ʼE Kamata ʼi Te ʼAho 1 ʼo Malesio Ia Te Tufa ʼo Te Pepa Fakaafe Ki Te ʼAho Fakamanatu
1. Ko ʼafea ʼae ka kamata ai anai ia te fakaafe ki te ʼAho Fakamanatu, pea he ko ʼe ʼe loaloaga age ia te temi tufa ʼo te pepa fakaafe?
1 ʼI te Feliaono ʼaho 1 ʼo Malesio, ʼe tou kamata fakaafe anai ia te hahaʼi ke natou fakatahi mo tatou ki te toʼotoʼoga ʼo te ʼAho Fakamanatu. ʼE fai anai ia te ʼAho Fakamanatu ʼi te ʼaho 26 ʼo Malesio, koia ʼo fakatatau ki te ʼu taʼu ʼae ʼe loaloaga age ia te temi tufa ʼo te pepa fakaafe ʼaeni. ʼE fakatuʼutuʼu ia te faʼahi ʼaia moʼo fakafealagia ki te hahaʼi fuli ke natou maʼu ia tanatou kiʼi pepa fakaafe, tafitō ia natou ʼae ʼe maʼuʼuli ʼi te ʼu telituale ʼae ʼe tuʼu mamaʼo.
2. Kotea te ʼu fakatuʼutuʼu ki te maʼu pea mo te tufa ʼo te ʼu pepa fakaafe ʼi totatou telituale?
2 Kotou Fai He ʼu Fakatuʼutuʼu: ʼE fai anai e te ʼu tagata ʼafeā ia he ʼu fakatuʼutuʼu ʼo ʼuhiga mo te tufa ʼo te ʼu pepa fakaafe ʼi totatou telituale, pea mo toʼo he tonu pe tonu ke tou tuku he ʼu pepa fakaafe ʼi te ʼu ʼapi ʼae ʼe lavaki. Kapau ʼe kei toe he ʼu pepa fakaafe ʼi te ʼosi tufa ʼi te ʼu ʼapi fuli, ʼe feala tona tufa ʼi te ʼala pe ko te ʼu koga meʼa ʼae ʼe maʼu ai te hahaʼi. ʼE tokaga anai ia te taupau gaue ke lahi feʼauga ia te ʼu pepa fakaafe maʼa te kau faifakamafola fuli, pea ʼe foaki liuliuga anai ia te ʼu pepa fakaafe ʼaia ʼi te ʼu fono. ʼE tonu anai ke tou tahi toʼo pe ia te ʼu pepa ʼae ʼe tou fakatuʼutuʼu ke tou tufa ʼi te vahaʼa.
3. Kotea ʼae ʼe tonu ke tou manatuʼi moka tou tufa ia te ʼu pepa fakaafe?
3 Kotea Te ʼu Palalau ʼAe Ka Tou Fai Anai?: ʼE lelei ke nounou ʼatatou palalau, ke feala hatatou gaueʼi katoa totatou telituale. ʼE tou maʼu ʼi te pasina 4 ia te ʼu palalau ʼe feala ke tou faʼifaʼitakiʼi ʼo mulimuli ki te agaaga ʼo te hahaʼi ʼo totatou telituale. ʼE mole tonu ke tou foimo mavae atu mo kapau ʼe fia fai mai e he tahi ia hana fehuʼi. ʼE feala ke tou tufa fakatahi ia te ʼu pepa fakaafe mo te ʼu nusipepa ʼi te fakaʼosi vahaʼa. ʼI te ʼaho 2 ʼo Malesio, ʼe tou tokaga tafitō anai ki te tufa ʼo te pepa fakaafe ʼi hatatou kamata he ʼu ako Tohi-Tapu.
4. He ko ʼe ʼe tonu ke tou lagolago malohi ki te tufa ʼo te ʼu pepa fakaafe?
4 ʼE tou fakaʼamu ʼe hahaʼi anai ia natou ʼae ka ʼomai ki te ʼAho Fakamanatu. ʼE fakamahino anai ʼi te akonaki pe ko ai moʼoni ia Sesu. (1 Ko. 11:26) ʼE fakaha ai anai pe tokoni feafeaʼi mai ia tana mate kia tatou. (Loma 6:23) Pea ʼe talanoa anai ki te maʼuhiga ʼae ke tou manatuʼi ia ia. (Soa. 17:3) ʼOfa pe ke tou lagolago malohi ki te tufa ʼaia!