ʼAua Naʼa Tou Gāue Fakatotoho!
1 Neʼe ʼiloʼi e Sesu ʼe faka tuʼakoi te temi ʼaē neʼe tuku age e tana Tāmai moʼo fakahoko ʼo tana gāue ʼi te kele. (Soa. 9:4) Koia, neʼe mole gāue fakatotoho ʼi tana minisitelio, pea neʼe ina akoʼi tana ʼu tisipulo ke nātou gāue ohage ko ia. (Luka 4:42-44; 8:1; 10:2-4) Neʼe mole takimuʼa kiā ia te ʼu koloā. (Mat. 8:20) ʼI tana fai ia te faʼahi ʼaia, neʼe feala ai hana fakaʼosi ia te gāue ʼaē neʼe tuku age e tana Tāmai.—Soa. 17:4.
2 ʼE Faka Tuʼakoi Te Temi: ʼE toe faka tuʼakoi te temi ʼaē ʼe tonu ke faka mafola ai te logo lelei ki “te kelekele katoa.” (Mat. 24:14) ʼE fakahā ʼi te ʼu lea faka polofeta ʼo te Tohi-Tapu, ʼe tou maʼuʼuli ʼi te ʼu temi fakaʼosi. Mole kei tuai, pea ko “nātou ʼaē ʼe mole nātou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu . . . ʼe hoko anai kiā nātou ia te fakatūʼa ʼaē neʼe fai ʼi te fakamāu, te fakaʼauha heʼegata.” (2 Tes. 1:6-9, MN ) ʼE hoko fakapunamaʼuli anai te fakamāu ʼaia. (Luka 21:34, 35; 1 Tes. 5:2, 3) Koia ʼe tonu ai ke tou tala ki te hahaʼi te tuʼutāmaki ʼaē ʼe feala ke hoko kiā nātou. ʼE ko totatou maʼua, heʼe kei maʼu te temi, ke tou tokoni ki te hahaʼi ʼaia ke nātou kumi ia Sehova ke ina hāofaki ia nātou.—Sofo. 2:2, 3.
3 Tou Fai Ia Meʼa Fuli ʼAē ʼe Feala Ke Tou Fai: Ko te kau kaugana ʼa te ʼAtua ʼe nātou fakamuʼamuʼa ia te gāue fai faka mafola, heʼe nātou ʼiloʼi “kua nounou te temi.” (1 Ko. 7:29-31, MN; Mat. 6:33) Ko ʼihi moʼo fakalahi ʼo tanatou minisitelio, neʼe nātou fakafisi ki he ʼu gāue neʼe feala ke nātou maʼu paʼaga ai, peʼe ko he ʼu meʼa neʼe nātou manako ai. (Mko. 10:29, 30) Ko ʼihi ʼe kei ‘lahi tuʼumaʼu tanatou ʼu gāue ʼi te ʼAliki’ logola tanatou kātakiʼi te ʼu faigataʼaʼia. (1 Ko. 15:58) Tokolahi ʼe nātou tala ia te logo lelei ki te hahaʼi talu mai ni ʼu taʼu, pea neʼe mole nātou lotolotolua ʼi he temi. (Hep. 10:23) ʼE maʼuhiga ʼaupito kiā Sehova ia te ʼu sakilifisio fuli ʼaia ʼaē ʼe fai moʼo lagolago ki te ʼu gāue ʼo te Puleʼaga.—Hep. 6:10.
4 Kapau ʼe takimuʼa ʼi totatou maʼuli ia te tauhi kiā Sehova, ʼaē ʼe kau kiai te gāue fai faka mafola, pea ʼe feala anai hatatou manatuʼi tuʼumaʼu te ʼaho ʼo Sehova. ʼE ko he puipui ʼaia ʼo tatou ke ʼaua naʼa tou higa ʼi te mālama ʼa Satana pea ke mālohi tatatou fakatotonu ʼaē ke tou taupau ke maʼa tatatou ʼu aga. (2 Pet. 3:11-14) Koia kapau ʼe mole tou gāue fakatotoho ʼi tatatou minisitelio, pea ʼe feala ai ke hāofaki ia tatou pea mo nātou ʼaē ʼe fakalogo mai kiā tatou.—1 Tim. 4:16.