Tou Tokoni Ki Niʼihi Ke Natou Liliu Ko He ʼu Kaumeʼa ʼo Te ʼAtua
1 Iā ʼaho nei, ko te hahaʼi mai te ʼu puleʼaga fuape, ʼe akoʼi kiā nātou ia te ʼu fakatuʼutuʼu ʼa Sehova. (Isa. 2:2, 3) Kae ke feala hanatou “fua ʼaki te loto faʼa kātaki,” ʼe tonu ke natou ʼoʼofa kiā Sehova. (Luka 8:15, MN; Mko. 12:30) Kapau ʼe mole natou maʼu ia te taʼi ʼofa ʼaia, pea ʼe mole natou maʼu anai ia te mālohi ʼaē ʼe ʼaoga moʼo tekeʼi ia te ʼu fai fakahala, peʼe ko te maʼu ʼo te lototoʼa ʼaē moʼo fai ia te meʼa ʼaē ʼe lelei. Moʼo tokoni ki niʼihi ke natou gāueʼi tanatou ʼu felogoi mo Sehova, ʼe tonu ke fakatuputupu tonatou loto fakafetaʼi ki tona ʼu kalitātē. Kotou fakaloto mālohiʼi ia nātou ke natou metitāsioʼi ia te ʼu manatu ʼaē ʼe tuʼu ʼi te tohi Approchez-vous de Jéhovah.
2 Takotou Faʼifaʼitaki: Ko takotou ʼu gāue takitokotahi, ʼe feala hona malave ʼaupitō ki te loto ʼo takotou ʼu ako Tohi-Tapu. Kā natou sisio atu ʼe maʼuhiga kiā koutou takotou faka kaumeʼa mo Sehova, pea mo tana fetogi ʼaupitō ia tokotou maʼuli, ʼe feala anai ke ʼekenaki ai nātou ke natou fakatuputupu he ʼu felogoi lelei mo Sehova. (Luka 6:40) ʼEī, ʼi te agamāhani, ko te meʼa ʼaē ʼe malave ʼaupitō ki te hahaʼi, ʼe mole ko tatatou ʼu palalau, kae ko tatatou faʼifaʼitaki.
3 Ko te faʼifaʼitaki ʼaē ʼe tuku e te ʼu mātuʼa, ʼe ko te faʼahi ʼaia ʼe lelei tāfito moʼo akoʼi ki tanatou fānau ke natou ʼoʼofa kiā Sehova. (Teu. 6:4-9) Ko te taumātuʼa neʼe nā fia akoʼi tanā fānau ʼi te moʼoni, pea neʼe nā kumi tokoni ki te ʼu taumātuʼa neʼe lelei tanatou ako fānau ʼi te faʼahi ʼaia. Neʼe ʼui fēnei e te tagata ʼohoana: “Ko te manatu ʼaē neʼe natou palalau fuli mai kiai, neʼe ko te faʼifaʼitaki lelei ʼaē ʼe tonu ke tuku e te ʼu mātuʼa ki tanatou fānau.” Koia, ʼi te ʼu faʼahi fuli ʼo tonatou maʼuli, ʼe feala ki te ʼu mātuʼa ke natou tuku ia he faʼifaʼitaki lelei ke liliu ia te fānau ko he ʼu “Kaumea o te Atua.”—Skp. 2:23.
4 He ʼu Faikole Fakamalotoloto: ʼE feala hakotou tokoni ki te hahaʼi ke natou kaumeʼa mo Sehova, mo kapau ʼe kotou akoʼi age kiā nātou ke natou faikole fakamalotoloto. Kotou fakahāhā age ia te faikole ʼaē neʼe akoʼi mai e Sesu, ia te Tamai ʼe ʼi selō, pea mo te tahi ʼu faikole fakamalotoloto ʼaē ʼe tuʼu ʼi te Tohi-Tapu. (Mat. 6:9, 10) ʼE feala ʼaki takotou ʼu faikole, ke kotou akoʼi ai ki takotou ʼu fānau pea mo takotou kau ako Tohi-Tapu peʼe feafeaʼi hanatou faikole. Kā natou fagono ki takotou ʼu faikole fakamalotoloto, pea ʼe natou logoʼi te ʼu meʼa ʼaē ʼe kotou logoʼi ʼi tokotou loto ʼo ʼuhiga mo Sehova. Kotou fakaloto mālohiʼi ia nātou ke natou “kātaki tuʼumaʼu ʼi te faikole” mokā natou felāveʼi mo ni ʼu ʼahiʼahi. (Loma 12:12, MN ) Kā natou sisio anai ki te tokoni ʼa Sehova ʼi tonatou ʼu temi faigataʼaʼia, pea ʼe mahino ia ʼe natou falala pea mo ʼoʼofa anai kiā te ia, ohage ko honatou kaumeʼa moʼoni.—Pes. 34:8; Filp. 4:6, 7.