“Neʼe Ina Fakafonu Toku Loto”
“ ʼE ʼAU fakamālo ʼaupito atu kia koutou ʼuhi ko te meʼa ʼofa matalelei ʼaenī, te tohi Approchez-vous de Jéhovah. Neʼe ina fakafonu toku loto—he neʼe ʼaoga ke ʼau logoʼi ʼe ʼofa Sehova kia ʼau pea mo ʼau maʼuhiga kia te ia. ʼI te temi nei kua ʼau ōvi ʼaupito kia Sehova pea mo tona ʼAlo ʼofaina. ʼE ʼau fia palalau ki te hahaʼi fuli ʼo ʼuhiga mo te tohi ʼaenī pea mo foaki te tohi ʼaia kia nātou fuli ʼaē ʼe ʼau ʼofa ki ai.” Neʼe ko te manatu ʼaia ʼa te Fakamoʼoni ʼa Sehova ʼo ʼuhiga mo te tohi foʼou e pasina 320, ʼaē neʼe fakahā ʼi te ʼu Fakatahi Faka Tisitilike “Te Kau Fai Faka Mafola Faʼafai ʼo Te Puleʼaga,” ʼaē neʼe fai ʼi te ʼu taʼu 2002 mo te 2003. Tou vakaʼi he ʼu agaaga ʼo te tohi foʼou ʼaia pea he koʼe neʼe tā.
He ʼu Agaaga ʼo Te Tohi Foʼou
Koteā ʼaē ʼe tou maʼu ʼi te tohi foʼou ʼaia? ʼE tou maʼu ai te ʼu manatu fuli ʼaē ʼe fakahā ʼi te ʼu alatike ako e lua ʼo Te Tule Leʼo ʼaenī—pea mo te tahi atu ʼu manatu! Ko kapite e 31 ʼi te tohi ʼaia, ʼe tatau tonatou loaloaga mo te ʼu alatike ako ʼo Te Tule Leʼo. Hili te ʼu ʼuluaki palalau pea mo te ʼu ʼuluaki kapite e tolu, ʼe vaevae te tohi ia koga e fā, ʼe tahi talanoa ki te ʼu kalitate maʼuhiga takitahi ʼo Sehova. ʼE kamata te ʼu faʼahi fuli ʼaki he fakasiosio ʼo te kalitate. ʼE vakaʼi ʼi te ʼu kapite ʼaē ʼe hoa kiai peʼe fakahā feafeaʼi e Sehova te kalitate ʼaia. Ko te ʼu koga takitahi ʼaia ʼe maʼu ai he kapite ʼo ʼuhiga mo Sesu. Koteā tona tupuʼaga? He neʼe ʼui fēnei e Sesu: “Ko ʼaē kua sio kia te ʼau, kua sio ia ki te Tāmai.” (Soane 14:9, MN ) Neʼe faʼifaʼitakiʼi lelei e Sesu ia Sehova, koia ʼe ina foaki mai kia tatou he ʼu faʼifaʼitaki neʼe ina fakahā ai te ʼu kalitate ʼo te ʼAtua. ʼE fakaʼosi te ʼu faʼahi fuli ʼaia ʼaki he kapite ʼe ina akoʼi mai peʼe feafeaʼi hatatou fakahā te kalitate ʼaē neʼe vakaʼi moʼo faʼifaʼitakiʼi ʼo Sehova. ʼE vakaʼi e te tohi foʼou ʼaia te ʼu kalitate ʼo Sehova, ʼo ina fakaʼaogaʼi te ʼu tohi fuli ʼo te Tohi-Tapu.
ʼE tou toe maʼu ʼi te tohi Approchez-vous de Jéhovah te tahi ʼu faʼahi. ʼO kamata ʼi te kapite 2, ʼe maʼu he talanoa ʼi te ʼu kapite ko tona kupu tāfito “He ʼu Faʼahi Ke Metitasioʼi.” Ko te ʼu vaega pea mo te ʼu fehuʼi ʼaē ʼe tuʼu ai ʼe mole ko he toe fakamanatu ʼo te kapite. Kae ʼe tokoni mai ke tou fakaʼaogaʼi te Tohi-Tapu moʼo metitasio lahi ki te meʼa ʼaē neʼe talanoa kiai te kapite. ʼE fakaloto mālohiʼi koutou ke koutou lau fakalelei te ʼu vaega fuli ʼo te Tohi-Tapu. Koutou fakakaukauʼi te fehuʼi pea mo koutou faiga ke koutou vakaʼi tona ʼaoga kia koutou. Ko takotou metitasio ʼaia ʼe feala ke malave ki tokotou loto, ʼo tokoni atu ke koutou fakaōvi lelei kia Sehova.—Pesalemo 19:14.
Ko te ʼu paki ʼaē ʼe tuʼu ʼi te tohi Approchez-vous de Jéhovah neʼe kumikumi pea mo teuteuʼi lelei moʼo akoʼi te hahaʼi pea mo uga nātou. Ko kapite e hogofulu-ma-fitu ʼe tuʼu ai ʼi ʼihi pasina katoa te ʼu paki faka Tohi-Tapu.
He Koʼe Neʼe Tā?
He koʼe neʼe tā te tohi Approchez-vous de Jéhovah ? Neʼe tā te tohi foʼou ʼaia ʼuluaki moʼo tokoni mai kia tatou ke tou ʼiloʼi lelei age ia Sehova, ke feala ke mālohi tatatou felogoi lelei mo totatou ʼAtua.
ʼE ʼi ai koa he tahi ʼe feala ke ʼaoga kia ia te tohi Approchez-vous de Jéhovah, lagi ko he tahi ʼe ako peʼe ko he tēhina peʼe ko he tuagaʼane ʼe mole kei fai faka mafola? E feafeaʼi kia koutou—neʼe kua koutou kamata lau koa te tohi foʼou ʼaia? Kapau ʼe mole heʼeki koutou fai, he koʼe koa ʼe mole koutou foimo fakatuʼutuʼu he temi ke koutou kamata ai? Koutou toʼo he temi ke koutou fakakaukauʼi te meʼa ʼaē ʼe koutou lau. ʼOfa pe ke tokoni atu te tohi foʼou ʼaia ke koutou fakaōvi lelei kia Sehova ʼAtua, ke koutou faka mafola ai te logo lelei ʼo te Puleʼaga ʼaki he fiafia pea mo he faʼafai lahi!