Ko Te Tufa ʼo Te ʼu Pepa Fakaafe Ki Te ʼAho Fakamanatu ʼe Kamata ʼi Te ʼAho 2 ʼo ʼApelili
1. ʼI te taʼu ʼaenī, ko ʼafea ʼaē kā tou tufa ai te ʼu pepa fakaafe ki te ʼAho Fakamanatu, pea he koʼē ʼe maʼuhiga ia te gāue lahi ʼaia ʼi te taʼu ʼaenī?
1 ʼO kamata ʼi te ʼaho 2 ʼo ʼApelili ʼo aʼu ki te ʼaho 17 ʼo ʼApelili, ʼe tou tufa ai anai te ʼu pepa fakaafe ki te toʼotoʼoga ʼaē ʼe maʼuhiga ʼaupitō ʼi te taʼu, ia te Fakamanatu ʼo te mate ʼa Kilisito. ʼI te ʼu taʼu kua hili, tokolahi te hahaʼi neʼe fia logo neʼe natou tali lelei ki te fakaafe ʼaē neʼe fai age kiā nātou. Ohagē lā, ʼi te ʼaho ʼo te Fakamanatu, neʼe telefoni te fafine ki te filiale pea neʼe ina ʼui fēnei: “Ko taku hoki tau mai pē ʼaenī ki toku ʼapi, pea neʼe au maʼu te pepa fakaafe ʼi toku lalo matapā. ʼE au fia ʼalu atu ki te fakaafe, kae ʼe mole au ʼiloʼi lelei te hola ʼaē ʼe fai ai.” Neʼe fakamahino age e te tehina te faʼahi ʼo te pepa fakaafe ʼaē ʼe tohi ai te hola. Neʼe fakaʼosi e te fafine tanā fai palalau ʼaki tana fakapapau age fēnei: “ ʼE au ʼalu atu anai afiafi ki takotou toʼotoʼoga!”
2. Koteā ʼaē ʼe feala ke tou ʼui ʼi tatatou tufa te pepa fakaafe?
2 ʼE Feafeaʼi Anai Te Fai ʼo Te Tufa ʼAia? Mai tona ʼaluʼaga ʼaē ʼe fakatuʼakoi te temi ʼaē ʼe tonu ke tou gāueʼi ai te telituale, ʼe lelei ke nounou tatatou ʼu palalau ʼi te ʼu matapā. ʼE tou lava ʼui fēnei: “Mālo te maʼuli. ʼE mā fia tuku atu ki tou fāmili te pepa fakaafe ʼaenī ki he toʼotoʼoga maʼuhiga kā fai ʼi te taʼu ʼaenī, ʼe fai anai ʼi te mālamanei kātoa ʼi te ʼAhotapu, ʼaho 17 ʼo ʼApelili. [Kotou fakatoʼo age tana pepa fakaafe.] Ko te ʼaho ʼaia ʼe ko te ʼaho fakamanatu ʼo te mate ʼa Sesu. ʼE fai anai he akonaki Fakatohi-tapu, ʼe fakamahino ai peʼe koteā te ʼu lelei ʼe tou lava maʼu mai te totogi ʼaē neʼe foaki e Kilisito. ʼE fakahā ʼi te pepa fakaafe ʼaenī te koga meʼa ʼaē kā fai ai te fono pea mo tona hola.”
3. Koteā ʼaē ʼe feala ke tou fai ke lahi te hahaʼi ʼaē kā tou fakaafe?
3 Kapau ʼe lahi ia te telituale ʼo te kōkelekāsio, ʼe feala ke ʼui atu e te kau tagata ʼāfea ke kotou tuku he ʼu pepa fakaafe ʼi te ʼu ʼapi ʼaē ʼe lāvaki, pea mo kotou tōkakaga ʼo tuku ʼi he faʼahi ʼe ū lelei ki te hahaʼi. Kotou manatuʼi ʼo fakaafe takotou ʼu ʼaʼahi, mo tokotou ʼu kāiga, mo tokotou ʼu kaugā gāue, mo tokotou ʼu kaugā ako, pea mo ʼihi atu ʼe kotou feʼiloʼiʼaki mo nātou. Kā kotou kau ki te tufa ʼi te ʼu Moeaki pea mo te ʼu ʼAhotapu, kotou tufa mo te ʼu nusipepa mokā ʼe fealagia. ʼE feala koa ke kotou pioniē vaeluaʼi temi ʼi ʼApelili pea mo kotou lagolago mālohi ki te gāue fakafiafia ʼaia?
4. He koʼē ʼe tou loto ke kau te hahaʼi ʼaē ʼe fia logo ki te ʼAho Fakamanatu?
4 ʼE ko he fakamoʼoni mālohi ʼaē kā fai anai ki te hahaʼi fia logo ʼaē kā ʼomai ki te ʼaho ʼaia! ʼE natou logo anai ki te talanoa ʼo ʼuhiga mo te toe ʼofa lahi ʼo Sehova ʼi tana foaki ia te totogi. (Soa. 3:16) ʼE natou ako anai peʼe foaki feafeaʼi anai e te Puleʼaga ʼo te ʼAtua ia te ʼu lelei ki te mālamanei. (Isa. 65:21-23) ʼE toe fakaafe anai ia nātou ke natou fakaovi ki he tahi ʼi te nofoʼaki pea ke natou kole ke fai hanatou ako Tohi-Tapu mokā natou fia ʼiloʼi he tahi age ʼu manatu. ʼE tou faikole ke tali lelei e te hahaʼi tokolahi ʼaki he loto moʼoni ia te gāue makehe ʼaia pea ke natou fakatahi mo tātou ki te ʼAho Fakamanatu!