Ke Tuputupu Te Pulapula ʼe Tonu Ke Fakavai
1. Koteā ʼaē ʼe tonu ke fakavai ke tuputupu?
1 Ko te pulapula ʼaē neʼe nunusi ki he ʼōloto, ʼe tonu ke fakavai ke tuputupu. ʼE toe moʼoni foki ki te pulapula ʼo te moʼoni ʼaē neʼe nunusi ki te loto ʼo te hahaʼi ʼo tatatou telituale. (1 Ko. 3:6) Kapau ʼe tou loto ke aka, mo tuputupu pea mo fua, pea ʼe tonu ke tou toe liliu ʼo ʼaʼahi te hahaʼi pea mo fakavai te pulapula fakatā ʼaia ʼaki te Folafola ʼa te ʼAtua.
2. ʼI te ʼuluaki fai palalau ʼe feafeaʼi hakotou fakatuʼutuʼu ia te ʼaʼahi?
2 Lagaʼi He Fehuʼi: ʼI te temi ʼaē ʼe kotou teuteuʼi ai takotou fai fakamafola, kotou kumi he fehuʼi fakatupu fia logo ʼe feala anai ke kotou tali kiai ʼi te temi ʼaē ʼe kotou liliu ai ʼo fai te ʼaʼahi. Kotou lagaʼi te fehuʼi ʼaia ʼi te fakaʼosi ʼo takotou ʼuluaki fai palalau, pea mo fai he fakatuʼutuʼu ke kotou toe liliu ʼo ʼaʼahi ia ia. Maʼa te tokolahi, ʼe lelei te filifili he ʼu manatu ʼo te tohi Te Ako Mai Te Tohi-Tapu moʼo fakahā fakanounou ki te hahaʼi te faʼahiga fai ʼo he ako Tohi-Tapu.
3. Koteā te ʼu nota ʼe feala ke kotou tohi ʼo ʼuhiga mo he tahi neʼe fia logo?
3 Nota: ʼI te hili pē ʼo takotou ʼuluaki fai palalau, kotou toʼo he temi moʼo tohi he ʼu nota. Kotou tohi tona higoa mo tona tuʼasila. ʼE toe lelei foki ke kotou tohi te ʼaho mo te hola ʼaē neʼe kotou fai palalau ai, mo te ʼu manatu ʼaē neʼe kotou talanoa kiai, pea mo te tohi ʼaē neʼe kotou tuku age. Neʼe ina ʼui atu koa peʼe kau ki he lotu? ʼE ʼi ai koa hona fāmili? Neʼe talanoa koa ki he ʼu meʼa ʼe ina leleiʼia pea mo he ʼu meʼa ʼe tuʼania kiai? Ko te ʼu manatu ʼaia, ʼe tokoni atu anai ki te teuteuʼi lelei ʼo takotou ʼu palalau ki te hoko atu ʼo te fai palalau. Kotou toe tohi te ʼaho ʼaē ʼe kotou liliu anai ki ai pea mo te fehuʼi ʼaē kā kotou tali anai kiai.
4. He koʼē ʼe tonu ke tou faʼa kātaki ʼo ʼuhiga mo te toe ʼaʼahi ʼo he tahi neʼe fia logo?
4 Faʼa Kātaki: ʼE mole mālōlō anai ia Satana ʼi tana faiga ʼaē ke ina “too te folafola” ʼaē neʼe nunusi ki te loto ʼa te hahaʼi. (Mko. 4:14, 15) Koia, ʼaua naʼa kotou lotovaivai mo kapau ʼe faigataʼa takotou toe maʼu he tahi neʼe fia logo. ʼE lagi feala ke kotou faitohi ki ai peʼe kotou fakapipiki he kiʼi moʼi pepa ki tona matapā. Neʼe kamata e te pioniē te ako ʼa te fafine ʼi tona gutu matapā, kae neʼe mole ina toe maʼu leva ia ia ki tona loto fale, koia neʼe ina fakatuʼutuʼu ke faitohi ki ai. Ki muli age, ʼi te temi ʼaē neʼe ina maʼu atu ia ia ki tona loto fale, neʼe fakahā age e te fafine te malave ʼaupitō ki tona loto te tokaga ʼofa ʼa te tuagaʼane kiā ia. ʼI tatatou fakavai te pulapula ʼo te moʼoni, ʼe tou logoʼi anai te fiafia ʼaē ʼe tupu mai tatatou sisio ki tana homohomo ake, tana liliu ʼo matuʼa, pea mo tana “fua o tolugofulu, mo onogofulu, pea mo teau ki te tahi.”—Mko. 4:20.