Te Tufa ʼi Te Mālamanei Kātoa ʼo Te ʼu Pepa Fakaafe Ki Te ʼAho Fakamanatu!
1. Koteā te gāue makehe kua fakatuʼutuʼu ʼi te mālamanei kātoa ʼi muʼa o te ʼAho Fakamanatu?
1 “Kotou haga fai te meʼa ʼaenī moʼo fakamanatu kiā te au.” (Luka 22:19) ʼO mulimuli ki te fakatotonu ʼaenī ʼa Sesu, ko te kau ʼatolasio ʼa Sehova ʼe natou fakatahitahi anai mo te hahaʼi ʼaē ʼe fia logo ki te moʼoni ʼi te ʼaho 30 ʼo Malesio 2010 moʼo fakamanatu ia te mate ʼo Sesu. ʼE tufa anai ia te pepa fakaafe makehe ki te ʼAho Fakamanatu ʼo kamata atu ʼi te ʼaho 13 ʼo Malesio ʼo aʼu ki te ʼaho 30 ʼo Malesio.
2. ʼE feafeaʼi hakotou lava tufa ia te pepa fakaafe?
2 Te Faʼahiga Tufa ʼo Te Pepa Fakaafe: ʼE lagi feala ke kotou fakatoʼo ia te pepa fakaafe ki te tagata ʼo te ʼapi, ke sio ki te pāki, pea mo kotou ʼui fēnei age: “ ʼI te afiafi ʼo te ʼaho 30 ʼo Malesio, ko te ʼu toko lauʼi miliona hahaʼi ʼe natou fakatahitahi anai ʼi te mālamanei kātoa moʼo fakamanatu ia te mate ʼa Sesu. Neʼe au haʼu ʼo foaki atu kiā koe mo tou fāmili ia te pepa fakaafe ʼaenī ke kotou kau kiai mo koutou. ʼE feala mo ʼou kaumeʼa ke ʼomai mo nātou ʼi te ʼaho ʼaia. ʼE tuʼu ʼi te pepa ia te hola pea mo te koga meʼa ʼaē kā fai ai anai te toʼotoʼoga ʼo te ʼAho Fakamanatu.” ʼO mulimuli pē ki te ʼaluʼaga ʼo te hahaʼi, ʼe feala anai ke kotou fakahā age ia te fakatotonu Fakatohi-tapu ʼaē iā Luka 22:19, pea mo kotou lau age kiā nātou. Kae kotou manatuʼi, mai tona ʼaluʼaga ʼaē ʼe fakatuʼakoi te temi ʼaē ke fai kātoa ai ia te telituale, ʼe tonu ke nounou ia te fai palalau.
3. Ko ai ia nātou ʼaē ʼe feala ke kotou fakaafe?
3 Kapau ʼe lahi te telituale ʼo tokotou kōkelekāsio, ʼe feala ke ʼui atu e te kau tagata ʼāfea ke kotou tuku ia te ʼu pepa fakaafe ʼi te ʼapi ʼaē ʼe kotou maʼu atu ʼe lāvaki. Kapau ʼe fealagia, kotou tufa fakatahi ia te ʼu nusipepa mo te pepa fakaafe. Kotou fakaafe te ʼu hahaʼi ʼe kotou ʼaʼahi, mo takotou kau ako Fakatohi-tapu, mo tokotou ʼu kaugā gāue, mo tokotou ʼu kaugā ako, mo tokotou fāmili, mo tokotou ʼu vāhaʼa fale, pea mo ʼihi hahaʼi ʼe feʼiloʼiʼaki mo koutou.
4. Ko tatatou fakafetaʼi ki te ʼofa ʼo Sehova ʼi tana foaki mai ia te totogi, ʼe ina uga anai tātou ke tou fai ia teā?
4 Kotou Teuteu Ke Lahi Hakotou Kau Ki Te Tufa ʼo Te Pepa Fakaafe: Ko te temi ʼo te teuteu ki te ʼAho Fakamanatu ʼe ko he temi lelei ʼaia ke fakalahi ai ia totatou minisitelio. ʼE feala koa hakotou fakatuʼutuʼu ke kotou pioniē vaeluaʼi temi? ʼE ʼi ai koa hakotou fānau peʼe ko hakotou kau ako Fakatohi-tapu ʼe lelei ia tanatou tuputupu fakalaumālie? Kapau ko ia, kotou felōgoi mo te kau tagata ʼāfea ʼo ʼuhiga mo nātou ʼaia, ke natou vakaʼi peʼe kua natou maʼu ia te ʼu kalitātē feʼauga ʼaē ke natou kau ki te fakatuʼutuʼu makehe ʼaia, ke natou liliu ko he ʼu kaugā fai fakamafola mole heʼeki papitema. Ko tatatou fakafetaʼi ki te ʼofa ʼo Sehova ʼi tana foaki mai ia te totogi, ʼe mole ina uga pē anai tātou ke tou kau ki te ʼAho Fakamanatu, kae ke tou toe fakaafe foki mo he tokolahi ke natou kau mo nātou ki te toʼotoʼoga ʼaia.—Soa. 3:16.