Ko Te Folafola ʼa Te ʼAtua ʼe ʼAoga Ki Te Fakaako ʼo Te Moʼoni
1. Kotea ia te kupu tafitō ʼo te fakatahi fakasiliko ʼo te taʼu 2014? Pea kotea anai te fehuʼi ʼae ka maʼu anai tona tali ʼi te fakatahi ʼaia?
1 Ko Sehova, totatou Faiako Lahi, ʼe makehe tokotahi tana faʼahiga faiako. (Esa. 30:20, 21) Kaʼe, ʼe akoʼi feafeaʼi tatou e Sehova? Neʼe ina foaki mai ia te tohi ʼae ʼe lelei tokotahi ʼi te ʼu tohi fuli, ia tana Folafola te Tohi-Tapu. ʼE lava feafeaʼi ki he ako ʼe haʼu mai te ʼAtua ke fua lelei kia tatou ʼi te faʼahi fakasino, mo te fakakaukau, mo te loto pea mo te faʼahi fakalaumalie? ʼE tali anai ia te fakatahi fakasiliko ʼo te taʼu 2014 ki te fehuʼi ʼaia. Ko te kupu tafitō ʼo te fakatahi ʼaia, “Ko Te Folafola ʼa Te ʼAtua ʼe ʼAoga Ki Te Fakaako ʼo Te Moʼoni,” ʼe toʼo mai ia 2 Timoteo 3:16.
2. Kotea anai te ʼu fehuʼi ʼae ka ina fakamahino anai ia te ʼu puani maʼuhiga?
2 Kotou Kumi Ia Te ʼu Puani Maʼuhiga ʼAeni: ʼE tali anai ia te ʼu puani maʼuhiga ʼo te fakatahi ʼaia ki te ʼu fehuʼi ʼaeni:
• ʼE tokoni feafeaʼi mai ia te ako Fakaʼatua? (Esa. 48:17, 18)
• Kapau ʼe tou fakahoko he ʼu fetogi ʼi totatou maʼuli moʼo gaue temi katoa maʼa Sehova, kotea ʼae ʼe tou tui papau ki ai? (Mala. 3:10)
• Kotea ʼae ʼe tonu ke tou fai moka tou logo ki he ʼu “akonaki kehekehe mo agaaga kehe”? (Hep. 13:9)
• ʼE tou lava faʼifaʼitakiʼi feafeaʼi ia te faʼahiga faiakonaki ʼa Sesu? (Mat. 7:28, 29)
• He ko ʼe ʼe tonu kia natou ʼae ʼe faiako ʼi te kokelekasio ke natou toe akoʼi ia natou totonu? (Loma 2:21)
• ʼE ʼaoga ki tea ia te Folafola ʼa te ʼAtua? (2 Tim. 3:16)
• Kotea ʼae ka hoko anai ki te hahaʼi moka luluʼi anai ia te ʼu puleʼaga? (Ake. 2:6, 7)
• ʼE falala feafeaʼi ia Sehova kia tatou? (Efe. 5:1)
• He ko ʼe ʼe tonu ke tou faiga ke tou haga nonofo ʼi te ako ʼae ʼe foaki mai e Sehova? (Luka 13:24)
3. He ko ʼe ʼe ʼaoga ke tou kau ki te fakatahi pea mo tou fakalogo ki te polokalama ʼae neʼe teuteuʼi ʼi tona temi totonu?
3 ʼI te kamataʼaga ʼo te kapite 3 ʼo te lua tohi ʼa Timoteo, neʼe fakamatalatala e te apositolo ko Paulo ia te agaaga ʼo te ʼu ʼaho fakamuli. Neʼe ina tohi fenei: “Ko te u tagata agakovi mo kaka e natou asilisili kovi anai mo asilisili hehe anai, ia natou totonu, pea mo natou ae nee natou kakaai.” (2 Tim. 3:13) Koia, ʼe ʼaoga ai ke tou fakalogo pea mo talagafua ki te ako Fakaʼatua mo kapau ʼe mole tou loto ke kakā ʼi tatou. Koia, tou kau ki te fakatahi, mo tou fakalogo ki te polokalama ʼae neʼe teuteuʼi ʼi tona temi totonu.