Tou Fakaʼaogaʼi Te Kiʼi Kaupepa “Te ʼu Fakamahino Mai Te Folafola ʼa Te ʼAtua” Moʼo Kamata ʼAki He ʼu Faipalalau
1. Kotea te meʼa gaue foʼou neʼe tou maʼu ki te faifakamafola?
1 Kua tou maʼu ia te kiʼi kaupepa ko tona kupu tafitō “Te ʼu Fakamahino Mai Te Folafola ʼa Te ʼAtua.” ʼE tou lava fakaʼaogaʼi feafeaʼi ia te meʼa gaue foʼou ʼaia moʼo teuteuʼi he ʼu ʼuluaki palalau ki te faifakamafola? Mai tona aluʼaga ʼae kua fakatahiʼi he ʼu vaega Tohi-Tapu ki he manatu Fakatohi-tapu, kua faigafua hatatou fakaʼaogaʼi moʼo kamata ʼaki he ʼu faipalalau.
2. ʼE tou fakaʼaogaʼi feafeaʼi ia te kiʼi kaupepa “Te ʼu Fakamahino Mai Te Folafola ʼa Te ʼAtua”?
2 Ohage la, ʼe feala ke kotou fakaʼaogaʼi ia te fehuʼi 8 pea mo ui fenei: “ʼE ma ʼaʼahi te hahaʼi koteʼuhi tokolahi ʼe natou feʼekeʼaki pe ‘ʼE ko te ʼAtua koa ia te tupuʼaga ʼo te ʼu mamahi ʼa te tagata?’ [ʼI ʼihi telituale, ʼe fakaha fakahagatonu e te kau faifakamafola ia te fehuʼi ki te hahaʼi.] Kotea la tau manatu? [Tuku ke fai mai hana tali.] ʼE tali mai ʼi te Tohi-Tapu ki te fehuʼi ʼaia.” Lau age ia he vaega ʼi te ʼu vaega ʼae ʼe tuʼu ai pea mo fakamahino. Kapau ʼe lotolelei ki ai, fakaha age ia te ʼu fehuʼi ʼe 20 ʼae ʼe tuʼu ʼi te kamata pea mo kole age ki ai ke ina fili he fehuʼi ʼe fia palalau ki ai moka ke toe ʼaʼahi anai ia ia. Pe ʼe kotou fakatoʼo age ki ai he tohi ʼe fakamahino ai ia te fehuʼi ʼae neʼe kolua vakaʼi.
3. ʼE kotou fakaʼaogaʼi feafeaʼi anai ia te kiʼi kaupepa ʼaia mo te hahaʼi ʼae ʼe mole kau ki he lotu Fakakilisitiano?
3 ʼE ʼaoga ia te ʼu fehuʼi 4, mo te 13 ki te 17, moʼo tokoni atu moka kotou faifakamafola kia natou ʼae ʼe mole kau ki he ʼu lotu Fakakilisitiano. Ohage la, ʼe feala ke kotou fakaʼaogaʼi ia te fehuʼi 17 pea mo ui fenei: “ʼE ma ʼaʼahi te hahaʼi moʼo foaki he ʼu tokoni ki te ʼu famili. Neʼe kotou tokagaʼi koa la kua lahi te ʼu fihifihia ʼe tau mo te ʼu famili ia ʼaho nei? [Tuku ke fai mai hana tali.] Tokolahi te ʼu taumatuʼa neʼe natou leleiʼia te ʼu palalau fakapotopoto ʼaeni: “Ke fakaapaapa te fafine ki tona ohoana.” [ʼE mole aoga ke kotou fakaha age neʼe toʼo mai ia Efeso 5:33. Kapau ʼe kotou faipalalau mo he fafine, kotou lau age ia Efeso 5:28.] ʼI tau manatu la, ʼe fua lelei anai koa ki te maʼuli fakataumatuʼa mo kapau ʼe nā maʼuliʼi ia te tokoni ʼaeni?”
4. ʼI muʼa ʼo tau mavae, kotea ʼae ʼe feala ke ke fai ki he tahi ʼe mole kau ki he lotu Fakakilisitiano?
4 ʼI muʼa ʼo tau mavae, fai he ʼu fakatuʼutuʼu ke toe hoko atu te faipalalau ʼi he tahi ʼaho. ʼE feala pe ke kotou fakatuʼutuʼu ke kotou palalau ʼo ʼuhiga mo he tahi age vaega Tohi-Tapu ʼe alu tahi mo te fehuʼi ʼae neʼe kua kolua faipalalau ki ai. ʼI tona temi totonu, kotou ui age ki ai ko te ʼu palalau fakapotopoto ʼae neʼe kotou lau age ki ai neʼe toʼo mai te Tohi-Tapu. Kotou foaki age he tohi ʼe kotou iloʼi ʼe ina fia lau anai, ʼo mulimuli ki te ʼu manatu ʼae neʼe kolua palalau ki ai.—Vakaʼi Te Minisitelio ʼo Te Puleʼaga ʼo Tesepeli 2013 ʼi te pasina 5-6.