Tou Fakaʼaogaʼi Lelei Ia Te ʼu Nusipepa ʼAfeā
ʼE mole tokoni anai ki he tahi mo kapau ʼe tou tanaki te ʼu nusipepa ʼafeā peʼe tou laku. Koia ʼe lelei age ke tou tufa. Koteʼuhi ʼaki he nusipepa, ʼe feala ki he tahi ke ina fia iloʼi te moʼoni pea mo fetapa ki te huafa ʼo Sehova. (Loma 10:13, 14) Koʼeni te ʼu tokoni moʼo fakaʼaogaʼi lelei te ʼu nusipepa ʼafeā.
Ka tou faifakamafola ʼi he telituale ʼe mole faʼa gaueʼi, ʼe lagi lelei ke tou tuku he nusipepa ʼafeā ʼi te ʼu ʼapi ʼae ʼe lavaki.
Ka tou faifagonogono, ohage la ʼi te ʼu taulaga ka, ʼe feala ke tou fehuʼi ki he tahi peʼe ina fia lau he nusipepa. ʼE feala ke tou fakahaha age ki ai he ʼu nusipepa ʼafeā pea mo kole age ke ina filifili ʼae ʼe ina fia lau.
ʼE feala ke tou tuku he ʼu nusipepa ʼi te ʼu fale fakatalitali, ohage la ʼi te ʼu lopitali, peʼe ʼi te ʼu fale taupau ki te hahaʼi matutuʼa. ʼI te agamahani, ʼe lelei ke tou kole muʼa ke fakagafua mai e ia ʼae ʼe pule ʼi te fale. Kapau ʼe kotou tokagaʼi kua hili ai ni nusipepa, ʼe lagi lelei ke ʼaua naʼa kotou tuku he tahi age ʼu nusipepa.
Ka tou teuteuʼi ʼatatou ʼaʼahi, tou fakakaukauʼi ia te aluʼaga ʼo natou takitokotahi, pe kotea ʼae ʼe fia palalau anai ki ai. ʼE lagi ko he tahi ʼe ʼi ai hona kiʼi famili, peʼe ko he tahi ʼe tauhi lotu lelei. ʼE lagi ina leleiʼia te faiʼoloto. Vakaʼi pe ʼe mole he alatike ʼi te ʼu nusipepa ʼafeā ʼe ina fia lau anai pea mo foaki age ki ai moka tou ʼaʼahi ia ia.
Ka tou toe felaveʼi mo he tahi neʼe fia logo, kaʼe neʼe puli ʼi te ʼu vahaʼa ʼaeni kua hili, tou fakaha age ia te ʼu nusipepa ʼae neʼe heʼeki ina maʼu.