“Tou Fai Ia Te Lelei Ki Te Tagata Fuape”
1 “Ke Fakakatoa Te Fagonogono o Te Folafola a Te Atua” pea “Koutou Mahu ʼi Te ʼu Gāue Lelei,” neʼe ko te ʼu kupu tāfito ʼaia ʼo te ʼu pepa neʼe ʼalutahi mo Te Minisitelio ʼo Te Puleʼaga ʼo Fepualio pea mo Malesio 2002. (Kol. 1:25; 1 Tim. 6:18) ʼI te ʼu alatike ʼaia neʼe fakaloto mālohiʼi tatou ke tou faiga mālohi moʼo tokoni ki te hahaʼi ʼaē neʼe fia logo ke nātou kau ki te ʼAho Fakamanatu, mo tokoni kia nātou ʼaē mole kei fai faka mafola ke nātou toe fakatahi mo te kokelekasio, pea mo tokoni ki tatatou ʼu fānau mo te kau ako Tohi-Tapu ʼaē kua feala ke nātou kamata faka mafola te logo lelei. ʼE mahino ia neʼe tou maʼu he ʼu fua lelei ʼi tatatou faiga ʼaia. ʼI te temi nei, “i tatatou kei mau te temi, tou [haga] fai ia te lelei ki te tagata fuape.”—Kal. 6:10.
2 Tou Fakaafe Nātou Ke Nātou Toe ’Ōmai: ʼI te telituale ʼo Niu Kaletonia, ko hahaʼi e toko fā afe ʼe nātou kau ʼi te taʼu fuli ki te ʼAho Fakamanatu, pea ʼe mole ko he ʼu kaugā fai faka mafola. Mai tona ʼaluʼaga ʼaē ko tanatou kau ki te ʼaho ʼaia ʼe fakahā ai tanatou fia logo, koia koteā ʼaē ʼe tonu ke tou fai moʼo uga nātou ʼaē ʼe “lotolelei ki te maʼuli heʼegata” ke nātou liliu “ ʼo tui.” (Gaue 13:48, MN ) Tou fakaloto mālohiʼi nātou ke nātou foimo ʼōmai ki te ʼu fono ʼo te kokelekasio.
3 He koʼe ʼe mole koutou fakaafe he tahi ʼe fia logo ke kau ki te Ako Tohi ʼo te kokelekasio, ke kau ai ki te fai palalau ʼo ʼuhiga mo te lea faka polofeta ʼo Isaia? Kapau ʼe ʼi ai hakotou kāiga peʼe ko he tahi ʼe koutou feʼiloʼiʼaki, pea kua fakatuʼutuʼu ke koutou fai hakotou kiʼi fai palalau ʼi te Ako ʼo Te Minisitelio Faka Teokalatike, ʼe feala ke koutou fakaafe ia ia ke haʼu pea mo fakalogo. Koutou fakahā age kia ia te ʼu kupu tāfito ʼo te ʼu akonaki ʼaē ʼe fai ʼi te vāhaʼa ka hoko mai. (ʼE tonu ke fakapipiki ʼi muli te polokalama ʼo te ʼu akonaki.) Koutou kumi te ʼu fealagia fuli ke koutou uga ia ia ke fia tauhi kia Sehova. Pea ʼe mahino ia, kapau mole heʼeki fai hana ako Tohi-Tapu, ʼe feala ke koutou fakaafe ke fai hana ako.
4 Tou Haga Fakaloto Mālohi Ia Nātou Mole Kei Fai Faka Mafola: Ko ʼihi ʼaē ʼe kau ki te ʼAho Fakamanatu kua nātou foaki tonatou maʼuli kia Sehova. Kae mole kei nātou faka mafola te logo lelei. Pea neʼe tokoni mai ia Paulo ke tou “fai ia te lelei ki te tagata fuape, kae tafito ia te lelei o te kaiga o te tui.” (Kal. 6:10) Koia ʼe tonu ke tou tokakaga tāfito kia nātou ʼaē mole kei fai faka mafola.
5 Neʼe lagi tali e ʼihi te fakaloto mālohi ʼa te kau tagata ʼāfea pea mo ʼihi atu ke nātou toe kau ki te minisitelio. Kapau neʼe hinoʼi koutou e te kau tagata ʼāfea ke koutou gāue mo he kaugā fagona kua toe kau ki te fai faka mafola, pea ʼe tonu ke koutou ʼiloʼi ʼe loto falala anai heʼe sio ʼe koutou ʼofa kia Sehova pea mo te fai faka mafola. Koutou fakahā age kia ia peʼe feafeaʼi takotou kau ki te ʼu faʼahi kehekehe ʼo te minisitelio, ke feala ke toe fiafia ai mo ia, ke ina haga hoko atu te gāue fai faka mafola, pea ke ina maʼu te ʼu tapuakina mai ia Sehova.
6 Foaki He Kamata ʼe Lelei Ki Te ʼu Kaugā Fagona Foʼou: Ko te fafine neʼe fia logo pea ʼi te temi ʼaē neʼe mahino ai kia ia kua ina maʼu te kautahi moʼoni ʼa te ʼAtua, neʼe fia fai faka mafola atu aipe. ʼI tana ʼosi ʼiloʼi te ʼu meʼa ʼaē neʼe tonu ke ina fai, neʼe ina ʼui fēnei: “ ʼE ʼau fia kamata neinei.” Kapau ko he tahi ʼe ina ako mo koutou te Tohi-Tapu, pea kua feala ʼi te temi nei ke kamata fai faka mafola, koutou tokoni kia ia ke mahino ki te ʼaoga ʼaē ke “kamata neinei,” pea koutou foaki he kamata ʼe lelei ki te kaugā fagona foʼou ʼaia. Koutou tokoni kia ia ke liliu ko he meʼa māhani tana teuteu, pea mo tana kau ʼi te vāhaʼa fuli ki te fai faka mafola.
7 Kapau ko takotou tamasiʼi ʼaē neʼe liliu ko he kaugā fagona foʼou, pea koutou gāue mo ia ke tuputupu ʼo mulimuli ki tona taʼu pea mo te ʼu meʼa ʼe ina lavaʼi. Kapau ʼe koutou fai he kiʼi tokoni veliveli kia ia, pea ʼe feala ke koutou punamaʼuli ki tana lava kamata fai palalau mo he tahi, tana lau he vaega ʼi te Tohi-Tapu, pea mo tuku he tohi. Kapau ʼe ʼi ai hana ʼu ʼaʼahi, koutou akoako kia ia tona fai pea ke ina fai tuʼumaʼu tana ʼu ʼaʼahi ʼaia.
8 Fakalahi Takotou Fai Faka Mafola: ʼE feala koa ke lahi age takotou kau ki te gāue fai faka mafola, tatau aipe peʼe kua hili te ʼAho Fakamanatu? ʼE feala koa ʼi te vāhaʼa fuli, ke koutou hilifaki he hola e tahi peʼe lua ki te ʼu hola māhani ʼaē ʼe koutou fai faka mafola ai? Kua koutou vakaʼi fakatomuʼa koa ʼi te kaletalio pe ko ʼafea ʼaē ʼe feala ai ke koutou toe pionie vaeluaʼi temi? Peʼe feala koa ke koutou fakatuʼutuʼu ʼi tokotou maʼuli ke koutou toʼo te pionie katoa? Ko takotou ʼu faiga mālohi ʼi te minisitelio, ʼe lava tokoni ki he tahi ke ina tali te moʼoni! (Gaue 8:26-39) Tou fakakaukauʼi te ʼu ʼaho ʼaē ka hoko mai, ʼo tou “haga fai te meʼa ʼaē ʼe lelei kia tatou fuli pea mo te hahaʼi fuape.”—1 Tes. 5:15, MN.
[Talanoa ʼo te pasina 3]
Tou Haga Tokoni:
□✔ Kia nātou ʼaē neʼe kau ki te ʼAho Fakamanatu
□✔ Kia nātou ʼaē kua toe fai faka mafola
□✔ Kia nātou ʼaē ko te ʼu kaugā fagona foʼou