Tou Fakakolōliaʼi Ia Sehova ʼAki He ʼu Gāue Lelei
1 Kā hoko he ʼafā kae ʼe tou ʼi tuʼa, ʼi meʼa lelei hatatou maʼu he malumaluʼaga! Pea kapau ʼe kotou maʼu ai te māfana pea mo te fīmālie pea mo te tali kāiga lelei ʼa te hahaʼi ʼo te nofoʼaga ʼaia, ʼe kotou fiafia ʼi te nofo ai. Ko te gāue fai fakamafola ʼo te Puleʼaga ʼe ina taki te hahaʼi ki he faʼahiga malumaluʼaga fēia, ʼe puipui ai ia nātou mai te tuʼu ʼa Satana. ʼE feala koa, ʼaki tatatou aga ʼi te ʼaho fuli, ke tou tokoni ki te hahaʼi ke natou sio ki te lelei ʼo te malumaluʼaga ʼaia? ʼEī, he neʼe ʼui e Sesu ko te hahaʼi ʼe natou ‘sio anai ki tatatou ʼu gāue lelei pea mo natou fakakolōlia ai ki tatatou Tamai ʼaē ʼe ʼi selō.’—Mat. 5:16.
2 Koteā ʼaē ʼe feala ke tou fai ke taki mai ia te hahaʼi kiā Sehova pea mo tana kautahi ʼuhi ko tatatou ʼu gāue? Tou maʼuliʼi ʼi te ʼaho fuli te ʼu folafola ʼa Sesu ʼaē ʼe tuʼu iā Luka 6:31 pea mo 10:27. ʼE uga anai ia tātou ke tou fakahā he tokaga ʼofa ki totatou kāiga, ʼo mole tou hagē ai ko te mālama ʼaenī ʼaē ʼe mole kei ʼoʼofa pea ʼe mole kei tōkakaga ki te hahaʼi.
3 Ko te tuagaʼane ʼi te vaka neʼe ina tokagaʼi te fafine, ʼi te kovi ʼaupitō ʼo tana fatu kovi, neʼe mole feala hana tokaga ki tana kiʼi toe. Neʼe kole age e te tuagaʼane peʼe feala hana tokaga ki te toe. ʼI te fehuʼi age e te fafine peʼe koteā ʼaē ʼe feala ke ina fai moʼo fakamālo ki ai, neʼe ʼui fēnei age e te tuagaʼane: ‘Kā fakalaka te kau Fakamoʼoni ʼa Sehova iō koe, pea ke ke fakalogo kiā nātou.’ Neʼe fai e te fafine te faʼahi ʼaia, pea ʼi te temi nei, ko ia pea mo tona ʼohoana kua nā liliu ko te ʼu Fakamoʼoni. Neʼe fetogi tanā manatu ʼo ʼuhiga mo te logo ʼo te Puleʼaga ʼuhi ko te ʼu gāue lelei ʼo totatou tuagaʼane.
4 ʼE Tou Fai Te ʼu Gāue Lelei ʼi Te ʼu ʼAluʼaga Fuli ʼo Totatou Maʼuli: Ko te manatu ʼaē ʼe maʼu e te hahaʼi ʼo ʼuhiga mo tātou pea mo tatatou lotu, ʼe tupu mai tanatou sio ki tatatou aga ʼi totatou ʼapi, ʼi te gāue peʼe ʼi te faleako, pea mo lolotoga te ʼu temi fakafiafia. Koia, ʼe lelei ke tou fai te ʼu fehuʼi ʼaenī: ‘Koteā te manatu ʼa te hahaʼi ʼi tanatou sisio mai kiā au pea mo toku fāmili? ʼE sio koa e toku vāhaʼa fale ko toku ʼapi pea mo toku malaʼe ʼe maʼa pea mo au tokaga lelei kiai? ʼE sio koa e totatou ʼu kaugā gāue pea mo nātou ʼi te faleako ʼe tou tautonu mai pea mo tou faʼa gāue? ʼE manatu koa e ʼihi ko tatatou faʼahiga teuteu pea mo te faʼu ʼo totatou ʼulu ʼe fakaʼeteʼete pea mo fakaʼapaʼapa?’ ʼAki tatatou ʼu gāue lelei ʼe feala ke lahi age te fia ʼiloʼi ʼa te hahaʼi ia te tauhi ʼaē kiā Sehova.
5 Neʼe fakatokaga e Petelo ki te kau Kilisitiano ʼe manukiʼi anai nātou e te hahaʼi. (1 Pet. 4:4) ʼE tonu ke tou vakavakaʼi fakalelei ke mole tupu te ʼu palalau kovi ʼaia ʼuhi ko tatatou aga. (1 Pet. 2:12) Kapau ko te ʼu gāue ʼaē ʼe tou fai ʼi te ʼaho fuli ʼe natou fakakolōliaʼi te ʼAtua ʼaē ʼe tou tauhi ki ai, pea ʼe tou hagē anai ko he ʼu mālama ʼe gigila, ʼo tou fakaʼiloʼilo ki te hahaʼi te malumaluʼaga ʼaē ʼe foaki mai e Sehova.—Mat. 5:14-16.