“Ke Koutou Haga Fai Te Meʼa ʼAenī Moʼo Fakamanatu Kia Te ʼAu”
1 Neʼe ʼui age e Sesu ki tana kau tisipulo ke nātou fakamanatu tona mate (Luka 22:19). Ko te fakatuʼutuʼu ʼaia ʼe fakamanatu ai te sakilifisio lahi ʼo Sesu maʼa te malamanei katoa. ʼI te taʼu ʼaenī, ko te kau Fakamoʼoni ʼa Sehova ʼi te kele katoa ʼe nātou fai ānai te Fakamanatu ʼo te mate ʼo Kilisito ʼi te feliaono 17 ʼo ʼapelili, mokā takoto te laʼā.
2 Teuteu takitokotahi: ʼE feafeaʼi koa hatatou teuteu lelei ki te ʼaho maʼuhiga ʼaia? ʼE feala ke tou fakakaukau ki ai ʼi te faikole ʼo ʼuhiga mo te maʼuli pea mo te minisitelio ʼo Sesu ʼi tana nofo ʼaē ʼi te kele. Neʼe liliu ia ko te Hāofaki ʼo te hahaʼi fuli ʼi tana foaki tona maʼuli haohaoa ko he sakilifisio (Mat. 20:28). Ke feala ai te ʼiloʼi takitokotahi ʼo te maʼuhiga ʼaē ʼo te totogi ʼaia, ʼe koleʼi atu ke fakasiosio te ʼu kapite 112 ki te 116 ʼo te tohi Le plus grand homme de tous les temps.
3 Ko te taʼu ʼaenī, ko tatatou lautohi ʼo te Tohi-Tapu ia muʼa ʼo te Fakamanatu, ohage ko te meʼa ʼe tuʼu mai ʼi te Calendrier des Témoins de Jéhovah 1992, ko te fakatuʼutuʼu ʼo te ʼu vaega neʼe filifili ʼi te Evaselio ʼo Maleko. Ko te lautohi makehe ʼaia ʼe fai ʼi te ʼu ʼaho e ono, mai te ʼahotapu 12 ʼo ʼapelili ki te feliaono 17 ʼo ʼapelili. ʼE tou faigaʼi ānai ke maʼu he temi ke tou metitasio ai ki te ʼu fakatuʼutuʼu maʼuhiga ʼaia.
4 Teuteu fakalelei ʼa te ʼu tagata ʼāfea: Koutou fakasiosio lelei ke feʼauga foki te ʼu pepa fakaafe ki te ʼaho Fakamanatu. ʼE feʼauga koa te ʼu hekaʼaga ki te ʼu hahaʼi ka ʼomai ānai? Kapau ʼe lahi te ʼu kokelekasio ʼe fakatahi ʼi te fale e tahi, ʼe tonu ke fai he fakatuʼutuʼu ke feala fai e te ʼu kokelekasio te Fakamanatu. Ko nātou ʼe kau ki te gāue fakatalitali ʼe tonu ke nātou ʼiloʼi te ʼu meʼa ʼe tonu ke nātou fai. ʼE nātou faigaʼi ānai ʼo tali leleiʼi ia nātou ʼaē neʼe hoki ʼomai. Ke koutou fili he tagata faiva ke ina fai te akonaki ʼaia pea ke mātala ohage ko tona tuʼu ʼi te Tohi-Tapu. Kole ki te ʼu tagata ʼāfea pe ʼe ko te ʼu tagata faifekau faka minisitelio ke nātou tokoni ki te feʼāveʼaki ʼo te pane mo te vino. Teuteuʼi he pane neʼe mole ai hona meʼa fakatupu pea mo he vino kula neʼe mole huʼi. Ko ʼihi manatu, vakaʼi te Tule Leʼo ʼo te ʼaho 15 ʼo fepualio 1985, pasina 17.
5 ʼAki tatatou teuteu lelei ia muʼa ʼo te ʼaho ʼaia, ʼe tou fakahā ai tatatou mahino lelei ki te maʼuhiga ʼo te ʼaho makehe ʼaia pea ʼe tou holi ānai ke tou fai te Fakamanatu ʼaia ohage ko tana fakatotonuʼi mai. — 1 Ko. 11:23-26.
[Talanoa ʼo te pasina 7]
1. Neʼe kua fakahā koa ki te hahaʼi fuli, feiā kia ia ʼaē ka ina fai te akonaki, te hola pea mo te fahaʼi totonu ʼe fai ai te fakamanatu ʼaia? ʼE ʼi ai koa he motokā ʼa te tagata ʼaē ka ina fai ia te akonaki?
2. Kua fai koa he ʼu fakatuʼutuʼu tāfito moʼo hinoʼi he tahi ke ina teuteuʼi te pane mo te vino?
3. Neʼe kua fakatuʼutuʼu koa ke haʼu he tahi mo he kie fola laupapa ʼe maʼa, he ʼu ipu pea mo he ʼu pa?
4. Koteā koa te ʼu fakatuʼutuʼu neʼe fai ʼo ʼuhiga mo te fakamaʼa ʼo te Fale ʼo te Puleʼaga ia muʼa ʼo te Fakamanatu pea mo he tahi fakamaʼa ki muli mai mo kapau ʼe ʼi ai he tahi kokelekasio ʼe fakatahi mai ki ai ʼi te afiafi pe ʼaia?
5. Ko nātou ʼaē ʼe kau ki te gāue fakatalitali pea mo te ʼu tagata feʼāveʼaki ʼo te pane pea mo te vino neʼe kua ʼosi fili koa nātou? Neʼe fakatuʼutuʼu koa he fono mo nātou ia muʼa ʼo te Fakamanatu ʼo vakaʼi ai pe koteā te gāue ka nātou fai? ʼE hoko koa ʼafea? ʼE feafeaʼi koa tatatou faiga ke feʼāveʼaki te pane mo te vino kia nātou fuli ʼaē ʼe ʼi te fono?
6. Neʼe tou fai koa he fakatuʼutuʼu moʼo tokoni ki te ʼu tēhina pea mo te ʼu tuagaʼane ʼe matutuʼa pe ʼe mahahaki? Neʼe fai koa he ʼu fakatuʼutuʼu ke feala ai te fakahā ʼo te pane mo te vino ki te ʼu kilisitiano fakanofo ʼaē neʼe mole feala tanatou ʼomai ki te Fale ʼo te Puleʼaga?