Koutou Tala Te Kolōlia ʼo Sehova
1 Neʼe ʼui fēnei e te tagata fai pesalemo: “Koutou hiva kiā Sehova, ia koutou fuli ʼo te kele. . . . Koutou kalagaʼi tona kolōlia ʼi te lotolotoiga ʼo te ʼu puleʼaga, pea mo tana ʼu gāue fakaofoofo ʼi te lotolotoiga ʼo te hahaʼi fuli.” Ka tou fakakaukauʼi te ʼu meʼa ʼaē kua fai e Sehova maʼa tatou, mo te ʼu meʼa ʼaē ʼe ina fai ʼi te temi nei, pea mo ʼaē ka ina fai anai ʼi te temi ka haʼu, ko totatou loto ʼe ina uga tatou ke tou tala tona kolōlia!—Pes. 96:1, 3.
2 ʼI Tatatou Minisitelio: ʼE ko he pilivilesio ki te kau Fakamoʼoni ʼa Sehova hanatou faka maʼuhigaʼi te huafa ʼo te ʼAtua, pea mo nātou fakavikiviki kiā te ia iā muʼa ʼo te kaugamālie, ʼi te kele kātoa. (Mala. 1:11) ʼE mole hage ko te kau takitaki lotu ʼo te Keletiate, ʼaē ʼe nātou pātapāta ʼo molehi ia te huafa ʼo te ʼAtua ʼi tanatou ʼu fakaliliu Tohi-Tapu! ʼE maʼuhiga ʼaupito ke tou kalagaʼi ia te huafa ʼo te ʼAtua, heʼe maʼua ki te hahaʼi ke nātou fetapā ʼaki te tui ki te huafa ʼo Sehova ke feala honatou hāofaki ʼi te mamahi lahi ʼaē ka hoko mai. (Loma 10:13-15) Tahi ʼaē meʼa, ko te tokalelei ʼo te ʼatulaulau, ʼo kau kiai mo te tokalelei ʼo te malamanei, ʼe fakalogo ki te tāpuhā ʼo te huafa ʼo te ʼAtua. Ei, ko te ʼu gāue fuli ʼa te ʼAtua, ʼe pipiki ki tona huafa.
3 “Ko Sehova ʼe lahi pea ʼe tonu ke tou fakavikiviki ʼaupito kiā te ia.” Kae ke feala ki te hahaʼi ke nātou “foaki kiā Sehova te kolōlia ʼaē ʼe maʼu e tona huafa,” ʼe tonu ke nātou ʼiloʼi te moʼoni ʼo ʼuhiga mo ia. (Pes. 96:4, 8) Kae ko ʼihi ʼe nātou fakafisi ki te maʼuli moʼoni ʼa te ʼAtua. (Pes. 14:1) Ko ʼihi ʼe nātou moamoagaʼi ia ia, ʼo nātou ʼui ʼe mole mālohi, peʼe nātou ʼui ʼe mole tokaga ia ki te ʼu ʼaluʼaga ʼo te malamanei. ʼE tou faka kolōlia anai kiā Sehova, ʼi tatatou tokoni ki te hahaʼi ʼaē ʼe totonu ʼonatou loto, ke nātou maʼu te ʼatamai mālama ʼo ʼuhiga mo totatou Tupuʼaga, mo tana ʼu fakatuʼutuʼu, pea mo tona ʼulugaaga fakatalakitupua.
4 ʼAki Tatatou Aga: ʼE ko he meʼa fakafiafia kiā Sehova mo kapau ʼe tou maʼuliʼi tana ʼu lēkula faitotonu. ʼE tokagaʼi e te hahaʼi tatatou aga ʼaē ʼe lelei. (1 Pet. 2:12) Ohage la, ʼe feala ke vikiʼi tatou e te hahaʼi ʼuhi ko tatatou teuteu lelei pea mo teu maʼa, pea ʼe ko he faigamālie ʼaia ke tou palalau ʼo ʼuhiga mo te ʼu fua lelei ʼo te maʼuliʼi ia te ʼu pelesepeto ʼaē ʼe tuʼu ʼi te Folafola ʼa te ʼAtua. (1 Tim. 2:9, 10) ʼI meʼa fakafiafia kiā tatou mokā ‘sio ia te hahaʼi ki tatatou ʼu gāue matalelei pea mo nātou faka kolōlia ki tatatou Tāmai ʼaē ʼi selo’!—Mat. 5:16.
5 ʼAki tatatou ʼu palalau pea mo ʼatatou aga, tou fakavikiviki ʼi te ʼaho fuli ki totatou ʼAtua fakatalakitupua, ʼo tou tali ki te kalaga fakafiafia ʼaenī: “Koutou hiva kiā Sehova, koutou fakavikiviki tona huafa. ʼI te ʼaho fuli pe koutou fakahā te logo lelei ʼo tana hāofaki.”—Pes. 96:2.