Kotea Te Manatu ʼa Sehova ʼo ʼUhiga Mo Au?
1. He ko ʼe ʼe fakata ia te Tohi-Tapu ki he sioʼata?
1 ʼI te ʼaho fuli, ʼe tou faisioʼata koteʼuhi ʼe tou fia iloʼi te agaaga ʼo totatou fofoga, peʼe ko ʼotatou mutu ʼi meʼa. ʼE hage pe ia te Tohi-Tapu ko he sioʼata. Koia ka tou lau ia te Folafola ʼa te ʼAtua, ʼe tou lava mahino ai ki totatou ʼuhiga totonu, ʼae ʼe tokagaʼi e Sehova. (1 Sam. 16:7; Sakp. 1:22-24) Ko te Folafola ʼa te ʼAtua, ʼe ina lava iloʼi “te ʼu manatu pea mo te ʼu fakatuʼutuʼu ʼo te loto.” (Hep. 4:12, MN) Koia ʼe tonu ai ke tou lau pea mo metitasioʼi te Tohi-Tapu ʼi te ʼaho fuli. Kapau ʼe tou ia te faʼahi ʼaia, ʼe tou liliu anai ʼo faiva ʼi te faifakamafola. ʼO feafeaʼi?—Pes. 1:1-3.
2. ʼE lava tokoni feafeaʼi mai te Tohi-Tapu ke tou sivisivi ia tatou totonu?
2 Tou Fakaʼaogaʼi Te Tohi-Tapu: ʼAki te ʼu hisitolia Fakatohi-tapu ʼo te ʼu kaugana agatonu ʼa Sehova, ʼe tou iloʼi ai te ʼu kalitate ʼae ʼe ina leleiʼia. Ohage la, neʼe lagolago malohi ia Tavite ki te huafa ʼo te ʼAtua. (1 Sam. 17:45, 46) Neʼe lototoʼa ia Esaia pea mo lotolelei ke alu ʼo faifakamafola ʼi he telituale ʼe faigataʼa. (Esa. 6:8, 9) Neʼe fiafia ia Sesu ʼi te faifakamafola koteʼuhi neʼe ʼofa ia ki tana Tamai. Neʼe mole hage kia ia ia te gaue ʼaia ʼe ko he kavega. (Soa. 4:34) Neʼe faʼafai te ʼu ʼuluaki Kilisitiano ʼi te faifakamafola, mo natou falala kia Sehova pea mo natou lototoʼa. (Gaue 5:41, 42; 2 Ko. 4:1; 2 Tim. 4:17) Ka tou metitasio ki te ʼu faʼifaʼitaki ʼaia, ʼe tou fakakaukauʼi ai pe kotea ʼae ʼe tonu ke tou fai moʼo fakatuputupu ia te lelei ʼo tatatou tauhi ʼae kia Sehova.
3. He ko ʼe ʼe mole tonu ke tou fakaʼaoʼaoganoa ʼi te fai ʼo ni fetogi?
3 Tou Fai Ni Fetogi: ʼE mahino ia, ʼe mole he ʼaoga ʼo te faisioʼata mo kapau ʼe mole tou fakatokatoka te faʼahi ʼae ʼe kovi. Tou kole kia Sehova ke tokoni mai ke tou sivisivi fakalelei ia tatou totonu pea ke tou fai mo te ʼu fetogi ʼae ʼe ʼaoga. (Pes. 139:23, 24; Luka 11:13) ʼUhi ʼae ʼe kua nounou te temi pea ʼe tonu ke haofaki te maʼuli ʼo te hahaʼi, koia ʼe tonu ai ke mole tou fakaʼaoʼaoganoa ʼi te fai ʼo ni fetogi.—1 Ko. 7:29; 1 Tim. 4:16.
4. Kotea ʼae ʼe hoko ki te tagata ʼae ʼe sio loloto ki te Folafola ʼa te ʼAtua pea mo ina maʼuliʼi te ʼu manatu ʼae ʼe ina lau?
4 ʼE maʼuhiga age kia Sehova totatou ʼulugaaga ʼi totatou ʼuhiga ʼae ʼe ha ki tuʼa. (1 Pet. 3:3, 4) Kotea ʼae ʼe hoko ki te tagata ʼae ʼe sio loloto ki te Folafola ʼa te ʼAtua pea mo ina maʼuliʼi te ʼu manatu ʼae ʼe ina lau? “ʼE fiafia anai ʼi tona maʼuliʼi, koteʼuhi ʼe mole ko he tagata fagono ʼe loto galogalo, kaʼe ko he tahi ʼe ina fai te gaue.” (Sake 1:25, MN) ʼE tou fiafia anai pea mo tou liliu anai ko he kau faifakamafola ʼe faiva koteʼuhi “ʼe ha ia te kololia ʼo Sehova ia tatou ohage ko he ʼu sioʼata.”—2 Ko. 3:18, MN.