Koutou “Muli Tuʼumaʼu Iā Te Au”
1 Tokolahi ʼe nātou tōkakaga tāfito ki te fakafiafia ʼo tonatou maʼuli, kae ʼi te agamāhani ʼi tona fakaʼosi age, ʼe mole nātou fiafia. Kae neʼe ʼui e Sesu ʼe kita maʼu te fiafia moʼoni mo kapau ʼe kita foaki ʼaki he loto kātoa. (Gaue 20:35) Neʼe ʼui maʼana: “Kapau ʼe fia muli mai he tahi iā te au, ke fakafisi ia kiā ia totonu . . . pea ke muli tuʼumaʼu iā te au.” (Mko. 8:34, MN ) Mole ko tona faka ʼuhiga pe ke tou fakafisi ʼi ʼihi temi ki he ʼu fakafiafia. Ko tona faka ʼuhiga ke kita maʼuli ʼi te ʼaho fuli pe moʼo fakafiafia ia Sehova kae mole ko tatou totonu.—Loma 14:8; 15:3.
2 Tou vakaʼi te faʼifaʼitaki ʼa te ʼapositolo ko Paulo. ʼUhi ko te “ ʼuhiga māʼoluga ʼo te ʼatamai mālama ʼo ʼuhiga mo Kilisito Sesu,” neʼe mole kei faiga ia Paulo ki he ʼu meʼa maʼana, kae neʼe faʼafai moʼo fakatuputupu ʼo te ʼu gāue ʼo te Puleʼaga. (Filp. 3:7, 8, MN ) Neʼe ina ʼui fēnei: “Kiā au, ʼe au foaki kātoa anai ʼaki he lotolelei, pea ʼe au foaki kātoa anai ia au” moʼo tauhi te hahaʼi. (2 Ko. 12:15, MN ) ʼE tonu ke tou tahi fai te ʼu fehuʼi ʼaenī: ‘ ʼE au fakaʼaogaʼi feafeaʼi toku temi, toku mālohi, pea mo toku ʼu koloā? ʼE au tokaga tāfito koa kiā au, peʼe au fia fakafiafia koa ia Sehova?’
3 Ko He ʼu Faigamālie Ke Kita Foaki: ʼI te taʼu fuli, ʼe fakaʼaogaʼi e te hahaʼi ʼa te ʼAtua he ʼu hola e tahi miliale tupu moʼo faka mafola ia te Puleʼaga ke feala he hāofaki ʼo te hahaʼi. ʼI te kokelekasio, ko te kau tūpulaga pea mo te kau mātuʼa ʼe nātou fai ia te ʼu gāue kehekehe ʼe ʼaoga ki te hahaʼi. ʼE lahi mo te tahi ʼu gāue ʼe fai ʼi te ʼu fakatahi lalahi, mo te ʼu gāue laga fale pea mo te taupau ʼo te ʼu fale ʼaē ʼe fakaʼaogaʼi moʼo fakatuputupu ia te tauhi moʼoni. Pea koutou fakakaukauʼi age muʼa mo te tokoni ʼofa ʼaē ʼe foaki e te ʼu tēhina ʼaē ʼe gāue ʼi te Komite Faka Felogoi Mo Te Lōpitali pea mo Te Hahaʼi Fakasiosio Mahaki. Ko te ʼu fakatuʼutuʼu ʼofa ʼaia ʼe ko he tapuakina ki totatou fale tautēhina faka Kilisitiano!—Pes. 110:3.
4 Ka hoko he ʼu tuʼutāmaki peʼe ko he ʼu fihifihia ʼe hoko fakapunamaʼuli mai, ʼe tou maʼu ai he ʼu faigamālie ke tou tokoni ki he ʼu faʼahiga ʼaluʼaga kehekehe. Kae ʼi te agamāhani, ʼe feala pe ke tou sio ki he tēhina peʼe ki he tuagaʼane ʼe ʼaoga kiā ia he tokoni peʼe ko he fakaloto mālohi. (Taag. 17:17) ʼE tou mulimuli ki te faʼifaʼitaki ʼa Sesu, mokā tou fia tokoni moʼoni ki te hahaʼi pea mo fakahaʼele ki muʼa ia te ʼu gāue ʼo te Puleʼaga. (Filp. 2:5-8) Tou faiga ke tou fai tuʼumaʼu te faʼahi ʼaia.