Ko He Tufa Makehe Moʼo Tala Ki Te Hahaʼi Ia Te ʼAho Fakamanatu!
1. Koteā anai kā fai e te ʼu kaugā fai fakamafola ʼo te Puleʼaga ʼi te kele kātoa ʼo kamata atu ʼi te ʼaho 21 ʼo Malesio 2009, pea koteā tona tupuʼaga?
1 ʼI te Felianima, ʼaho 9 ʼo ʼApelili 2009, ko te kau ʼatolasio ʼa Sehova ʼAtua ʼi te kele kātoa ʼe natou fakatahitahi anai moʼo fakamanatuʼi ia tona ʼofa lahi ʼaupitō ʼaē neʼe ina fakahā ki te mālamanei. (Loma 5:6-8) ʼE tou fakaʼamu ke fakatahi mo tātou ni ʼu toko lauʼi miliona hahaʼi ʼe natou fia ʼiloʼi te moʼoni, ʼi tatatou fakamanatu ia te mate ʼa Sesu. Ko he pepa fakaafe makehe ki te ʼAho Fakamanatu ʼe tufa anai ʼi te mālamanei kātoa ʼo kamata atu ʼi te ʼaho 21 ʼo Malesio.
2. Ko te ʼu puani fea ʼaē ʼe tonu ke kotou manatuʼi mokā kotou foaki ia te pepa fakaafe?
2 Te ʼu Puani Ke Manatuʼi: Kotou fakaʼaogaʼi lelei ia te ʼu pāki, mo te ʼu fehuʼi, pea mo te ʼu vaega ʼaē ʼe tuʼu ʼi te pepa fakaafe. Ohagē lā, ʼe feala ke kotou talanoa ki te pāki ʼi te ʼuluaki pāsina pea mo kotou ʼui fēnei: “ ʼE au fia fakaafe koe ke ke fakamanatu mo mātou ia te mate ʼa Sesu, ʼaē kā fai anai ʼi te Felianima, ʼaho 9 ʼo ʼApelili 2009.” Pea kotou talanoa ki te kupu tāfito ʼo te pepa fakaafe pea mo te ʼu fehuʼi ʼe tuʼu ʼi lalo. Kotou fakahā lelei kiā ia ʼe feala pē, kapau ʼe loto kiai, ke ina fakaafe tona fāmili pea mo he tahi pē ʼe fia haʼu mo ia.
3. Kapau neʼe kotou fai te fakaafe ʼi te kamata mai ʼo te tufa makehe, ʼe feafeaʼi hakotou hoko atu?
3 Kapau ʼe lahi ia te telituale ʼo takotou kōkelekāsio, ʼe feala ke ʼui atu e te kau tagata ʼāfea ke kotou tuku ia he ʼu pepa fakaafe ʼi te ʼu ʼapi ʼaē ʼe lāvaki. ʼI te ʼu fakaʼosi vāhaʼa, kotou tufa te ʼu nusipepa ʼo oloi kiai te pepa fakaafe. Kotou fakatuʼutuʼu ke kotou fakaafe takotou ʼu ʼaʼahi, mo te kau ako Tohi-Tapu, mo tokotou fāmili, mo te ʼu kaugā ako, te ʼu kaugā gāue, te ʼu vāhaʼa fale pea mo ʼihi atu hahaʼi ʼe kotou feʼiloʼiʼaki. ʼI te taʼu ʼaenī kua hili, ko te tuagaʼane neʼe ina fakaafe tona ʼu kāiga e toko 30 pea neʼe ina fakamanatuʼi tuʼumaʼu age kiā nātou ia te maʼuhiga ʼo te ʼaho ʼaia. Neʼe fiafia ʼaupitō he neʼe ko te toko 25 neʼe ʼomai, pea ki muli age ko te toko 4 neʼe natou tali hanatou ako Tohi-Tapu!
4. Koteā te ʼu fakatuʼutuʼu ʼe tonu ke tou fai ʼi te temi nei, pea koteā tona tupuʼaga?
4 Tou Fai He ʼu Fakatuʼutuʼu ʼi Te Temi Nei: Tokolahi te kau fai fakamafola ʼe lagi feala ke natou fakatuputupu tanatou gāue lolotoga ia te ʼu māhina ʼo Malesio pea mo ʼApelili. Kapau ʼe tuputupu lelei hakotou fānau peʼe ko hakotou kau ako Tohi-Tapu, ʼe lagi ko he temi lelei ʼaia maʼa nātou ke natou liliu ko he ʼu kaugā fagona. ʼE ko te temi ʼaenī ke tou kamata fai he ʼu fakatuʼutuʼu ke lahi hatatou kau ki te tufa makehe ʼaia, ʼaē ko te tala ki te hahaʼi ia te fakamanatu ki te ʼu faʼahi e lua ʼaē neʼe fakahā ai te ʼofa.—Soa. 3:16; 15:13.