Tokoni Ki Te Kau Ako Ke Natou Takitaki Hanatou Ako Tohi-Tapu
1 Ka kamata faifakamafola he tahi, ʼe lagi ina tuʼania tana kamata hana ako Tohi-Tapu. Kaʼe ʼe ko te gaue maʼuhiga ʼaia ʼi tatatou minisitelio. ʼE tou lava tokoni feafeaʼi kia natou ke natou maʼu he manatu ʼe lelei ʼo ʼuhiga mo te faʼahi ʼaia?—Mat. 24:14; 28:19, 20.
2 ʼAki tanatou kua kau ʼae ki te Ako Fakateokalatike, kua feala leva ki te kau ako ke natou kaugā fagona mo tatou ʼi te gaue faifakamafola. Neʼe natou akoako muʼa ke natou popoto ʼi te teuteuʼi ʼo he akonaki peʼe ko he faipalalau. Neʼe natou ako ai te ʼu fealagia ke natou liliu ai ko he ʼu hahaʼi ‘neʼe fakamoʼoni, ʼae ʼe mole natou ufiufi ʼi tanatou gaue, pea ʼe natou ʼave fakahagatonu te folafola ʼo te moʼoni.’—2 Tim. 2:15.
3 Kotou Tuku He Faʼifaʼitaki Lelei: Neʼe akoʼi fakalelei e Sesu ki ʼana tisipulo pea mo tuku he faʼifaʼitaki lelei kia natou. Neʼe ina ui fenei: “Ko ʼae ʼe lelei tona akoʼi, ʼe liliu anai ohage ko tana faiako.” (Luka 6:40, MN) ʼE maʼuhiga ke kotou faʼifaʼitakiʼi ia Sesu ʼo kotou tuku he faʼifaʼitaki lelei ʼi takotou faifakamafola. ʼE tokagaʼi anai e takotou ako ia takotou faʼahiga faifakamafola. ʼE mahino ai leva ki takotou faiga ʼae ke kotou ʼaʼahi he tahi pea mo faiga ke kotou kamata he ako Tohi-Tapu.
4 Kotou fakamahino age kia ia moka kotou foaki he tohi ʼe mole ʼaoga ke kotou fakahaha katoa te faʼahiga fai ʼo he ako Tohi-Tapu. ʼE lagi lelei ke kotou faʼifaʼitakiʼi he ako ʼaki pe he palakalafe ʼe tahi peʼe lua ʼo te tohi ako.
5 Kapau ʼe feala, fakaafe takotou ako ke kolua kaugā olo ʼo fai he ako, peʼe ke alu mo he tahi tehina peʼe tuagaʼane. ʼE feala ke ina fakamahino he manatu peʼe ko he vaega Tohi-Tapu ʼi te palakalafe. Koia ʼe feala ai kia ia ke ina akoako ai te faʼahiga takitaki ʼo he ako. (Taag. 27:17; 2 Tim. 2:2) Fakamalō ki ai pea ke tokoni ki ai ke feala hana tuputupu ʼi te fakahoko ʼo he ʼu ako Tohi-Tapu.
6 ʼE tonu ke tou akoʼi ia te ʼu kaugā fagona ʼae ʼe kei foʼofoʼou ke natou liliu ko he ʼu faiako ʼo te Folafola ʼa te ʼAtua. ʼI tatatou fai ia te faʼahi ʼaia, ʼe tou teuteuʼi ia natou ke natou fai he ʼu “gaue lelei,” ko tona fakaʼuhiga ke natou takitaki he ʼu ako. (2 Tim. 3:17) ʼE tou fiafia ʼi te gaue fakatahi mo natou pea mo te fai ʼo te fakaafe ʼaeni: “Pea ko ʼae ʼe fia inu ke haʼu; ko ʼae ʼe loto ki ai, ke ina toʼo noa te vai ʼo te maʼuli.”—Apk. 22:17, MN.