He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Maio

“ ʼE kotou fia sisio moʼoni anai koa ki te fakahoko ʼo te lea fakapolofetā ʼaenī? [Lau age ia Isaia 2:4. Pea tuku ke fai mai hana tali.] Tou fakatokagaʼi ʼe ‘fakatokatoka anai’ e te ʼAtua ia te ʼu fihifihia ʼa te tagata. ʼE fakahā mai ʼi te Tohi-Tapu ʼe fakahoko anai e te ʼAtua ia te tau ʼe higoa ko Halamaketone kā ina fakagata anai te ʼu tau fuli. ʼI te nusipepa ʼaenī ʼe fakamahino peʼe koteā te fakaʼuhiga ʼo Halamaketone pea mo te tupuʼaga ʼaē ʼe tonu ai ke tou fakatalitali fakafiafia kiai.”

Réveillez-vous! ʼo Maio

Lau age ia Mateo 6:10. Pea kotou fai age ia te fehuʼi ʼaenī: “Kua kotou feʼekeʼaki koa pe koteā ia te finegalo ʼo te ʼAtua ki te kele? [Tuku ke fai mai hana tali.] ʼI te Tohi-Tapu, neʼe ʼi ai te fakatuʼutuʼu ʼa te ʼAtua ki te kele mai te kamataʼaga, pea ʼe mole heʼeki fetogi tana fakatuʼutuʼu ʼaia. ʼE fakamahino mai e te ʼalatike ʼaenī ia te faʼahi ʼaia.” Fakahā age ia te ʼalatike ʼaē ʼe kamata ʼi te pāsina 10.

Te Tule Leʼo ʼaho 1 ʼo Sūnio

“Tokolahi te hahaʼi ʼe natou lau hoki natou tui mo kapau kua natou sisio. ʼE ke manatu tahi koa mo te hahaʼi ʼaia? [Tuku ke fai mai hana tali. Pea kotou lau age ia Loma 1:20.] ʼI te nusipepa ʼaenī, ʼe fakahā lelei mai ia te ʼu kalitātē e tolu ʼo te ʼAtua ʼe feala ke tou sisio lelei kiai ʼi te ʼu meʼa ʼaē neʼe ina fakatupu, pea ʼe toe fakahā ʼi te nusipepa peʼe malave feafeaʼi kiā tātou ia tatatou mahino ki tona ʼu kalitātē ʼaia.”

Réveillez-vous! ʼo Sūnio

“Ko te pusiʼaki ʼo te fānau ʼe mole ko he meʼa faigafua, tāfito lā mokā kaku ia te tamasiʼi ki te temi tūpulaga pea mo hoko ki ai te ʼu fetogi fakapunamaʼuli. ʼI tau manatu, kofea ʼaē ʼe feala ai ki te ʼu mātuʼa ke natou maʼu he ʼu tokoni ʼe feala ke natou falala kiai? [Tuku ke fai mai hana tali. Pea kotou lau age ia Isaia 48:17, 18.] ʼI te nusipepa ʼaenī, ʼe tou maʼu ai he ʼu faʼifaʼitaki ʼe ʼaoga ki totatou temi moʼo tokoni ki te ʼu mātuʼa ke natou akoʼi tanatou fānau ʼaki ia te poto pea mo te lotomahino.”