Tou ʼOʼofa Ki Te Hahaʼi—ʼO Tou Agaʼofa
1 “Ko Sehova ʼe agaʼofa.” (Pes. 145:8) Logola ʼe ko te Tuʼi ʼAliki ʼo te ʼAtulaulau, kae ʼe agalelei, mo lotomahino, pea mo agaʼofa ʼi tana ʼu felogoi mo te hahaʼi agahala. (Sen. 13:14; 19:18-21, 29) ʼE feala ke tou hikihiki tatatou fakahā ia te logo lelei mokā tou faʼifaʼitakiʼi totatou ʼAtua agaʼofa. (Kol. 4:6) Ko tona faka ʼuhiga ʼe mole feʼauga ʼaki pe tatatou palalau fakaʼapaʼapa.
2 ʼI Tatatou Faka Mafola ʼi Te ʼu ʼApi: Koteā ʼaē ka tou fai mo kapau ʼe tou tau atu ki he ʼapi ʼe mole nātou faigamālie, peʼe maʼumaʼua fau? ʼE tonu ke tou mahino ki te ʼu ʼaluʼaga ʼaia, ʼo tou palalau fakanounou peʼe tou ʼui age ʼe tou toe liliu mai anai ʼi he tahi temi. ʼE mole tou fakakinauʼi anai te hahaʼi ke nātou tali hanatou ʼu nusipepa mo kapau kua nātou fakafisi mai. Ko totatou ʼofa ki te hahaʼi ʼe ina uga anai tatou ke tou aga fakaʼapaʼapa mokā tou ʼolo atu ki tonatou ʼu ʼapi, ohage la ke ʼaua naʼa tou fakasiosio ʼi tanatou ʼu matapā fakamālama peʼe tou toli tonatou ʼu mātalaʼi ʼakau, pea ʼe tonu ke tou akoʼi ki tatatou fānau ke nātou fakaʼapaʼapa mo nātou. ʼE tou tōkakaga anai ke mole tokagaʼi fau te ʼu tohi ʼaē ʼe tou tuku ʼi te ʼu ʼapi ʼaē neʼe tou maʼu atu ʼe lāvaki. Koia ko te agaʼofa ʼe tokoni anai kiā tatou ke tou fai ki te hahaʼi te ʼu meʼa ʼaē ʼe tou loto ke nātou fai mai kiā tatou.—Luka 6:31.
3 ʼI Tatatou Fagonogono ʼi Te Ala: ʼI tatatou fagonogono ʼi te ala, ʼe ko he agaʼofa anai tatatou mole tāʼofi ia te feʼoloʼaki ʼa te hahaʼi pea mo tatatou mole fakapupu iā muʼa ʼo te ʼu fale koloā. ʼE tou tokagaʼi lelei anai ia te ʼaluʼaga ʼo te hahaʼi, ʼo tou fai palalau mo nātou ʼaē ʼe maʼu honatou kiʼi temi, kae tou tukunoaʼi ia te hahaʼi ʼaē ʼe tou sio atu ʼe nātou fakavilivili. ʼI ʼihi temi, ʼuhi ko te logoaʼa ʼo te ala, ʼe lagi tonu anai ke tou palalau leʼo lahi ke logoʼi tatou. Kae ʼe tonu ke tou fai te faʼahi ʼaia ʼaki he aga fakaʼapaʼapa, ke mole tokagaʼi fau tatou.—Mat. 12:19.
4 ʼI Tatatou Faka Mafola ʼAki Te Telefoni: Kapau ʼe tou aga fakaʼapaʼapa, pea ʼe tou fai anai tatatou fai faka mafola ʼaki te telefoni ʼi he koga meʼa ʼe mole logoaʼa, ʼo tou foimo fakahā age totatou higoa pea mo fakamahino age te tupuʼaga ʼo tatatou telefoni age kiā nātou. Ka tou fakaʼaogaʼi fakalelei ia te telefoni pea mo palalau fakafiafia, ʼe feala anai ke tou fai palalau mo te hahaʼi ki he manatu faka Tohi-Tapu ʼe fakaloto mālohi. (1 Ko. 14:8, 9) Ka tou agalelei, mo lotomahino ki te ʼaluʼaga ʼo te hahaʼi, pea mo agaʼofa ʼi te ʼu ʼaluʼaga kehekehe ʼaia, pea ʼe tou faʼifaʼitakiʼi ai totatou ʼAtua agaʼofa, ko Sehova.