He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Sūlio

“ ʼI tamatou fai palalau mo te hahaʼi, neʼe matou tokagaʼi ko ʼihi ʼe natou falala ki te ʼAtua. Ko ʼihi, ʼe faigataʼa tanatou tui kiā te ia. ʼE feafeaʼi lā kiā koe? [Tuku ke fai mai hana tali.] ʼE feala ke ke tokagaʼi peʼe koteā ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia. [Lau age ia Pesalemo 139:14.] ʼE feala ke tou maʼu he ʼu fakamoʼoni ki te mālohi heʼegata ʼo te ʼAtua mokā tou vakavakaʼi te ʼu meʼa ʼaē neʼe ina fakatupu.” Kotou fakahā age ia te ʼalatike ʼaē ʼe kamata ʼi te pāsina 11.

Réveillez-vous! ʼo Sūlio

“Tokolahi te hahaʼi ʼe natou fai te ʼu gāue lelei ʼi tonatou maʼuli pea ʼe maʼuhiga kiā nātou ke natou agalelei mo te hahaʼi. ʼE ko tau manatu koa ʼaia ʼo ʼuhiga mo te maʼuli? [Tuku ke fai mai hana tali.] Koʼenī te tuʼutāmaki ʼe feala ke hoko mo kapau ʼe mole tatau tatatou mahino ki te meʼa ʼaē ʼe lelei mo te ʼAtua. [Lau age ia Tāʼaga Lea 14:12.] ʼE talanoa te ʼalatike ʼaenī ki te faka ʼuhiga ʼo he tahi ʼe lelei kiā mata ʼo te ʼAtua.” Fakahā age te ʼalatike ʼaē ʼe kamata ʼi te pāsina 20.

Te Tule Leʼo ʼaho 1 ʼo ʼAuk.

“ ʼE au fia ʼiloʼi tau manatu ʼo ʼuhiga mo te manatu ʼaenī neʼe ʼui e te ʼapositolo ko Paulo. [Lau age ia Kalate 5:16.] Kiā koe lā, ʼe feala koa ke tokoni mai kiā tātou ia te laumālie ʼa te ʼAtua? [Tuku ke fai mai hana tali.] ʼE fakahā ʼi te nusipepa ʼaenī pē koteā te faka ʼuhiga ʼo te ‘haʼele ʼaki te laumālie.’

Réveillez-vous! ʼo ʼAuk.

“ ʼI tau manatu, ʼe lava maʼu ʼifea e te ʼu mātuʼa he ʼu tokoni lelei ʼe ʼaoga tāfito anai kiā nātou? [Tuku ke fai mai hana tali.] Koʼenī te fakapapau ʼe fai mai ʼi te Tohi-Tapu. [Lau age ia 2 Timoteo 3:16.] ʼE fakahā ʼi te nusipepa ʼaenī te ʼaoga ʼaē ʼo te Tohi-Tapu moʼo tokoni ki te ʼu mātuʼa ke natou fiafia ʼi te taupau ʼo tanatou fānau.”