Tou Lototoʼa, Kae Ke Tou Kumi Te Tokalelei
1 Tokolahi te hahaʼi ʼaē ʼe tou fai faka mafola ki ai, ʼe natou fakahā mai tanatou tui moʼoni ʼaē ki he ʼu akonaki ʼe mole ʼalutahi mo te Tohi-Tapu. Logolā ʼe tonu ke tou lototoʼa mokā tou fai faka mafola, kae ʼe tou toe fakaʼamu foki ke tou “māʼuʼuli ʼi te tokalelei mo te tagata fuapē” pea mo ʼaua naʼa tou fai he aga ʼe lotomamahi ai anai he tahi. (Loma 12:18, MN; Gaue 4:29) ʼE feafeaʼi hatatou lototoʼa, pea mo kumi ia te tokalelei, mokā tou faka mafola te logo ʼo te Puleʼaga?
2 Tou Palalau Ki He ʼu Faʼahi ʼe Maʼu Ai Te Felogoi: Ko he tahi ʼe ina kumi ia te tokalelei, ʼe mole ina fakatupu anai he ʼu fihi. ʼE mole feala anai ki he tahi ke ina tali ia te logo lelei, mo kapau ʼe tou fakafihiʼi he ʼu manatu ʼe faka tui mālohi kiai. Kapau ʼe hala tana manatu, pea tou kumikumi he puani ʼe maʼu ai anai he felogoi. ʼE lelei age hatatou kumi he ʼu faʼahi ʼe tou faka tui tatau kiai, ke ina tekeʼi ai he ʼu manatu hala ʼo ʼuhiga mo tātou pea mo tou fai he ʼu palalau ʼe malave anai ki tona loto.
3 Kapau ʼe mole tou fakatonutonuʼi te manatu hala ʼo ia ʼaē ʼe tou fai faka mafola ki ai, ko tona faka ʼuhiga koa ʼe tou meʼa noaʼi ia te moʼoni? Kailoa ia. He neʼe fakatotonu mai kiā tātou kau minisi Kilisitiano, ke tou faka mafola ia te logo lelei ʼo te Puleʼaga, kae mole ko te tauʼi ʼo te ʼu manatu hala fuli pē ʼaē ʼe tou logo kiai mokā tou fai faka mafola. (Mat. 24:14) ʼAua naʼa tou foimo tauʼi atu aipē he tahi mokā ina fakahā mai hana manatu hala, kae tou fakaʼaogaʼi ia te ʼaluʼaga ʼaia ke tou maʼu ai te fakasiosio poto ʼo ʼuhiga mo te ʼu meʼa ʼaē ʼe manatu kiai te hahaʼi.—Taag. 16:23.
4 Tou Aga Fakaʼapaʼapa Ki Te Hahaʼi: ʼE ʼi ai te ʼu lakaga ʼe tonu ai ke tou lototoʼa mokā tou tali ki he ʼu faiakonaki hala. Kae ʼi tatatou manako ki te tokalelei, ʼe mole tou vāʼi anai ia te hahaʼi, pea mo fakaʼaogaʼi ni ʼu palalau moʼo fakalainoaʼi ʼo nātou pea mo te ʼu akonaki ʼaē ʼe natou faka tui kiai. ʼE mole fia logo anai ia te hahaʼi mo kapau ʼe tou fia matamuʼa, kae kapau ʼe tou agavaivai pea mo agalelei, ʼe tou maʼu anai he ʼu hahaʼi ʼe natou ʼoʼofa ki te moʼoni. ʼE tou fakahā anai he aga fakaʼapaʼapa ki te hahaʼi pea mo te ʼu akonaki ʼaē ʼe natou faka tui kiai, ke faigafua ai hanatou tali te logo ʼaē ʼe tou tala.
5 Neʼe fakaʼapaʼapa ia te ʼapositolo ko Paulo ki te ʼu meʼa ʼaē neʼe tui kiai te hahaʼi, pea neʼe ina faigaʼi ke ina fakahā ia te logo lelei ʼi he ʼaluʼaga ʼe malave anai ki tonatou loto. (Gaue 17:22-31) Neʼe ina tali lelei ke liliu “ko meʼa fuli maʼa te hahaʼi kehekehe,” ke feala ai hana “hāofaki [ʼo] niʼihi.” (1 Ko. 9:22, MN ) ʼE feala mo tātou ke tou mulimuli ki tana faʼifaʼitaki, ʼo tou kumi ia te tokalelei mokā tou faka mafola ʼaki he lototoʼa ia te logo lelei.