Tou Fakalotofīmālie Ia Nātou ʼAē ʼe Lavea ʼOnatou Loto
1 Neʼe mole heʼeki ʼi ai he temi ki muʼa atu ʼo te hisitolia ʼo te tagata, neʼe ʼaoga ʼaupitō fēia ke fakalotofīmālieʼi ia te hahaʼi. ʼI tatatou mulimuli ki te takitaki ʼo totatou Hau, ia Kilisito Sesu, ʼe tou toe kau mo tātou ki te ‘faitoʼo ʼo nātou ʼaē ʼe lavea ʼonatou loto.’—Isa. 61:1.
2 Te ʼu Palalau ʼe Feala Ke Tou Fai: Moʼo fakalotofīmālie ia te hahaʼi, ʼe tonu ʼi tatatou minisitelio ke tou fakafuafua lelei ia tatatou ʼu palalau pea mo fakalotomālohi. Kā tou tōkakaga ke ʼaua naʼa lahi fau ia tatatou palalau ki te ʼu agakovi ʼi te mālamanei pea mo te ʼu akonaki hala, pea ʼe lahi age anai tatatou palalau ki te ʼu moʼoni ʼo te Tohi-Tapu pea mo te ʼamanaki fakafiafia ʼo te ʼu fakapapau fakalotofīmālie ʼa te ʼAtua. ʼE mole fakaʼuhiga leva ʼe mole tonu ke tou talanoa ʼo ʼuhiga mo Halamaketone. Ko tatatou gāue ko te tala ia “te taʼu manavaʼofa ʼo Sehova pea mo te ʼaho lagavaka ʼo totatou ʼAtua,” pea mo tou “fakatokagaʼi . . . te tagata agakovi ke maliu mai tana agakovi.” Kae ko te fakatokagaʼi ʼo te hahaʼi ʼo ʼuhiga mo Halamaketone pea mo tona ʼu fua, ʼe mole tonu ai anai ke puli ai te kupu tāfito ʼo te logo lelei ʼo te Puleʼaga ʼo te ʼAtua.—Isa. 61:2; Esk. 3:18; Mat. 24:14.
3 ʼI Te ʼu ʼApi: ʼE tou felāveʼi tuʼumaʼu mo te hahaʼi ʼe natou lotomamahi ʼuhi ko te mahaki, pe neʼe mate he tahi neʼe natou ʼoʼofa ai, peʼe ʼuhi ko te ʼu aga heʼe faitotonu, peʼe ko he ʼu fihifihia fakapaʼaga. ʼI tatatou faʼifaʼitakiʼi ia Kilisito, ʼe tou ‘ ʼoʼofa’ pea mo manavaʼofa kiā nātou ʼaē ʼe tou felāveʼi mo ia ʼi te minisitelio. (Luka 7:13; Loma 12:15) Logolā ʼe tou lau age ki he tahi he vaega Tohi-Tapu e tahi peʼe lua ʼe pipiki ki tona fihifihia, kae ʼe tonu ke tou “vave ʼi te fagono,” ʼo tou fakafealagia ai ke ina fakahā mai te ʼu meʼa ʼaē ʼi tona loto. (Sake 1:19) ʼI tatatou kua ʼiloʼi ia tana manatu, kua feala ai leva ke tou foaki he fakalotofīmālie ki ai.
4 Kā kua tou fakafuafua kua tou maʼu he faigamālie ke tou fai palalau ai, pea ʼe feala hatatou ʼui fēnei age: “ ʼE au fia vaevae mo koe he ʼu palalau fakalotomālohi ʼe tuʼu ʼi te Tohi-Tapu.” ʼE tonu ke kotou fakasiosio lelei ke ʼaua naʼa kotou fakafihiʼi ia te ʼu manatu hala fuli ʼaē ʼe ina fakahā atu. Heʼe tonu ke tou tōkakaga tāfito ʼo foaki he fakalotomālohi pea mo he fakalotofīmālie ʼaki te Tohi-Tapu, ke mālohi ai tona loto. ʼO ʼuhiga mo te faʼahi ʼaia, ʼe feala ke kotou lau ia te ʼu manatu ʼi te tohi Comment raisonner à partir des Écritures ʼi te pāsina 119 ki te 122, ʼi te kupu tāfito ʼaē “Encouragement” (Fakalotomālohi). Peʼe feala ke kotou foaki age hana kiʼi pepa lotu, ʼaē ko tona kupu tāfito Te Fakafimālie ʼo ʼUhiga Mo Te Kau Lotovaivai pea mo vakaʼi ia te ʼu palalau fakalotomālohi ʼaē ʼe tohi ʼi loto.
5 Tou Kumi Te ʼu Faigamālie Moʼo Fakalotofīmālieʼi Te Hahaʼi: ʼE kotou ʼiloʼi koa he tahi ʼi tokotou vāhaʼa fale, ʼi te fale gāue, ʼi te faleako, peʼe ko he tahi ʼi te fāmili ʼe ʼaoga ke fakalotofīmālieʼi? He koʼē ʼe mole kotou faiga ke kotou ʼaʼahi ia ia ʼaki te fakatuʼutuʼu ʼaē ke kotou fakalotofīmālieʼi ia ia ʼaki te Tohi-Tapu? ʼI takotou ʼiloʼi ʼaē pe koʼē ʼe tonu ke fakalotofīmālieʼi nātou, ʼe feala ai ke kotou teuteu ki te faʼahi ʼaia. Ko ʼihi tehina mo tuagaʼane neʼe natou faitohi peʼe fai telefoni moʼo foaki ia he fakalotofīmālie. Ko totatou ʼofa moʼoni ki totatou tatau, ʼe ina uga ai anai tātou ke tou fakahā te ʼofa pea mo foaki te fakalotofīmālie ʼaē ʼe haʼu mai te Tohi-Tapu.—Luka 10:25-37.
6 ʼEī, ʼe fekauʼi tātou ke tou fakalotofīmālieʼi ia nātou ʼaē ʼe putu, ke tou fakafiafia ia nātou ʼaē ʼe loto mamahi, pea mo foaki kiā nātou ia te ʼamanaki ʼo he kā haʼu fakatalakitupua. ʼE ko te fakalotofīmālie ʼaia ʼaē ʼe ʼaoga ki te hahaʼi ʼi te mālamanei kātoa. Kapau ʼe tou palalau ʼaki he loto fiafia ki te ʼu tuʼuga lelei ʼaē ʼe fakapapau mai e te ʼAtua, pea ʼe ina fakalotofīmālie anai pea mo foaki he ʼamanaki ki te hahaʼi loto fakamālotoloto. ʼOfa pē ke tou manatuʼi tuʼumaʼu ia te ʼaoga ʼaē ke tou faitoʼo ia nātou ʼe lavea ʼonatou loto.