Neʼe Nātou Tuku He Faʼifaʼitaki Lelei ʼo ʼUhiga Mo Te Agatonu
1 ʼI te taʼu 1937, neʼe kamata ai te tahi faʼahiga fai ʼo te selevisi temi kātoa—ko te gāue pionie makehe. Ko te ʼu tagata pea mo te ʼu fafine faʼafai, neʼe faiva ʼi te minisitelio faka Kilisitiano, neʼe nātou lotolelei ʼo mulimuli ki te fakatotonu ʼa te kautahi, ke nātou ʼolo ʼo gāue ʼi te ʼu fenua ʼaē ʼe hinoʼi nātou kiai. ʼI te temi nei, hili kiai te ʼu lauʼi hogofulu taʼu, ʼe kei fakahā aipe e te kau pionie makehe ia te faʼifaʼitaki agatonu ʼe tāu ke muliʼi.—Hep. 6:12.
2 Neʼe Ko Nātou ʼAē Neʼe Nātou Takitaki Ia Te Gāue: ʼI te kamata fai faka mafola ʼa te kau pionie makehe, neʼe nātou fakaʼaogaʼi te ʼu fakatagi pukeleʼo ʼi te ʼu muʼa matapā ʼo te hahaʼi, pea ʼi tanatou ʼu ʼaʼahi neʼe nātou fakaʼaogaʼi ia te ʼu pa fakatagi moʼo fakatafito kiai tanatou ʼu fai palalau faka Tohi-Tapu. Neʼe fai te faʼahiga fai faka mafola ʼaia ʼi te ʼu kolo lalahi ʼaē neʼe kua ʼi ai te ʼu kokelekasio. Ki muli age, neʼe fekauʼi te ʼu pionie makehe ki te ʼu potu neʼe ʼaoga lahi kiai te ʼu kaugā fai faka mafola ʼo te Puleʼaga. Neʼe nātou ʼaʼahi te hahaʼi fuli ʼaē neʼe fia logo pea mo fai te ʼu ako Tohi-Tapu. Pea ʼaki tanatou ʼu faiga fakamalotoloto ʼaia, neʼe fakatuʼu ia te ʼu lauʼi teau kokelekasio foʼou. ʼI te temi nei, kua kaugamālie ʼaupito te hahaʼi ʼe nātou ʼōmai ki te kautahi ʼuhi ko te gāue mālohi ʼaia neʼe fai moʼo faka mafola ia te evaselio. (Isa. 60:22) ʼE kei maʼuhiga ʼaupito ia te gāue ʼa te kau pionie makehe ʼi te faka mafola ʼo te logo lelei “ ʼi te ʼu meʼa kātoa ʼaē neʼe fakatupu ʼi te lalo lagi.”—Kol. 1:23, MN.
3 Ko He ʼu Faʼifaʼitaki ʼe Tāu Ke Tou Muliʼi: Ko ʼihi pionie makehe kua lauʼi hogofulu taʼu tanatou kau ki te minisitelio temi kātoa. Lolotoga ni ʼu taʼu, neʼe ʼahiʼahiʼi ia te tui ʼa te ʼu tēhina mo tuagaʼane agatonu ʼaia. (1 Pet. 1:6, 7) Kae neʼe nātou loto lelei ke nātou sītuʼa ki tonatou ʼu koloā ke feala hanatou ʼolo ki te ʼu faʼahi ʼaē ʼe ʼaoga tāfito ai he ʼu tēhina moʼo fai ia te gāue. Ko ʼihi ʼi te temi nei kua nātou mātutuʼa pea mo mahamahaki, peʼe nātou tau mo he tahi age ʼu fihifihia ʼo te maʼuli. (2 Ko. 4:16, 17) Kae ʼe nātou ‘hoko atu pe tanatou faʼafai pea mo mālolohi ki te fai ʼo te gāue.’ (Pes. 92:14) ʼE nātou falala kiā Sehova pea ʼe nātou maʼu ia tana tapuakina.—Pes. 34:8; Taag. 10:22.
4 Koia, ʼe tāu mo te ʼu pionie makehe ʼaia ke tou fakaʼapaʼapa kiā nātou. Kapau ʼe ʼi ai he ʼu pionie makehe ʼi tokotou kokelekasio, koutou fakaʼaogaʼi fakalelei ia te faigamālie ʼaia ke koutou kaugā gāue mo nātou pea mo akoako tonatou ʼu faiva. Koutou loto fakafetaʼi ki te gāue ʼaē ʼe nātou foaki ʼi tonatou ʼuhiga kaugā fai faka mafola ʼo te Puleʼaga. Koutou maʼu he fakaloto mālohiʼi mai tanatou gāue kinakina. Ko nātou fuli ʼaē ʼe nātou muliʼi tanatou faʼifaʼitaki, ʼe nātou maʼu anai ia te ʼofa pea mo te tapuakina ʼa Sehova ʼuhi heʼe ‘fiafia iā nātou ʼaē ʼe gāue ʼaki te agatonu.’—Taag. 12:22.