Kua Kotou Tokalelei Koa Ki Te ʼAho Fakamanatu?
ʼI te ʼaho 13 ʼo Nisani ʼo te taʼu 33, neʼe iloʼi lelei e Sesu ʼe ko tona afiafi fakaʼosi ʼaia mo ʼana tisipulo, ʼi muʼa ʼo tana mate. Neʼe ina fai mo natou ia te Pasikate fakaʼosi pea neʼe ina fakatuʼutuʼu ai leva ia te Taumafa ʼo Te ʼAliki. Neʼe ko he toʼotoʼoga neʼe tonu ke teuteuʼi fakalelei. Koia, neʼe ina fekauʼi ai ia Petelo mo Soane ke nā olo ʼo teuteuʼi te toʼotoʼoga ʼaia. (Luka 22:7-13) Pea talu mai te temi ʼaia, ʼi te taʼu fuli, ʼe teuteuʼi fakalelei e te kau Kilisitiano ia te ʼAho Fakamanatu. (Luka 22:19) Kotea anai ka tou teuteuʼi ʼo ʼuhiga mo te ʼAho Fakamanatu ʼo te ʼaho 3 ʼo Apelili?
Ko Te ʼu Meʼa ʼAe ʼe Tonu Ke Fai e Te Kokelekasio:
Fai he ʼu fakatuʼutuʼu ke tou lagolago malohi ki te tufa ʼo te pepa fakaafe ki te ʼAho Fakamanatu.
Fai he lisi ʼo te kau fakaafe: Te kau ako Tohi-Tapu, mo te ʼu kaiga, mo te ʼu kaugā ako, mo te ʼu kaugā gaue, pea mo ʼihi atu.
Tou lau pea mo metitasio ki te ʼu vaega Tohi-Tapu ʼo ʼuhiga mo te ʼAho Fakamanatu.
Kotou ʼomai fakatomuʼa ʼo fakatalitali ia natou ʼae neʼe fakaafe.