He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo ʼAuk.

“ ʼE tau te hahaʼi mo te ʼu lotomamahi ʼaupito. ʼE ʼi ai koa he puleʼaki moʼo tekeʼi ia te ʼu temi mamahi ʼaia? [Tuku ke fai mai hana tali.] Ke ke tokagaʼi age te ʼu palalau fakaloto mālohi ʼaenī neʼe tohi e te atolasio agatonu ʼa te ʼAtua ʼi te Pesalemo 34:19. ʼE fakahā ʼi te nusipepa ʼaenī peʼe feafeaʼi hata tauʼi te ʼu tuʼania ʼo te ʼu temi faigataʼa ʼaenī.”

Réveillez-vous! ʼo Sūlio

Ka koutou felāveʼi mo he tūpulaga, ʼe koutou lava ʼui age: “Tokolahi ʼi tou taʼiake ʼe nātou talanoa ki te ʼohoana. ʼI tau manatu, peʼe kofea la te ʼu tokoni lelei ʼaē ʼe ke lava kumi kiai ʼo ʼuhiga mo te faʼahi ʼaia? [Tuku ke fai mai hana tali.] Ke ke fakatokagaʼi pe ko ai ʼaē neʼe ina fakatuʼu te nofo ʼohoana. [Lau age ia Mateo 19:6.] ʼE fakahā ʼi te nusipepa ʼaenī te ʼu pelesepeto faka Tohi-Tapu ʼe tokoni mai kiā tatou moʼo fakatuputupu ia he maʼuli faka taumātuʼa fiafia.”

Te Tule Leʼo ʼaho 1 ʼo ʼAuk.

“Tokolahi te hahaʼi ʼe mata faigata kiā nātou ia te akonaki ʼo ʼuhiga mo te manavasiʼi ki te ʼAtua. Maʼa nātou, ko te manavasiʼi ʼe mole ko he meʼa ʼe lelei. Koteā tau ia manatu kiai? [Tuku ke fai mai hana tali.] Ke ke fakatokagaʼi te manatu ʼa te Tohi-Tapu iā Tāʼaga Lea 9:10 ʼo ʼuhiga mo te manavasiʼi ki te ʼAtua, ʼe mole ko he meʼa ʼe kovi. ʼE fakahā ʼi te nusipepa ʼaenī te faka ʼuhiga ʼo te manavasiʼi ki te ʼAtua pea ʼe liliu feafeaʼi ko he meʼa fakatupu fiafia.”

Réveillez-vous! ʼo ʼAuk.

“Ko tatou fuli ʼe tou fia maʼuli fīmālie. ʼE ke ʼiloʼi koa kua kaugamālie ia te kau tōketā ʼaē kua nātou lotolotolua ʼo ʼuhiga mo te fakaʼaogaʼi ʼaē ʼo te ʼu foʼi huki toto iā ʼaho nei? [Tuku ke fai mai hana tali.] ʼE fakahā ʼi te nusipepa ʼaenī tona tupuʼaga. ʼE ina toe fakamahino ʼaki te Tohi-Tapu, maʼa te ʼAtua ʼe maʼuhiga te toto.” Lau age ia Levitike 17:11.