Fakaʼaogaʼi Tatatou Tuʼasila ʼi Te Neti ʼi Te Faifakamafola—“Fehuʼi ʼe Fai Tuʼumaʼu”

ʼI takotou olo ki te tuʼasila jw.org/wls, ki te faʼahi ʼae “Ia Matou” ʼe kotou maʼu ai te kupu tafitō “Fehuʼi ʼe Fai Tuʼumaʼu.” Kapau kua kotou mahani ki te ʼu fehuʼi ʼae ʼe fai tuʼumaʼu atu, ʼe feala takotou ui age fakahagatonu ki ai ke alu ki te tuʼasila ʼi te Neti ke ina maʼu ai te ʼu tali Fakatohi-tapu. ʼE feala foki ke tou fakaʼaogaʼi te ʼu fehuʼi ʼaia moʼo kamata ʼaki te faipalalau ʼi te faifakamafola. ʼE feala takotou fakaʼaogaʼi he fehuʼi ʼe fia logo ki ai te hahaʼi ʼo takotou telituale pea mo fakalavelave age tana manatu. ʼOsi ʼaia pea ke fakaha age pe ʼe kotea ʼae ʼe ui mai ʼi te Tohi-Tapu ʼo ʼuhiga mo te faʼahi ʼaia ʼaki tau fakaʼaogaʼi te ʼu manatu ʼe tuʼu ʼi te jw.org/wls. Hili ʼaia, ʼe feala takotou fakamahino peʼe fakaha age ki ai pe ʼe feala ke tou maʼu ʼifea te ʼu manatu ʼaia. ʼE feala ke tou kole age ki ai ke ina lau fakahagatonu ia te tali ʼi tatatou tuʼasila ʼi te Neti. Neʼe maʼu e te ʼohoana ʼo te taupau feʼaluʼaki ia he ʼu fua lelei ʼi tana fai te faʼahi ʼaia. Neʼe ina ui fenei: “Tokolahi ʼe natou feʼekeʼaki pe ʼe ko te ʼAtua ia te Tupuʼaga ʼo ʼatatou mamahi? ʼE kotou fia maʼu koa tona tali ia sekonita pe ʼe 51?” ʼOsi ʼaia, neʼe ina kole age ke ina fakalogo ia te tali ʼae neʼe ina puke mai te Neti ki tana kiʼi telefoni toʼotoʼo. Pea neʼe ina fakaʼosi ia te faipalalau ʼaki tana palalau ki te kapite 11 ʼo te tohi Te Ako Mai Te Tohi-Tapu.