Tou Tokoni Kia Ia ʼAe ʼe Tou Kaugā Gaue
1. Ka tou kaugā gaue mo he tahi ʼi te minisitelio, ʼe tou lava faʼifaʼitakiʼi feafeaʼi ia te apositolo ko Paulo?
1 Maʼa te apositolo ko Paulo, ko te temi ʼae neʼe fakatahi ai mo ʼona tehina neʼe ko he faigamalie ʼaia ke natou fefakalotomalohiʼaki. (Loma 1:12) Ka ke kaugā gaue mo he tahi ʼi te minisitelio, ʼe ke fakaʼaogaʼi koa te temi ʼaia moʼo fakalotomalohiʼi pea mo tokoni ki ai? He ko ʼe koa ʼe mole ke tokoni ki ai ke lelei age tana faifakamafola?
2. Kotea ʼae ʼe feala ke tou fai ke toe lotofalala ia ia ʼae ʼe tou kaugā gaue, pea he ko ʼe ʼe maʼuhiga te faʼahi ʼaia?
2 Ke Toe Lotofalala Mo Ia: Ko ʼihi kau faifakamafola ʼe mole natou lotofalala, pea ʼe feala ke ha te faʼahi ʼaia ʼi ʼonatou fofoga peʼe ʼi ʼonatou leʼo. ʼE feala ke natou lotofalala mo kapau ʼe tou fakamalō age ki ʼanatou faiga. Kotea te ʼu tokoni ʼe feala ke tou fai ke natou toe lotofalala mo natou? Ohage la, ko te taupau feʼaluʼaki ʼe ina fakaha kia ia ʼae ʼe nā kaugā gaue, maʼia mo ia ʼe mataku pea ʼe faikole tuʼumaʼu ke feala hana tauʼi tana mataku. Pea neʼe fakaha e te tahi tehina te faʼahi ʼaeni neʼe tokoni kia ia ke lotofalala: “ ʼE tonu ke au malimali. ʼI ʼihi temi ʼe tonu ke au faikole ke feala haku malimali.” Kia koutou, ʼe ʼi ai koa he faʼahi neʼe tokoni atu ke kotou lotofalala ʼi te minisitelio? Kotou vaevae te faʼahi ʼaia mo ia ʼae ʼe kotou kaugā gaue.
3. Kotea ʼae ʼe feala ke ke vaevae mo ia ʼae ʼe kolua kaugā gaue moʼo tokoni ki ai ke fua lelei tana minisitelio?
3 Vaevae Mo Ia Au Faʼahiga Fai: ʼE ʼi ai koa hau ʼu ʼuluaki palalau peʼe ko hau fehuʼi ʼe faigafua, lagi ʼo ʼuhiga mo he aluʼaga neʼe hoko ʼi te fenua, ʼe lelei moʼo kamata ʼaki he ʼu faipalalau? ʼE ʼi ai koa hau faʼahiga fai ʼo ʼuhiga mo te ʼu ʼuluaki palalau ʼae kua ʼosi teuteuʼi, pea neʼe ke tokagaʼi ʼe ʼi ai tona fua ʼi te faifakamafola? Vaevae mo ia ʼae ʼe kolua kaugā gaue. (Taag. 27:17) ʼI tau toe liliu ʼo fai he ʼaʼahi, ʼe feala ke ke fakaha age pe kotea ʼae neʼe ke teuteuʼi pea mo feafeaʼi anai tau fai te faʼahi ʼaia. Hili he ako Tohi-Tapu, ʼe feala ke ke fakamahino age kia ia ʼae ʼe kolua kaugā gaue pe ko ʼe neʼe ke filifili he manatu, peʼe ko he vaega, peʼe ko he faʼahiga faiako moʼo tali ki te ʼu meʼa ʼae ʼe ʼaoga kia ia ʼae ʼe ako.
4. He ko ʼe ʼe tonu ke maʼuhiga kia tatou hatatou tokoni ki ʼotatou tehina mo tuagaʼane ʼi te minisitelio?
4 Ko te kau ʼuluaki faifakamafola neʼe mole natou fia tokoni pe kia natou ʼae neʼe mole tui. Neʼe natou toe tokagaʼi ia te maʼuhiga ʼae ke natou fefakalotomalohiʼaki pea mo fefakamalohiʼaki. (Gaue 11:23; 15:32) Ko te apositolo ko Paulo neʼe ina akoʼi te tupulaga ko Timoteo pea neʼe ina fakalotomalohiʼi ia ia ke ina vaevae mo ʼihi te ʼu meʼa ʼae neʼe ina ako. (2 Tim. 2:2) Ka tou manatuʼi ʼo fai te meʼa ʼae ʼe lelei ki ʼotatou tehina mo tuagaʼane ʼi te minisitelio, ʼe tuputupu ai tonatou fiafia pea mo te lelei ʼo tanatou faifakamafola, pea ʼe tou toe fakafiafiaʼi ai te loto ʼo tatatou Tamai ʼae ʼe ʼi selo.—Hep. 13:15, 16.