Te ʼu Meʼa ʼAē ʼe Hoko Mokā Tou Fakahoko Tatatou Minisitelio
1. ʼE faka ʼuhiga feafeaʼi e Sehova tatatou minisitelio, pea ʼe tali feafeaʼi e te hahaʼi?
1 ʼE fakatātā ʼi te Folafola ʼa te ʼAtua, ia te kau Kilisitiano ki he ʼu hahaʼi ʼe nātou haʼele mālo ʼi te tauhi kiā Sehova. (2 Ko. 2:14-16) ʼI tatatou fagonogono ia te ʼatamai mālama ʼo ʼuhiga mo te ʼAtua, ko tatatou fakavikiviki ʼaia ʼi te minisitelio ʼe hage ko he ʼisesō magoni kiā Sehova. Ko ʼihi ʼe nātou leleiʼia te magoni ʼo te logo lelei, kae ko ʼihi ʼe nātou fakafisi kiai. Kae ko te fakafisi ʼa te tokolahi, ʼe mole faka ʼuhiga leva ʼe mole fua lelei tatatou gāue. Koʼeni te meʼa’ aē ʼe hoko mokā tou fakahoko tatatou minisitelio.
2. Koteā te faigamālie ʼaē ʼe tou maʼu ʼaki te minisitelio?
2 Ko He Fakavikiviki Kiā Sehova: ʼE ʼui e Satana ko te hahaʼi ʼe nātou tauhi kiā Sehova heʼe ʼi ai te ʼu meʼa ʼe nātou loto kiai. (Sopo 1:9-11) ʼAki te minisitelio faka Kilisitiano, ʼe tou maʼu ai te faigamālie ʼaē ke tou fakahā ʼe tou tauhi ki te ʼAtua heʼe tou ʼoʼofa moʼoni kiā te ia. ʼE lahi te kau fai faka mafola ʼe nātou haga mulimuli ki te fakatotonu ʼaē ke ʼolo ʼo fai faka mafola pea mo fai ʼo ni ʼu tisipulo, logola te ʼu ʼaluʼaga faigataʼa peʼe ko te mole fia logo ʼa te hahaʼi. Ko te taʼi faʼa kātaki agatonu ʼaia ʼe ina fakafiafia te loto ʼo Sehova.—Taag. 27:11.
3. He koʼe ʼe maʼuhiga ʼaupito kiā tatou ke tou haga fakaʼiloʼilo te huafa ʼo te ʼAtua pea mo tona finegalo?
3 ʼE toe maʼuhiga te minisitelio moʼo fakahoko ia te finegalo ʼo te ʼAtua. ʼO ʼuhiga mo te fakaʼauha ʼaē ʼe ʼamanaki hoko ki te mālama ʼa Satana, ʼe ʼui fēnei e Sehova: “ ʼE tonu anai ke ʼiloʼi e te ʼu puleʼaga ko au ia Sehova.” (Esk. 39:7) Ke feala ki te ʼu puleʼaga ke nātou ʼiloʼi ia te faʼahi ʼaia, ʼe maʼua ki te ʼu kaugana ʼa te ʼAtua ke nātou haga fakaʼiloʼilo tona huafa pea mo tona finegalo ki “te puleʼaga kehekehe, te telepi kehekehe, te lea kehekehe pea mo te hahaʼi kehekehe.”—Apk. 14:6, 7, MN.
4. He koʼe ko te gāue fai faka mafola ʼe ko he fakatafitoʼaga ki te fai fakamāu?
4 Ko He Fakatafitoʼaga Ki Te Fai Fakamāu: Ko te faka mafola ʼo te logo lelei ʼe toe maʼuhiga heʼe ko he fakatafitoʼaga ʼaia ki te fai fakamāu. Neʼe ʼui e te ʼapositolo ko Paulo, ko Kilisito Sesu ʼe ina fakahoko anai te lagavaka “kia natou e mole natou iloi te Atua, pea mo natou e mole fakalogo ki te Evaselio o totatou Aliki ko Sesu.” (2 Tes. 1:8, 9) ʼE fakamāuʼi anai te hahaʼi ʼo mulimuli ki tanatou faʼahiga tali ia te logo lelei. Koia ʼe ko he maʼua maʼuhiga ʼaē ʼe tonu ke fakahoko e te ʼu kaugana ʼa te ʼAtua. Ke ʼaua naʼa tou kau ʼi he ligitoto, ʼe tonu ke tou haga fakaʼiloʼilo ia te logo ʼo te Puleʼaga, ʼaē ka ina hāofaki anai ia te hahaʼi.—Gaue 20:26, 27.
5. ʼE ʼiloga feafeaʼi te manavaʼofa ʼo te ʼAtua ʼi tatatou minisitelio?
5 Ko tatatou faiga ʼaē ke tou tokoni ki te hahaʼi ke hāofaki nātou e te ʼAtua, ʼe ko he fakaʼiloga ʼaia ʼo te manavaʼofa ʼo Sehova. (1 Tim. 2:3, 4) ʼE tou ʼiloʼi ko te maʼuli ʼo te hahaʼi ʼe fetofetogi tuʼumaʼu, koia ʼaē ʼe tou ʼolo putuputu ai ʼo uga nātou ke nātou kumi ia Sehova heʼe kei maʼu te temi. ʼI tatatou fai ia te gāue ʼaia, ʼe ʼiloga ai “te manavaʼofa ʼo totatou ʼAtua,” ʼaē ʼe “mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.”—Luka 1:78, MN; 2 Pet. 3:9, MN.
6. Koteā tona fua lelei kiā tatou ia te selevisi ʼaē kiā Sehova?
6 Tona Fua Lelei Kiā Tatou: Kapau ʼe tou maʼumaʼua ʼi te selevisi kiā Sehova, pea ʼe ko he puipuiʼaga kiā tatou. ʼE tokoni mai te gāue ʼaia ke tou haga ‘manatuʼi ʼe hoko mai anai te ʼaho ʼo Sehova,’ pea ke ʼaua naʼa ʼulihi tatou e te mālama agakovi ʼaenī. (2 Pet. 3:11-14; Tito 2:11, 12) ʼOfa pe ke tou “mālolohi, tāʼofi maʼu, ke lahi tuʼumaʼu [tatatou] ʼu gāue ʼi te ʼAliki,” heʼe tou ʼiloʼi ʼe mole ʼalunoa tatatou ʼu faiga ʼi te minisitelio faka Kilisitiano.—1 Ko. 15:58, MN.