (Tito 3:8, MN ) Neʼe ina ʼui age kia Timoteo ko nātou ʼaē ʼe falala ki te ʼAtua, ʼe tonu ke nātou “mahu ʼi te ʼu gāue lelei.” (1 Tim. 6:17, 18, MN ) ʼE ko he tokoni lelei ʼaupito ʼaia kia tatou fuli! Kae koteā ʼaē ka ina uga tatou ke tou fakahoko he ʼu gāue lelei ʼi totatou maʼuli? Pea koteā te ʼu gāue tāfito ʼaē ʼe feala ke tou fai ʼi te ʼu ʼaho ʼaē ka hoko mai?

² ʼE tou fia fai te ʼu gāue lelei heʼe tou tui pea mo ʼofa kia Sehova, pea ʼuhi ko te ʼamanaki taulekaleka ʼaē neʼe ina foaki mai kia tatou. (1 Tim. 6:19; Tito 2:11) Tāfito ʼi te temi ʼaia ʼo te taʼu, ʼe fakamanatuʼi mai ko Sehova neʼe ina momoli ifo tona ʼAlo ko Sesu ki te kele, ke feala hana faka lākatonuʼi tana Tāmai pea mo foaki te ala ki te maʼuli maʼa te hahaʼi fuli ʼaē ʼe nātou loto kiai. (Mat. 20:28; Soa. 3:16) ʼE fakamahino lelei anai te faʼahi ʼaia ʼi te toʼotoʼoga ʼo te Fakamanatu ʼo te mate ʼa Kilisito ʼi te ʼaho 28 ʼo Malesio. Moʼo tali ki te ʼamanaki ʼaia ke tou maʼu te maʼuli heʼegata, ʼe mole tou fia faiga mālohi koa la ke tou fai ia meʼa fuli ʼe tou lavaʼi moʼo “fai te ʼu gāue lelei”? Ei! Koteā te ʼu gāue ʼaē ʼe tou lava fai ʼi te temi nei?

³ Te ʼu Gāue Lelei Ki Malesio Pea Ki Muli Age: ʼE mahino ia, ʼe tou kau anai ki te Fakamanatu—te ʼaho maʼuhiga ʼaupito ʼo te taʼu, maʼa te kau Fakamoʼoni ʼa Sehova ʼi te malamanei katoa. (Luka 22:19) Kae ʼe tou fia vaevae te fiafia ʼo te toʼotoʼoga ʼaia mo he tokolahi ʼaupito. Koutou vakaʼi te tānaki gāue ʼi te Annuaire 2002 peʼe ʼi Te Tule Leʼo ʼo te ʼaho 1 ʼo Sanualio 2002, pea ʼe koutou sio anai ʼi te taʼu ʼaenī kua ʼosi, neʼe lahi te ʼu fenua ʼi te malamanei, neʼe tuʼa lahi age te hahaʼi ʼaē neʼe ʼōmai ki te Fakamanatu ʼi te lahi ʼa te kau fai faka mafola. ʼE mahino ia neʼe faiga mālohi te ʼu kokelekasio fuli, ke nātou tufa lahi te ʼu kiʼi pepa fakaafe ki te Fakamanatu ʼi tonatou telituale katoa. Koia ʼe tou fia fakaʼaogaʼi lahi totatou temi ʼi te temi nei ʼo aʼu ki te ʼaho 28 ʼo Malesio moʼo fakaafe te hahaʼi ki te Fakamanatu, pea mo tokoni kia nātou ke nātou ako te ʼamanaki ʼo ʼuhiga mo te hāofaki.

⁴ ʼI te māhina ʼo ʼApelili, ʼe ko he māhina lelei anai. E feafeaʼi hatatou fakaʼaogaʼi lelei te māhina ʼaia moʼo “fai te ʼu gāue lelei”? ʼE tonu ke tou kau fakafiafia ki te gāue ʼaē ko te faka mafola ʼo te logo lelei, ʼo tou “fai mālohi te ʼu gāue lelei.” (Tito 2:14, MN; Mat. 24:14) Kapau neʼe mole feala ke koutou pionie vaeluaʼi temi ʼi Malesio, ʼe feala koa ʼi ʼApelili, peʼe ko Maio? Kapau ʼe koutou pionie ʼi Malesio, pea ʼe feala koa hakotou hoko atu?

⁵ Ko ʼihi ʼaē ʼe gāue ʼi te mālama, ʼe nātou tokagaʼi ʼe feala ke nātou fakaʼaogaʼi he hola katoa peʼe laka atu, moʼo faka mafola mokā nātou ʼolo ki tanatou gāue, ʼo fagonogono ʼi te ala, peʼe nātou fagonogono ki te hahaʼi ʼaē ʼe gāue ʼi te ʼu fale koloā ʼaē ʼe ava māfoatā. Ko ʼihi ʼe nātou fakaʼaogaʼi he kiʼi temi ʼo tonatou temi kai moʼo fagonogono. Ko ʼihi neʼe nātou tokagaʼi ʼe feala ʼi te ʼu lakaga ʼaia ke fai he ako Tohi-Tapu mo hanatou kaugā gāue. Tokolahi te ʼu tuagaʼane ʼaē ʼe mole gāue, ʼe nātou fakaʼaogaʼi honatou temi moʼo faka mafola, ʼi te ʼu temi ʼaē ʼe ako ai tanatou fānau. ʼE ʼi ai ʼihi ʼaho ʼe nātou foimo ʼaʼala ake ʼi te uhu moʼo fai tanatou ʼu gāue ʼo te loto fale, pea ʼe nātou maʼu he temi loaloaga moʼo faka mafola pea mo fai he ʼu ako.—Ef. 5:15, 16.

⁶ Tatau aipe peʼe mole feala hakotou pionie vaeluaʼi temi, kae ʼe lagi feala hakotou fai he polokalama ʼa koutou takitokotahi ke koutou fakaʼaogaʼi lahi hokotou temi ki te minisitelio, ʼo koutou fai te ʼu meʼa fuli ʼaē ʼe koutou lavaʼi moʼo ‘fai te meʼa ʼaē ʼe lelei, moʼo fai he ʼu tuʼuga gāue lelei, mo agaʼofa, pea mo fia vaevae’ te moʼoni ki te hahaʼi.—1 Tim. 6:18.

⁷ Tou Manatuʼi Te Gāue Lelei ʼAē Ko Te Fai ʼo Ni ʼu Tisipulo: ʼI te taʼu fuli ʼe ʼi ai te ʼu hahaʼi fia logo ʼe nātou ʼōmai ki te Fakamanatu. ʼE feala koa ki ʼihi ʼi te kokelekasio ke nātou tokagaʼi te hahaʼi ʼaē ʼe ʼōmai ki te ʼaho ʼaia kae mole heʼeki fai hanatou ako? ʼE feala koa honatou ʼaʼahi moʼo tokoni kia nātou ke nātou tuputupu ʼi te faʼahi fakalaumālie? Ko ʼihi ʼaē ʼe ʼōmai ki te Fakamanatu ʼe lagi ko he ʼu famili ʼa te kau Fakamoʼoni. Ko ʼihi ʼe lagi ko he ʼu hahaʼi neʼe nātou ako ki muʼa atu, pea ʼe tonu ke fakaloto mālohiʼi ke nātou toe ako, pea mo ʼōmai tuʼumaʼu ki te ʼu fono. ʼE ko he meʼa fakafiafia anai hatatou sio ʼe nātou liliu ko he ʼu hahaʼi ʼe nātou gāue mo tatou ʼo tauhi kia Sehova!

⁸ Kapau ʼe tou kau lahi ki te minisitelio lolotoga te māhina ʼo Malesio pea mo te ʼu māhina ki muli age, ʼe mahino ia ʼe lahi anai te ʼu hahaʼi ʼaē ka tou maʼu, pea ʼe feala hatatou toe ʼaʼahi nātou. Koutou lagaʼi he fehuʼi, pea koutou fakapapau age ʼe koutou toe liliu mai anai moʼo tali kiai. Kapau ʼe tou fai feiā, pea ʼe ko he teuteu ʼaia ki he ʼaʼahi. ʼE lelei ʼaupito anai mo kapau ʼe tou foimo ʼolo ʼo fai te ʼaʼahi ʼaia. Kapau ʼi te ʼuluaki ʼaʼahi neʼe mole feala hatatou fai he ako, pea ʼe tou faigaʼi mālohi anai ke tou kamata te ako ʼaia ʼi te lua ʼaʼahi.

⁹ Kapau ʼe tou fagonogono ʼi te ala, pea tou faiga ke kamata ai he ʼu fai palalau mo te hahaʼi. ʼE lahi te kau fai faka mafola ʼi tanatou ʼu fagonogono ʼi te ala, neʼe tuku age kia nātou e te hahaʼi fia logo tonatou ʼu higoa, tonatou ʼu tuʼasila, pea mo tonatou numelo telefoni. Kapau ʼe ko he ʼu hahaʼi ʼe mole nonofo ʼi tokotou telituale, pea koutou toʼo te pepa Veuillez suivre lʼintérêt (S-43) ʼi te Fale ʼo Te Puleʼaga, ʼo koutou tohi pea mo ʼavage ki te sikalaipe ʼo te kokelekasio, pea ʼe ina momoli anai ki te kokelekasio ʼo te telituale ʼaē ʼe nonofo ai te ʼu hahaʼi ʼaia. Kapau ʼe mole lava fai te faʼahi ʼaia e te sikalaipe, pea ʼe ina tuku ki te filiale ke ina vakaʼi. Kapau ʼe fai feiā, pea ʼe hokohoko lelei anai te ʼaʼahi ʼo te ʼu hahaʼi ʼaia.

¹⁰ Kapau ʼe tuku atu e he tahi tona numelo telefoni kae mole ko tona tuʼasila, pea koutou fai te ʼaʼahi ʼi te telefoni. Koutou teuteuʼi fakatomuʼa te ʼu meʼa ʼaē ʼe koutou fia palalau kiai. Koutou nonofo mo te kiʼi tohi Te ʼu Fai Palalau Faka Tohi-Tapu ke feala hakotou foimo fakaʼaogaʼi. Ko ʼihi neʼe fua lelei te ʼu ako Tohi-Tapu ʼaē neʼe nātou fai mo te hahaʼi ʼi te telefoni, pea mo tanatou ʼu fai palalau mo te hahaʼi ʼaē neʼe faigataʼa te maʼu atu ki tonatou ʼapi. ʼI te fai faka mafola ʼi te ʼu ʼapi, neʼe kamata fakaʼui e te tuagaʼane te ʼu numelo telefoni ʼa te hahaʼi fafine ʼaē neʼe nātou fia logo, pea neʼe ina kamata ai te ʼu ako Tohi-Tapu e lua.

¹¹ Tou Lagolago Ki Te ʼu Tagata ʼĀfea Moʼo Tokoni Kia Nātou ʼAē ʼe Mole Kei Fai Faka Mafola: ʼE vakavakaʼi lelei e te kau tagata ʼāfea peʼe kua feafeaʼi ia nātou ʼaia. Ko ʼihi, neʼe nātou faiga mālohi pea kua nātou toe ʼōmai ki te ʼu fono ʼo te kokelekasio. Kua mahino kia nātou ʼe tonu ke nātou pipiki mālohi ki te kautahi ʼa Sehova, ke feala hanatou maʼu te puipui fakalaumālie ʼaē ʼe talanoa kiai ia Pesalemo 91. Ko ʼihi ia nātou ʼaia kua feala hanatou toe kau ki te fai faka mafola. Kapau ko nātou ʼaē ʼe mole kei fai faka mafola ʼe nātou kau ki te Fakamanatu ʼi te māhina ʼaenī, ʼe lagi nātou tali lelei anai ke fai hanatou ako Tohi-Tapu. Kapau koia ʼaia, pea ʼe fai anai e te kau tagata ʼāfea he ʼu fakatuʼutuʼu ke ʼalu he tahi ʼo fai he ako mo nātou ʼaē ʼe nātou loto kiai. Kapau ʼe kole atu ke koutou foaki te taʼi tokoni ʼaia, pea ʼe ko he meʼa lelei anai mo kapau ʼe koutou lava lagolago kiai.—Loma 15:1, 2.

¹² Tou “Fai Te ʼu Gāue Lelei”: Ko te tokolahi ʼo nātou ʼaē neʼe pionie vaeluaʼi temi ʼi he māhina peʼe lolotoga ni māhina, neʼe nātou fakatokagaʼi te lahi ʼo tanatou gāue faka mafola ʼi te ʼu māhina ʼaē neʼe hoa kiai. Neʼe nātou felāveʼi mo te ʼu hahaʼi ʼe nātou fia logo, pea neʼe nātou logoʼi ʼe tonu ke nātou toe ʼolo ʼo ʼaʼahi nātou. Neʼe uga ai nātou ke nātou fia faiga mālohi ke nātou faka mafola tuʼumaʼu, ke feala hanatou toe maʼu te hahaʼi ʼaē ʼe fia logo. Ko ʼihi neʼe nātou kamata te ʼu ako Tohi-Tapu, pea neʼe tokoni te faʼahi ʼaia ke lahi age tanatou kau ki te minisitelio.

¹³ Ko ʼihi neʼe nātou vakavakaʼi lelei te ʼu meʼa ʼaē ʼe maʼuhiga, he neʼe nātou fiafia ʼaupito ʼi tanatou faka mafola lahi, pea mo tanatou fai ʼo ni ʼu tisipulo. Ko ʼihi neʼe nātou fakasiʼisiʼi tanatou ʼu hola gāue ʼi te mālama, pea neʼe nātou fai hoholo tonatou pionie vaeluaʼi temi. Ko ʼihi kua nātou pionie katoa. Neʼe feala ai hanatou falala katoa ki te ʼAtua, kae mole nātou falala ki te ʼu meʼa ʼa te mālama. Neʼe nātou fakatokagaʼi ʼi tanatou fakahā te “agaʼofa, [te] lotolelei ki te vahevahe,” neʼe nātou maʼu ai he ʼu tapuakina mai ia Sehova, pea neʼe fakamālohiʼi ai tanatou ʼamanaki ki “te maʼuli moʼoni.” (1 Tim. 6:18, 19, MN ) Ei, kapau ʼe lahi ia nātou ʼaē ʼe nātou toʼo te selevisi pionie, pea ʼe tapuakina anai te kokelekasio katoa. ʼE fia fakamatala atu anai e te kau pionie tanatou ʼu gāue, pea mo fakaafe ʼihi ke nātou kaugā ʼolo mo nātou ki te minisitelio, pea ʼe fakatupu ai he felogoi fakalaumālie lelei ʼi te kokelekasio.

¹⁴ ʼOfa pe kia tatou fuli ke tou “mahu ʼi te ʼu gāue lelei” lolotoga te temi ʼo te Fakamanatu pea ki muli age, ʼo tou kau lahi ki te minisitelio faka Kilisitiano. Tou fakahā ʼe tou loto fakafetaʼi ki te ʼu meʼa ʼaē neʼe fai e Sehova maʼa tatou, ʼi tana foaki mai te ʼamanaki ʼo te maʼuli heʼegata ʼi he kele foʼou pea mo faitotonu.—2 Pet. 3:13.