ʼE Tufa Anai Te Réveillez-vous ! Makehe ʼi Sepetepeli
1 ʼE teitei pe ki te hahaʼi fuli tanatou leleiʼia te hiva ʼa te ʼu misi pea mo te mamata ki te tō ʼo te laʼā. Kae tokolahi ʼe mole nātou tali te ʼui ʼaē ko te ʼu faʼu ʼaia ʼa he Tāmai ʼofa ʼe ʼi selo. Kapau ʼe tou kau ki te tufa ʼo te Réveillez-vous ! makehe, pea ʼe ko he faigamālie makehe ʼaia ke tou fakahā ai ko Sehova ʼaē neʼe ina fakatupu ia meʼa fuli. (Isa. 40:28; 43:10) Ko te alatike ʼi te nusipepa ʼo Sepetepeli, ʼe talanoa tāfito ki te faʼahi ʼaenī: “ ʼE ʼi Ai Koa He Tupuʼaga?”
2 ʼI Te Telituale: Kapau ko he faʼahi ʼe feala, koutou fakatuʼutuʼu ʼi te ʼu Moeaki fuli ke koutou fai faka mafola mo te kokelekasio. Kae ʼe feala pe hakotou tufa te Réveillez-vous ! makehe ʼaia ʼi he tahi age ʼaho ʼo te vāhaʼa. ʼE mahino ia, ʼe fia lau anai te alatike ʼaia e te hahaʼi faiako, mo te kau takitaki ʼo te ʼu faleako. Koia, koutou fai hakotou ʼu fakatuʼutuʼu makehe moʼo ʼaʼahi te faʼahiga hahaʼi ʼaia ʼo tokotou telituale.
3 Kapau ʼe fia logo niʼihi, koutou lagaʼi he fehuʼi ʼe feala anai hakotou toe liliu moʼo tali kiai. Ohage la, ʼe feala hakotou lagaʼi te fehuʼi ʼaenī, pe koʼe ʼe fakagafua e he Tupuʼaga ʼofa ke lahi te ʼu mamahi ʼaē ʼe tau mo te hahaʼi. ʼOsi ʼaia, ka koutou toe liliu mai ʼo tali ki te fehuʼi ʼaia, koutou fai palalau ki te kapite 1 peʼe ko te kapite 11 ʼo te tohi Te Ako Mai Te Tohi-Tapu. Peʼe feala hakotou lagaʼi te fehuʼi ʼaenī, pe koteā te fakatuʼutuʼu ʼa te Tupuʼaga ʼo ʼuhiga mo te kele, pea ka koutou toe liliu ʼo fai te ʼaʼahi, koutou fai palalau leva ki te kapite 3.
4 Ki Tokotou ʼu Kaumeʼa Pea Mo Tokotou ʼu Kaugā Ako: ʼE lagi koutou fia tuku age anai ia te Réveillez-vous ! makehe ʼaia ki tokotou ʼu kaumeʼa pea mo tokotou ʼu kaugā ako. Kapau ʼe fehuʼi atu e hokotou faiako, pe koʼe ʼe koutou tui ki te fakatupu, ʼe koutou fakamahino age anai, ʼosi ʼaia pea koutou tuku age leva te nusipepa. ʼAki te Réveillez-vous ! ʼaia, ʼe toe feala aipe ke tokoni atu ki takotou ʼu faifai palalau ʼi te faleako pea mo tali ki te ʼu fehuʼi ʼaē ʼe fai atu ʼo ʼuhiga mo takotou tui. Moʼo tokoni kiā koutou, ʼi te nusipepa ʼaia ʼe ʼi ai te alatike “ Les jeunes sʼinterrogent... Comment défendre ma croyance en la création ? ” (Te ʼu fehuʼi e lagaʼi e te kau tūpulaga... E feafeaʼi haku fakamahino te ʼu akonaki ʼe au tui kiai ʼo ʼuhiga mo te fakatupu?)
5 ʼE tāu mo Sehova te fakaʼapaʼapa pea mo te kolōlia, ʼo ʼuhiga mo tana ʼu fakatupu. (Apk. 4:11) ʼE tou lava fakaʼapaʼapa ki totatou Tupuʼaga pea mo tokoni ki te hahaʼi ke nātou fai mo nātou ia te faʼahi ʼaia, ʼo tou foaki fakafiafia age ia te Réveillez-vous ! ʼo Sepetepeli.