Tou Liliu Ko He Tokoni Lelei ʼi Te ʼu Muʼa Matapā
1. Koteā ia te ʼu lelei ʼe tou maʼu mokā tou ʼolo mo he kaugā fagona ʼi te minisitelio?
1 ʼI te tahi lakaga, neʼe fekauʼi e Sesu te ʼu tisipulo e toko 70 ke natou ʼolo ʼo fai fakamafola, pea neʼe ina “fekauʼi taki toko lua ia nātou.” (Luka 10:1) ʼE mahino ia, ko te fakatuʼutuʼu ʼaia neʼe fakafealagia ai ki tana ʼu tisipulo ke natou fetokoniʼaki pea mo fefakalotomālohiʼaki ʼi tanatou fai fakamafola. Kā tou ʼolo mo he kaugā fagona ʼi te minisitelio, ʼe lava feafeaʼi hatatou liliu ko he tokoni lelei kiā ia?
2. Kā fai e tokotou kaugā fagona ia tana ʼuluaki palalau, ʼe tonu ke feafeaʼi tatatou fakalogo, pea koteā tona tupuʼaga?
2 Tou Fakalogo Lelei: Kotou fakalogo lelei mokā fai e tokotou kaugā fagona ia tana ʼu ʼuluaki palalau. (Sake 1:19) Kapau ʼe lau ia he vaega, kotou mulimuli ʼi takotou Tohi-Tapu. Kotou sioʼi ia ia ʼaē ʼe palalau, peʼe ko tokotou kaugā fagona peʼe ko ia ʼo te ʼapi. Kapau ʼe kotou fakalogo lelei ki te fai palalau, pea ʼe feala ke uga ai ia ia ʼo te ʼapi ke toe fakalogo lelei mo ia.
3. Ko te temi fea ʼaē ʼe leleiʼia ai anai e totatou kaugā fagona ke tou palalau?
3 Tou ʼIloʼi Te Temi ʼAē ʼe Tonu Ai Ke Tou Palalau: Kā lolotoga fai e tokotou kaugā fagona tana ʼu ʼuluaki palalau, ʼe tou fakaʼapaʼapa kiā ia ʼaki tatatou tuku ʼaē ke ina takitaki ia te fai palalau. (Loma 12:10) ʼE mole tonu ke tou tuʼusi tana palalau. Kapau ʼe mole kei ina manatuʼi te ʼu meʼa ʼaē neʼe fia palalau kiai peʼe kapau ʼe fai e te tagata peʼe ko te fafine he palalau fakafeagai peʼe ko he fehuʼi pea kole mai e te kaugā fagona ke tou tokoni age, ʼe tou hoko atu anai ʼo mulimuli pē ki te ʼu manatu ʼaē neʼe talanoa kiai kae mole tou palalau ki he tahi age manatu. (Taag. 16:23; Taag. 3:1, 7) Kapau ʼe tou palalau, pea ʼe tonu ke lagolago tatatou ʼu palalau ki te fakamafola ʼo te logo ʼaē neʼe fakahā age.—1 Ko. 14:8.
4. Koteā ʼaē kā tokoni mai anai ke tou fiafia ai pea ke fua lelei ia tatatou minisitelio?
4 ʼI te ʼosi fai fakamafola ʼa te ʼu tisipulo ʼe toko 70 ʼaē neʼe ʼolo taki toko lua, neʼe natou ‘toe liliu ʼi te fiafia.’ (Luka 10:17) ʼE tou toe fiafia mo tātou pea ʼe fua lelei tatatou minisitelio mokā tou fakalogo pea mo ʼiloʼi te temi ʼaē ʼe tonu ke tou palalau ai, ke tou liliu ai ko he tokoni ki totatou kaugā fagona ʼi te ʼu muʼa matapā.