Ko Tatatou Minisitelio—ʼE Ko He Gāue ʼe Fai ʼAki He Agaʼofa
1 Neʼe sio ia Sesu ki te tokolahi ʼaē neʼe nātou fakalogo ki tana fai faka mafola, neʼe natou “fakaofaofa pea mo ogosia o hage he u ovi e mole honatou tauhiovi.” (Mat. 9:36) ʼAki he aga fonu ʼi te ʼofa pea mo he agalelei, neʼe ina akoʼi kiā nātou ia te ʼu lēkula ʼa Sehova, ʼo ina foaki he fakaloto fīmālie, pea mo tokoni kiā nātou ʼaki he agaʼofa, ke nātou maʼu te ʼu meʼa fakalaumālie ʼaē ʼe ʼaoga ki tonatou maʼuli. Ka tou metitāsioʼi ia te ʼu gāue ʼa Sesu, ʼe ko he ako ʼaia ke tou manatu pea mo tou logo ohage ko ia, pea ʼe ʼiloga lelei anai ʼi tatatou minisitelio, ia te kalitātē ʼaia ʼo te agaʼofa.
2 Koutou toʼo muʼa hokotou temi moʼo metitāsioʼi te aga ʼa Sesu ki te hahaʼi maʼuli ogosia, ʼaē neʼe ʼōmai ʼo kole tokoni kiā te ia. (Luka 5:12, 13; 8:43-48) Neʼe aga fakaʼapaʼapa ki te hahaʼi ʼaē neʼe nonofo mo he mahaki faigataʼa. (Mko. 7:31-35) Neʼe ina tokagaʼi te ʼu meʼa ʼaē neʼe logoʼi e te hahaʼi ʼi tonatou loto pea neʼe ina fakahā tona ʼofa ʼaē kiā nātou. Neʼe mole ina sioʼi pe tonatou agaaga ʼo tuʼa. (Luka 7:36-40) ʼIo, neʼe ʼiloga lelei iā Sesu te agaʼofa ʼo totatou ʼAtua.
3 “Nee Fonu i Te Ofa”: Neʼe mole fai e Sesu tana minisitelio ʼuhi pe ko hona maʼua, kae neʼe ina fai he “nee fonu i te ofa” ki te hahaʼi. (Mko. 6:34) ʼO toe feiā aipe iā ʼaho nei, ʼe mole tou tala pe he logo, kae ʼe tou faiga ke tou hāofaki ni hahaʼi. Tou faiga ke tou mahino ki te ʼu ʼaluʼaga ʼaē ʼe nātou felāveʼi mo ia. He koʼe koa ʼe nātou hoha pea mo tuʼania? Neʼe meʼa noaʼi koa nātou pea mo kākāʼi e te kau tauhi ōvi ʼo te ʼu lotu hala? Ko totatou ʼoʼofa moʼoni kiā nātou, ʼe ina uga anai nātou ke nātou fakalogo ki te logo lelei.—2 Ko. 6:4, 6.
4 Ko te agaʼofa ʼe malave ki te loto ʼo te hahaʼi. Koʼeni tona faʼifaʼitaki: Neʼe lotomamahi te fafine neʼe mate tana kiʼi taʼahine neʼe māhina tolu. ʼI te tahi ʼaho, neʼe fisifisi tona matapā e te ʼu Fakamoʼoni e toko lua, pea neʼe ina fakahū nāua ki tona ʼapi, ʼaki te fakatuʼutuʼu ʼaē ke ina fakahalaʼi tanā tali ʼo ʼuhiga mo te fakagafua ʼa te ʼAtua ia te ʼu mamahi. Kae ki muli age, neʼe ʼui fēnei e te fafine: “ ʼAki he agaʼofa lahi, neʼe nā fakalogo kiā au, pea ʼi tanā mavae ʼi toku ʼapi, neʼe kua au logo fīmālie pea neʼe au tali ke nā toe ʼaʼahi au.” ʼE ke faiga koa ke ke agaʼofa ki te hahaʼi fuli ʼaē ʼe ke felāveʼi mo nātou ʼi te minisitelio?
5 Ko te gāueʼi ʼo te agaʼofa, ʼe tokoni mai anai ke tou foaki he fakaloto fīmālie moʼoni ki te hahaʼi, pea mo ina faka fealagia anai ke tou faka kolōliaʼi ia Sehova, “te Tamai o te manavaofa fuape.”—2 Ko. 1:3.