ʼE Feala Koa Ki Takotou Tamasiʼi Ke Ina Fai He ʼu Tonu ʼe Lelei?
1. Koteā te tonu ʼaē ʼe fakamaʼua ki te kau Fakamoʼoni tūpulaga ʼo ʼuhiga mo te fakaʼaogaʼi ʼo te toto? Koutou tuku mai he faʼifaʼitaki.
1 Ko he tonu ʼe lelei ʼo ʼuhiga mo teā? ʼO ʼuhiga mo te ʼu huki toto. Ohage ko tona fakahā ʼi te alatike “Marchons selon les instructions de Jéhovah,” (Tou haʼele ʼo mulimuli ki te ʼu fakatotonu ʼa Sehova) ʼo Te Tule Leʼo Fakafalani ʼo te ʼaho 15 ʼo Sūnio 1991, ʼe tonu ki te fānau ʼa te kau Fakamoʼoni ʼa Sehova ke nātou fakahā fakahagatonu tanatou fia fakalogo ʼaē ki te lao ʼa te ʼAtua ʼo ʼuhiga mo te fakaʼaogaʼi ʼo te toto, heʼe maʼuhiga te faʼahi ʼaia kiā nātou ohage pe ko tona maʼuhiga ʼaē ki tanatou ʼu mātuʼa. ʼE feala koa ke fakamaʼua ia te faʼahi ʼaia ki takotou tamasiʼi?
2. Koteā te lao ʼaē neʼe fai e te telepinale ʼo ʼuhiga mo te finemui neʼe fakafisi ki te ʼu foʼi huki toto, pea koteā te ako ʼe lava tāʼofi ai e te ʼu mātuʼa Kilisitiano pea mo tanatou ʼu fānau ʼaē ʼe mole heʼeki taʼu 18?
2 Koteā Koa ʼAē ʼe ʼUi e Te Lao? ʼI Amelika, neʼe ko te Telepinale Lahi ʼo Illinois ʼaē neʼe ina fakagafua ki he tamasiʼi ʼe mole heʼeki taʼu 18, ke fakafisi ki te ʼu foʼi huki toto. ʼI tana toe vakaʼi te ʼaluʼaga ʼo te kiʼi tuagaʼane ʼe taʼu 17, neʼe fakatotonu fēnei e te telepinale: “Kapau ʼe ʼiloga ʼi te tamasiʼi pea mo ʼiloʼi papau kua fakapotopoto ohage ko te hahaʼi lalahi ke ina tali te ʼu ikuʼaga ʼo tana ʼu tonu, pea ʼe fakagafua e te lao ki te kiʼi finemui ke ina tali peʼe ina fakafisi ki te ʼu faitoʼo ʼaē ʼe fai age kiā ia.” Neʼe muliʼi te fakatuʼutuʼu ʼaia e ʼihi fenua. ʼI totatou fenua, ko te lao ʼaē ʼo ʼuhiga mo nātou ʼaē ʼe mole heʼeki taʼu 18 kae kua feala ke nātou fai he tonu, ʼe mole heʼeki vote ia. Kae “ ʼe kumi tuʼumaʼu te fakagafua kiā nātou ʼaia . . . tāfito la mo kapau ʼe feala ke nātou fakahā tonatou loto pea mo kau ki te fai ʼaē ʼo te tonu.” (Code de la santé publique, article L. 1111-4, applicable outre-mer par lʼordonnance n° 2003-166 ʼo te ʼaho 27 ʼo Fepualio 2003) Koia, ke ʼiloʼi e te kau tōketā pea mo te ʼu hahaʼi ʼo te puleʼaga peʼe kua feala ki he tamasiʼi ke ina fai hana tonu e ia totonu, ʼe feala hanatou fakafehufehuʼi ia ia ke nātou logo tonu ki tana fakamahino ia te tupuʼaga ʼo tana fakafisi ki te foʼi huki toto. ʼE tonu anai ke mahino lelei ki te tūpulaga ko tona mahaki ʼe kovi, pea mo te ʼu ikuʼaga ʼo te ʼu faitoʼo ʼaē ʼe ina tali ke fai age, pea mo ina fakamahinohino te ʼu moʼoni ʼaē ʼe tui kiai ʼi te lao ʼa te ʼAtua.
3. Ko te ʼu fehuʼi fea ʼaē ʼe tonu ke vakavakaʼi fakalelei e te ʼu mātuʼa, pea koteā tona tupuʼaga?
3 Koteā Anai Te ʼu Palalau ʼAē Ka Fai e Takotou Tamasiʼi? ʼE feala koa ki takotou ʼu fānau ke nātou fakamahino tanatou manatu ʼo ʼuhiga mo te faʼahi ʼaia? ʼE nātou tui moʼoni koa ʼaki tonatou loto kātoa ki te fakatotonu fakaʼatua ʼaē ke ‘nātou fakafisi ki te toto’? (Gaue 15:29; 21:25) ʼE feala koa hanatou fakamahino ʼaki ia te Tohi-Tapu, ia te ʼu moʼoni ʼaē ʼe nātou tui kiai? Kapau ʼe feala ke nātou mamate pea ʼe fia fai e te ʼu tōketā honatou ʼu foʼi huki toto, ʼe nātou lototoʼa anai koa ʼo fakahā fakahagatonu tanatou fakafeagai ki te foʼi huki toto heʼe pupuli tanatou ʼu mātuʼa? Mai tona ʼaluʼaga ʼaē ʼe hoko kiā tatou fuli ia “te ʼu temi pea mo te ʼu meʼa fakafokifā”, e feafeaʼi hakotou teuteuʼi fakatomuʼa ia takotou fānau ki he ʼu fihifihia ʼe nātou lava maumauʼi ai fakapunamaʼuli tanatou agatonu?—Tnk. 9:11; Ef. 6:4.
4, 5. (a) Koteā te maʼua ʼo te ʼu mātuʼa, pea ʼe nātou lava fakahoko feafeaʼi? (b) Koteā te ʼu meʼa gāue ʼaē ʼe lava fakaʼaogaʼi e te ʼu mātuʼa moʼo tokoni ki tanatou fānau?
4 ʼU Mātuʼa, Koteā Te Meʼa ʼe Koutou Lava Fai? Ko tokotou maʼua ke koutou akoʼi ki takotou fānau te ʼu fakatuʼutuʼu ʼa te ʼAtua ʼo ʼuhiga mo toto. (2 Tim. 3:14, 15) ʼI te pasina 359 ki te 364 ʼo te tohi Raisonner, ʼe koutou maʼu anai te ʼu fakamatala ki te faʼahi ʼaia. Koutou ako fakatahi te faʼahi ʼaia mo tokotou famili. Koutou vakaʼi te manatu ʼaē ʼe tuʼu ʼi te kupu tāfito “Kapau ʼe ʼUi Atu e He Tahi—” ʼi te pasina 362 ki te 364, koutou faʼifaʼitakiʼi mo takotouʼu fānau he ʼu ʼaluʼaga ʼe lava hoko anai, pea ʼe tokoni anai kiā nātou ke nātou faiva ʼi te fakamahino ʼo te ʼu meʼa ʼaē ʼe nātou tui kiai pea he koʼe ʼe nātou tui kiai. (1 Pet. 3:15) ʼE tou maʼu te tahi ʼu tokoni moʼo akoʼi ʼo tatou ʼo ʼuhiga mo te toto, ʼi te kaupepa lahi Comment le sang peut-il vous sauver la vie? pea mo Te Tule Leʼo ʼo te ʼaho 15 ʼo Sūnio 2004 ʼi te pasina 14 ki te 24. ʼE ʼi ai mo te ʼu foʼi ʼata viteo Soigner sans transfusion : besoins et droits du patient, pea mo te foʼi ʼata Pas de sang : la médecine relève le défi, ʼaē ʼe tou maʼu ʼi te DVD ko tona kupu tāfito Des alternatives à la transfusion—Documentaires. ʼE fakahā ʼi te ʼu ʼata ʼaia te fakapotopoto pea mo te ʼaoga ʼaē ke mole fakaʼaogaʼi te toto ʼi te ʼu faitoʼo ʼaē ʼe fai ki te kau māhahaki pea mo tonatou tafa. Kua sioʼi koa e tokotou famili ia te ʼu foʼi ʼata ʼaia pea mo koutou fai palalau kiai?
5 Koutou tokoni ki takotou ʼu fānau ‘ke feala hanatou ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.’ Pea ʼe feala ai hana fai he ʼu tonu ʼe lelei pea mo maʼu te tapuakina ʼa Sehova.—Loma 12:2.