Kotou Tuku Ke Gaue Te Malohi ʼo Te Folafola ʼa Te ʼAtua ʼi Takotou Minisitelio

Ka tali e he tahi ke tou faipalalau ʼo ʼuhiga mo te logo lelei, ʼe tou fakaʼaogaʼi lelei ia te faigamalie ʼaia pea mo tuku ke gaue ia te malohi ʼo te Folafola ʼa te ʼAtua, ʼaki tatatou lau fakahagatonu ia te ʼu vaega ʼi te Tohi-Tapu. Neʼe ko te manatu ʼaia ʼae neʼe fakamaʼuhigaʼi ʼi te fakatahi lahi makehe ʼo te taʼu ʼaeni. Neʼe fai e te taupau ʼo te siliko ia te akonaki ko tona kupu tafitō “Kotou Tuku Ke Gaue Te Malohi ʼo Te Folafola ʼa Te ʼAtua ʼi Takotou Minisitelio.” ʼE kei kotou manatuʼi koa ia te ʼu manatu tafitō?

He koʼe ʼe malohi age ia te ʼu folafola ʼa Sehova ʼi ʼatatou palalau?—2 Tim. 3:16, 17.
ʼE lava malave feafeaʼi ia te Tohi-Tapu ki ʼotatou loto, ki te fetogi ʼo tatatou faʼahiga fakakaukau, mo te fetogi ʼo totatou loto pea mo tatatou aga?—Vakaʼi Te Tule Leʼo ʼo te ʼaho 1 ʼo Sunio 2012, p. 30 pal. 7.
Ka tou lau he vaega Tohi-Tapu ki he tahi, kotea ʼae ʼe feala ke tou fai ke tupu ai tana fia fakaʼapaʼapaʼi ia te Folafola ʼa te ʼAtua?—Vakaʼi te tohi École du ministère ʼi te pasina 148, pal. 3, 4 pea mo Te Minisitelio ʼo Te Puleʼaga ʼo Malesio 2013, p. 7, pal. 8.
He koʼe ʼe maʼuhiga ke tou fakamahino ki te hahaʼi pea ke natou fakakaukauʼi te ʼu vaega ʼae ʼe tou lau, pea ʼe tou lava fai feafeaʼi?—Gaue 17:2, 3; vakaʼi te tohi École du ministère, p. 154, pal. 4 ki te p. 156, pal. 4.