Te Tali Ki ʼAkotou ʼu Fehuʼi
◼ Ko te ʼu ʼaluʼaga fea ʼaē ʼe feala ai ke tou foaki he tokoni ʼe ʼaoga ki te kau pioniē?
Lolotoga te taʼu gāue 2009, ʼe teitei pē ko te toko 800 000 tehina mo tuagaʼane neʼe pioniē kātoa peʼe pioniē makehe. Ko te ʼu kaugana ʼaia ʼe gāue temi kātoa ʼe natou sākilifisioʼi tonatou temi, mo tonatou mālohi, pea mo ʼonatou koloa ke natou fakamafola te logo lelei ʼo te Puleʼaga. (Taag. 3:9) ʼE mahino ia ʼe fiafia ia Sehova ki tanatou ʼu gāue mālohi ʼaia! ʼE feafeaʼi hatatou lava fakahā ʼe tou maʼu te manatu ʼa Sehova pea mo tou tokoni age kiā nātou ke natou taupau maʼu ia tanatou fiafia mo tanatou faʼa kātaki ʼi te taʼi gāue ʼaia?
ʼE mahino ia, ʼe tou lava tokoni kiā nātou ke hoko atu tanatou gāue pioniē, ʼaki tatatou ʼu palalau fakalotomālohi. (Taag. 25:11) ʼE tou lava fetogi koa tatatou polokalama ke feala ai hatatou gāue fakatahi mo nātou ʼi te minisitelio? Kā tou gāue fakatahi mo nātou, ʼe feala hatatou ʼui age kiā nātou, ʼe lagi lelei age ke kotou feʼoloʼaki ʼi takotou motokā kae tuku muʼa tana ia motokā? Pea kapau ʼe tou fakaʼaogaʼi tana motokā, ʼe feala pē ke tou foaki age hona kiʼi meʼa ʼofa moʼo tokoni ki te totogi ʼo tana moʼi penisini. (1 Ko. 13:5; Filp. 2:4) ʼE tou toe lava fakahā ia tatatou tokaga ʼofa ʼaē kiā nātou, ʼaki hatatou fakaafe ʼo nātou ʼi ʼihi lakaga ke tou kakai fakatahi.—1 Pet. 4:8, 9.
ʼE fakamoʼoni mai ʼi te Tohi-Tapu, ko Sehova ʼe ina foaki anai te ʼu meʼa tāfito ʼo te maʼuli kiā nātou ʼaia ʼe natou ʼuluaki kumi muʼa tona Puleʼaga. (Pes. 37:25; Mat. 6:33) Pea ko he faʼahiga fakahoko ʼo te faʼahi ʼaia, ʼe ko tana fakaʼaogaʼi ʼaē ia totatou foʼi fāmili fale tautēhina ʼofa. (1 Soa. 3:16-18) ʼE moʼoni ia, ʼe mole fakatalitali pē te kau pioniē ke totogi tonatou ʼu maʼua fakapaʼaga e tonatou ʼu tehina mo tuagaʼane. Pea ʼe lagi mole natou fakahā anai ki tonatou ʼu tehina mo tuagaʼane mokā natou tau mo he fihifihia fakapaʼaga. Kae ʼe tou lava tokoni ki te kau pioniē agatonu ke natou maʼu ‘te ʼu meʼa ʼaē ʼe hala mo nātou.’—2 Ko. 8:14, 15.
ʼI te temi ʼaē neʼe ʼalu ai ki Loma ia Foepene, ko he tuagaʼane gāue mālohi ʼo te kōkelekāsio ʼo Senekele ʼo te ʼuluaki sēkulō, neʼe fakalotomālohiʼi fēnei e Paulo te ʼu tehina ʼi Loma: “Ke koutou tali ia [ia] aki he aga e tuha mo te kaigalotu, pea koutou tokoni kia te ia i he meape e aoga ke koutou tokoni ki ai.” (Loma 16:1, 2, Tauhi Foou) ʼE tou maʼu te fealagia ʼaē ke tou fakahā te taʼi ʼofa ʼaia kiā nātou ʼaē ʼi totatou kōkelekāsio ʼe natou tala tuʼumaʼu te logo lelei, ʼo natou pioniē kātoa pea mo pioniē makehe.—Gāue 5:42.