He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo ʼAukusitō

“Kaugamālie te hahaʼi ʼe natou lau liuliuga te ʼu palalau ʼaenī ʼo te Faikole ʼo Te Tamai ʼaē ʼe ʼi selō: ‘Ke haʼu tou pule. Ke fai tou finegalo ʼi te kele ohagē ko selō.’ ʼI tau manatu lā, koteā koa te Puleʼaga ʼaia? [Tuku ke fai mai hana tali.] ʼE tou maʼu tona fakamatala ʼi te vaega ʼaenī.” Kotou lau age ia Taniela 2:44. Kotou tuku age Te Tule Leʼo ʼo te ʼaho 1 ʼo ʼAukusitō, pea kotou vakaʼi fakatahi ia te manatu ʼaē ʼi te ʼuluaki kupu taki ʼi te pāsina 30 pea mo kotou lau age he vaega Fakatohi-tapu ʼe tuʼu ʼi ai. Kotou tuku age te ʼu nusipepa, pea kotou fakatuʼutuʼu ke kotou toe liliu age ke kotou vakaʼi fakatahi te tali ki te fehuʼi ʼaē ʼe hoa mai kiai.

Te Tule Leʼo ʼaho 1 ʼo ʼAukusitō

“Mai tona ʼaluʼaga ʼaē ʼe nounou te maʼuli pea mo lahi ʼaupitō ia te ʼu fihifihia ʼi totatou maʼuli, tokolahi te hahaʼi ʼe natou feʼekeʼaki peʼe ʼi ai koa he ʼuhiga ʼo te maʼuli. Neʼe heʼeki ke fakakaukauʼi koa te faʼahi ʼaia? [Tuku ke fai mai hana tali.] ʼE fakapapau mai ʼi te Tohi-Tapu, ʼe mole fēia tuʼumaʼu anai ia te maʼuli. [Kotou lau age ia Fakahā 21:4.] ʼE fakamahino ʼi te nusipepa ʼaenī ia te fakatuʼutuʼu ʼa te ʼAtua ʼo ʼuhiga mo te kele, pea mo te meʼa ʼaē ʼe tou lava fai ke ʼi ai he ʼuhiga ʼo totatou maʼuli, ʼo kamata atu nei ʼi te temi nei.”

Réveillez-vous! ʼo ʼAukusitō

“ ʼE au fia ʼiloʼi pe koteā tau mahino ki te vaega ʼaenī. [Kotou lau age ia 1 Samuele 16:23.] ʼI tona fakamatala ʼaenī, ʼe feala ki te musika ke malave mālohi ki totatou maʼuli. ʼI tau manatu lā, ʼe feala ʼapē ki te musika ke ʼi ai hona fua kovi kiā tātou? [Tuku ke fai mai hana tali.] ʼE fakahā ʼi te nusipepa ʼaenī peʼe feafeaʼi hatatou filifili he ʼu musika ʼe lave lelei kiā tātou, pea ʼe feafeaʼi hatatou tokoniʼi tatatou fānau ke natou filifili fakapotopoto mo nātou te ʼu musika ʼaē kā lave lelei anai kiā nātou.”