He Faʼifaʼitaki ʼo He ʼu ʼUluaki Palalau

Moʼo Kamata He ʼu Ako Tohi-Tapu ʼi Te ʼUluaki Moeaki ʼo Tesepeli

“ ʼI tau manatu, ʼe maʼuli fiafia age koa te hahaʼi ʼaē ʼe faiga ke fakalogo ki te ʼAtua? [Tuku ke fai mai hana tali.] ʼE fakahā e te ʼalatike ʼaenī te ʼu puani maʼuhiga.” Kotou tuku age Te Tule Leʼo ʼo te ʼaho 1 ʼo Tesepeli, pea kotou lau mo vakaʼi fakatahi he manatu e tahi mai te ʼu kupu tāfito ʼi te ʼu pāsina 30-31. ʼOsi ʼaia, pea kotou lau age he vaega Tohi-Tapu. Kotou tuku age te ʼu nusipepa, pea mo fakatuʼutuʼu ke kotou toe liliu age ke kotou vakaʼi fakatahi te tali ki te fehuʼi ʼaē ʼe hoa mai kiai.

Te Tule Leʼo ʼaho 1 ʼo Tesepeli

“Ko ʼihi ʼe natou ʼui ko te manatu ʼa te Tohi-Tapu ʼo ʼuhiga mo te ʼu felāveʼi fakasino, ʼe kua ʼāfea ia pea ʼe fefeka fau. Pea ko ʼihi age leva, ʼe natou manatu tahi mo te Tohi-Tapu. Koteā lā tau manatu? [Tuku ke fai mai hana tali.] Fakatokagaʼi te manatu ʼaē ʼe haʼu mai te tafitoʼaga ʼo te ʼu lēkula Fakatohi-tapu ʼo ʼuhiga mo te faʼahi ʼaia. [Lau age ia 2 Timoteo 3:16.] ʼE fakahā ia te nusipepa ʼaenī te ʼu tali ki te ʼu fehuʼi e hogofulu ʼaē ʼe fai māhani ʼo ʼuhiga mo te ʼu felāveʼi fakasino. ʼE ina toe fakamahino mai pe koʼē ʼe fua lelei kiā tātou te ʼu pelesepeto Fakatohi-tapu.”

Réveillez-vous! ʼo Tesepeli

Lau ia 2 Timoteo 3:16. Pea kotou ʼui age: “Ko ʼihi ʼe natou tui neʼe takitaki e te ʼAtua ia te tohi ʼo te Tohi-Tapu, kae ko ʼihi age leva ʼe mole tui kiai. Koteā lā tau manatu? [Tuku ke fai mai hana tali.] Logolā ʼe kehekehe te ʼu manatu, kae ʼe mahino papau ia, mole heʼeki ai he tohi neʼe faigataʼa ʼaupitō tona taupau. ʼE fakamatala e te nusipepa ʼaenī te ʼu faiga ʼaē ke pulihi ia te Tohi-Tapu pea mo te ʼu faiga ʼaē ke tāʼofi tona lau lolotoga ni ʼu sēkulō. ʼE ina toe fakamahino mai pe koʼē neʼe tologa ia te Tohi-Tapu.”